Senesi 15 - Tosi Tapu

Fakafoou o fakapapau kia Apalamo

¹ I le oki o nea ana, na tuku loa le folafola a le Eteleno kia Apalamo i se tio kiate ia, o pati : Apalamo, aua na ke i ! Ko au ko lou paletau, ti e lasi loa lou fakapale.

² Na tali loa Apalamo : Aliki Eteleno, kolea le nea leia e ke soli mai loa kiate au ? E kau ano, kae e leai saku fanau ; ti ko leia e maua ia loa a koloa o loku fale, ko Eliesele o Tamaso.

³ Ti na pati loa Apalamo : Ko leinei, na leaise ke soli mai kiate au soku sakoga, ti ko leia na tupu i loku fale e maua ia loa loku tofiga.

⁴ Ti na folafola loa le Eteleno kiate ia : E leaise ko ia leia e maua ia loa lou tofiga, kae ko leia e au loa mei ou tootooga ka maua ia loa lou tofiga.

⁵ Ti na taki loa e ia Apalamo ki fafo, o pati kiate ia : Tio ki le lagi, ti ke lau a fetuu, mo kapau e ke ma lau ia latou. Ti na pati loa a ia kiate ia : E fenaaki loa lou sakoga.

⁶ Na tui loa Apalamo ki le Eteleno, leia na totogi ia loa kiate ia lana tui ki le faitotonu.

⁷ Na toe pati loa le Eteleno kiate ia : Ko au ko le Eteleno, leia na fakamavae ia a koe mei Ulu i Kaletea, ke soli kiate koe le fenua leinei mo ou.

⁸ Na tali loa Apalamo : Aliki Eteleno, e kau iloa feaki loa e kau maua loa a ia ?

⁹ Ti na pati loa le Eteleno : Too se pipi fafine muli e fetuu tolu, mo se koti e fetuu tolu, mo se ovi tagata e fetuu tolu, mo se kulukulu, ti mo se lupe muli.

¹⁰ Na too loa e Apalamo a manu fuli ana, o fakapaipaisi latou i loto malie, ti na fakaatu loa e ia a inati o fakafeagaaki. Kae na leaise fakapaipaisi loa e ia a manu lele.

¹¹ Na felelei mai loa a manu lele fekai ki manu mamate ; kae na kapu loa latou e Apalamo.

¹² I le galo o le laa, na kaku loa se fia moe lasi kia Apalamo ; ti ko leinei na vilo loa kiate ia se i lasi mo se fakapouli lasi.

¹³ Ti na pati loa le Eteleno kia Apalamo : Ke ke iloa papau e nofo matapule loa lou sakoga i se fenua kese. E lotou nofo popula loa i ai, ti e lotou fakavelivelii loa i ai i fetuu e kau lelau fa.

¹⁴ Kae e kau fakamaaui loa le puleaga lena na lotou popula ki ai, ti e lotou mavae loa mei ai mo ni koloa lasi.

¹⁵ Ko koe, e ke ano loa i le tokamalie ki ou tamana, ti e tanu loa a koe i le oki o se temi matua malie.

¹⁶ I le fa o tautupu, e lotou toe liliu mai loa ki leinei ; talie e leikiaise kaku le agasala o le kakai Amole ki lona apele malie.

¹⁷ I le galo o le laa, na vilo loa se fakapouli lasi ; ti fokifa kua sa loa se afi kaka leia na kokofu mo ulaula, o fakalaka i loto malie o manu ala na paipaisi.

¹⁸ I le aso lena, na fakapapau loa le Eteleno kia Apalamo, o pati : E kau soli le fenua leinei ki lou sakoga, mei le vaitafe o Esipito o kaku ki le vaitafe lasi, ko le Eufalate :

¹⁹ Ko le fenua o le kau Kenia, mo le kau Kenati, mo le kau Katemoni,

²⁰ mo le kau Eti, mo le kau Pelesi, mo le kau Lefaimi,

²¹ mo le kau Amole, mo le kau Kanaane, mo le kau Kilikasi, ti mo le kau Sepusi.