Senesi 20 - Tosi Tapu

Nofo o Apalaamo i Kela

¹ Na mavae loa Apalaamo i le ganea lena, o ano ki le potu saute ; ti na fakatuu loa e ia lona nofoaga i Katesi mo Suli, ti na ano loa a ia ki Kela o nofo fakatemi i ai.

² Na pati loa Apalaamo ki lana avaga ko Sala : Ko loku tuagaane. Ko Apimeleke, sau o Kela, na fakatotonu ia loa ke too ake a Sala kiate ia.

³ Kae na sa loa le Atua i se moe miti kia Apimeleke i le pouli, o pati kiate ia : Ko leinei, e ke mate loa o tupu ko le fafine leia kua ke aga o too, talie e i ai lona avaga.

⁴ Ko Apimeleke, leia na leikiaise fakafeofi kia Sala, na tali loa : Aliki, pe ke tamate loa se puleaga agatonu ?

⁵ Na pati mai le tagata kiate au : Ko loku tuagaane ! Ti na pati totonu le fafine : Ko loku tuagaane. Na kau fai le nea leinei i se loto sako mo ni lima mea.

⁶ Na pati loa le Atua kiate ia i le moe miti : E kau iloa na ke fai le nea lena i se loto mea ; koia na kau taofi ai a koe ke aua na ke agasala kiate au. Koia foki leia na leaise kau fakataga ai ke ke fafa ki le fafine.

⁷ I le aso nei, ke ke toe fakaliliu le fafine ki lona avaga ; talie ko se polofeta a ia, ti e faikole loa a ia kiate koe, ti e ke mauli loa. Kae kapau e leaise ke toe fakaliliu a ia, ke ke iloa e ke mate loa, a koe mo latou fuli ala e kau ki lou fale.

⁸ Na tuu ake loa Apimeleke i le pogipogi usu o kalagai ana tagata fakasausau fuli, ti na fakamatala loa e ia kia latou a nea fuli ana ; ti na lotou i lasi ai.

⁹ Ti na toe kalagai foki e Apimeleke a Apalaamo, o pati kiate ia : Kolea le nea leia kua ke fai kia matou ? Kolea laku sala kua fai kiate koe ke ke tuku ai kiate au mo loku puleaga se agasala lasi fenaaki ? Kua ke fai kiate au se nea leia e leaise tonu ke fai.

¹⁰ Ti na vesili loa Apimeleke kia Apalaamo : Kolea le nea leia na ke manatu ki ai, o tupu ai lau fai felaaki ?

¹¹ Na tali loa Apalaamo : Na kau pati i loku loto, e lagi leaise maua se i maoki ki le Atua i le fenua leinei, ti e tamate loa au o tupu ko laku avaga.

¹² Ti tasi foki, e maoki ko loku tuagaane a ia, talie ko le taine a ia o loku tamana ; kae e leaise ma tinana tasi ; ti kua liliu a ia ko laku avaga.

¹³ I le aso leia na fakamavae ai au e le Atua mei le fale o loku tamana, na kau pati kia Sala : Ko leinei le kalasia leia e ke fai loa kiate au : I fenua fuli ala e ta ano loa ki ai, ke ke pati kiate au : ko loku tuagaane.

¹⁴ Na too loa e Apimeleke ni ovi, mo ni pipi, mo ni tagata fakasausau, mo ni fafine fakasausau, ti na soli loa e ia latou kia Apalaamo ; ti na toe liufaki loa e ia kiate ia lana avaga ko Sala.

¹⁵ Na pati loa Apimeleke : Ko leinei, e tuu loku fenua i ou mua ; nofo i le ganea leia e ke loto ki ai.

¹⁶ Ti na pati loa a ia kia Sala : Ko leinei, e kau soli ki lou tuagaane ni fa piesi siliva e afe ; ko le fakamailoga a ia e fakamaoki ai loa ki lou fale katoa e ke mea i le nea leinei.

¹⁷ Na faikole loa Apalaamo ki le Atua, ti na fakamauli loa e le Atua a Apimeleke, mo lana avaga ti mo ana fafine fakasausau ; ti na mafai loa ke lotou toe fanaunau.

¹⁸ Talie na fakapaa e le Eteleno a fafine fuli o le fale o Apimeleke, o tupu ko Sala, avaga o Apalaamo.