Senesi 13 - Tosi Tapu

Toe liliu o Apalamo ki le fenua

¹ Na pale loa Apalamo mei Esipito ki le potu saute, a ia mo lana avaga, mo nea fuli ala na maua e ia, ti na pale loa Lote mo ia.

² Na lasi ai a koloa o Apalamo : Na lasi ai lana kau manu, mo lana paaga, ti mo lana aulo.

³ Na taki loa e ia lona fanoga mei le potu saute o kaku ki Petele, o kaku ki le ganea leia na tuu ai lona falela i le kamataaga, i le vasa o Petele mo Ai,

⁴ le ganea leia na tuu ai le aletale leia na fakatuu e ia i mua. I ai, na faikole loa Apalamo i le suafa o le Eteleno.

Mavete o Apalamo mo Lote

⁵ Ko Lote, leia na kau fanoga mo Apalamo, na toe maua ia foki ni kau ovi fafine, mo ni kau pipi, mo ni falela.

⁶ Ti na leaise feauga le fenua ke la nofo fakatasi i ai, talie kua lasi ai ola koloa, ti na leaise koi feala ke la nonofo fakatasi.

⁷ Na malaga loa se fefele i tagata tausi manu a Apalamo mo tagata tausi manu a Lote. I le temi lena, na nofo le kau Kanaane mo le kau Felesi i le fenua.

⁸ Na pati loa Apalamo kia Lote : E kau kole atu kiate koe, ke aua na i ai se fefele iate au mo koe, pe i le vasaa o aku tagata tausi manu mo au tagata tausi manu ; talie e ta tautaina.

⁹ Pe leaise tuu le fenua katoa i ou mua ? Koia mavae ai a koe iate au : kapau e ke ano ki le fetuu sema, ti e kau ano loa ki le fetuu atamai ; kapau e ke ano ki le fetuu atamai, ti e kau ano loa ki le fetuu sema.

¹⁰ Na siki loa e Lote ona mata ki aluga, ti na tio loa a ia ki le fenua o le Solotane leia na laumalie katoa ti na fakavai katoa. O kaku ki Tesoa, i mua o le maumaui o Sotoma mo Komola e le Eteleno, na fai a ia pe se oloto a le Eteleno, na fai a ia pe le fenua o Esipito.

¹¹ Na filifili loa e Lote le fenua laumalie katoa o le Solotane kiate ia, ti na siki loa e ia lona nofoaga ki le potu esite. Ti na la mavete loa i ai.

¹² Na nofo loa Apalamo i le fenua o Kanaane ; ti na nofo loa a Lote i kolo o le fenua laumalie, ti na fakatuu loa e ia ona falela o kaku ki Sotoma.

¹³ Na agaveli le kakai o Sotoma, mo agasala lasi ki le Eteleno.

Fakapapau kia Apalamo

¹⁴ Na pati loa le Eteleno kia Apalamo, i le oki o le mavae o Lote iate ia : Siki ou mata, ti ke tio mei le ganea leia e ke nofo ai ki le potu noleto mo le potu saute, ki le potu esite mo le potu uesite ;

¹⁵ talie ko le fenua katoa leia e ke tio ki ai, e kau soli atu loa a ia kiate koe mo lou sakoga, o tuumau.

¹⁶ E kau fakaliliu loa lou sakoga ke lasi ofaipe le efu o le kele, ti kapau e mafai e se tagata le lau o le efu o le kele, ti e lau loa lou sakoga.

¹⁷ Tuu ki aluga, o foli takai le fenua i lona loa mo lona lau lasi, talie e kau soli loa a ia kiate koe.

¹⁸ Na siki loa e Apalamo ona falela, ti na ano loa a ia o nofo i le ulu sene o Mamele, leia na ofi ki Epelone. Ti na fakatuu loa e ia i ai se aletale ki le Eteleno.