Senesi 2 - Tosi Tapu

Malolo o le Atua i le aso fitu

¹ Ko le fakaoki a ia o le fakatupu o le lagi mo le kele, ti mo nea fuli ala na maua i ai.

² Na fakaoki loa e le Atua lana gaoi i le fitu o aso, ti na malolo loa a ia i ana gaoi fuli ala na fai e ia.

³ Na tapuaki loa le Atua ki le fitu o aso, ti na vaei kese loa e ia le aso a ia, talie na malolo loa a ia i le aso aia i ana gaoi fuli ala na fai e ia ki le fakatupu o le lagi mo le kele.

⁴ Ko leinei le kamataaga o le lagi mo le kele, i le temi leia na la fakatupu ai.

⁵ I le fakatupu e le Eteleno o le kele mo le lagi, na leaise somo se laakau ikiiki o le vao i le kele, ti na leaise sa se mutie i aluga o le kele : talie na leikiaise tuku e le Eteleno Atua se ua ke to ki le kele, ti na leikiaise maua se tagata ke gaoi ki le kele.

⁶ Kae na malaga ake loa se matapuna vai e tasi i le kele o fakavai ia le malama nei katoa.

⁷ Na fau loa e le Eteleno Atua le tagata mei le efu o le kele, ti na pupusi loa a ia ki ona pogoisu se tukumanava o le mauli, ti na liliu loa le tagata ko se laumalie mauli.

⁸ Ti na to loa e le Eteleno Atua se oloto i Eteni, i le potu esite, ti na tuku loa e ia ki ai le tagata leia na fakatupu e ia.

⁹ Ti na fakasosomo loa e le Eteleno Atua i le kele a laakau kesekese fuli e fulumalie ki le mata ti mo malie ki le kai. Ti na fakatuu loa e ia, i loto malie o le oloto, le laakau o le mauli mo le laakau o le iloa o le malie mo le veli.

¹⁰ Ti na mapuna loa se vaitafe i Eteni o fakavai ia le oloto, ti na mavaevae loa a ia mei ai i ni magai vai e fa.

¹¹ Ko le igoa o le uluaki vaitafe ko Pisoni ; ko ia leia e takatakai ia le fenua katoa o Avila, leia e maua ai le aulo.

¹² Ko le aulo o le fenua lena e mea ; ti e toe maua foki i le fenua lena le pului laakau manogi ko le piteliomi, ti mo le fatu mauiga ko le onise.

¹³ Ko le igoa o le lua vaitafe ko Kioni ; ko ia leia e takatakai ia le fenua katoa o Kusi.

¹⁴ Ko le igoa o le tolu vaitafe ko Itekele ; ko ia leia e tafe i le potu esite o Asilia. Ko le vaitafe ko le Eufalate.

¹⁵ Na too loa e le Eteleno Atua le tagata o tuku ki le oloto o Eteni, ke tausi mo leoleo ki ai.

¹⁶ Na tuku loa e le Eteleno Atua le fakatotonu leinei ki le tagata : E feala loa ke ke kai ki laakau fuli o le oloto ;

¹⁷ kae e leaise ke kai loa ki le laakau o le iloa o le malie mo le veli, talie ko le aso leia e ke kai ai loa ki le laakau lena, e ke mate loa.

¹⁸ Na pati loa le Eteleno Atua : E leaise malie ke nofo toka tasi le tagata ; e kau fai loa se tokoi ke tatau mo ia.

¹⁹ Ti na fau loa e le Eteleno Atua mei le kele a manu fuli o le vao, mo manu lele fuli o le lagi, ti na aumai loa e ia latou ki le tagata, talie ke tio a ia pe feaki loa le aga a le tagata o fakaigoa a manu, ti ke maua e nea fuli ala e mauli le igoa leia e tuku ake loa e le tagata.

²⁰ Ti na tuku loa e le tagata ni igoa ki manu fuli o le kele, mo manu lele fuli o le lagi. Kae na leaise maua loa e ia se tokoi leia e tatau mo ia.

²¹ Koia na tuku ai loa e le Eteleno Atua se fia moe lasi ki le tagata, ti na moe loa a ia. Ti na too loa e ia sona ivi vakavaka e tasi, kae na toe tapono loa e ia le kanofi.

²² Ti na fai loa e le Eteleno Atua se fafine ki le ivi vakavaka leia na too e ia mei le tagata, ti na aumai loa e ia le fafine ki le tagata.

²³ Ti na pati loa le tagata : I le faiaga loa leinei, ko leinei leia e ivi ki oku ivi ti e kanofi ki loku kanofi ! E igoa loa a ia ko le fafine, talie na too a ia mei le tagata.

²⁴ Koia leia e tonu ai ke mavae loa le tagata i lona tamana mo lona tinana, ti ke pipiki loa a ia ki lana avaga, ti e la liliu loa ko se tino e tasi.

²⁵ Na la telefua toka lua, le tagata mo lona avaga, ti na leaise la luma i ai.