Senesi 12 - Tosi Tapu

Mauli o Apalamo : lona kalagai

¹ Na pati loa le Eteleno kia Apalamo : Ano a koe i lou fenua, mo lou puleaga, mo le fale o lou tamana, ki le fenua leia e kau fakasa loa kiate koe.

² E kau fakatupu loa iate koe se puleaga lasi, ti e kau tapuaki loa kiate koe ; e kau fakaliliu loa lou igoa o lasi, ti e ke liliu loa ko se matapuna o le tapuakina.

³ E kau tapuaki loa kia latou ala e tapuaki loa kiate koe, ti e kau fakamalaia latou ala e lauveli loa kiate koe ; ti e tapuakina loa a famili fuli o le malama nei iate koe.

⁴ Na ano loa Apalamo, o mulimuli ki le pati a le Eteleno kiate ia, ti na ano loa a Lote mo ia. Na fetuu kau fitu tupu lima Apalamo, i lana mavae mei Salani.

⁵ Na ave loa e Apalamo lana avaga ko Salai, mo Lote, le vosa o lona taina, ti mo nea fuli ala na lotou maua, ti mo tagata fakasausau ala na lotou maua i Salani. Na lotou mavae loa o ano ki le fenua o Kanaane. Ti na lotou tau loa ki le fenua o Kanaane.

⁶ Na ano loa Apalamo i le fenua o kaku ki le ganea leia na igoa ko Siseme, o kaku ki le ulu sene o Mole. Na nofo le kau Kanaane i le temi lena i le fenua.

⁷ Na sa loa le Eteleno kia Apalamo, o pati : E kau soli loa le fenua leinei ki lou sakoga. Ti na fakatuu loa e Apalamo i le ganea lena se aletale ki le Eteleno, leia na sa kiate ia.

⁸ Ti na siki loa a ia i lena o ano ki le mauga, i le potu esite o Petele, ti na fakatuu loa e ia ona falela i le vasa o Petele i le potu esite mo Ai i le potu uesite. Na toe fakatuu loa e ia i lena se tasi aletale ki le Eteleno, ti na faikole loa a ia i le suafa o le Eteleno.

⁹ Na toe soko atu loa e Apalamo lona fanoga o ano ki le potu saute.

Apalamo i Esipito

¹⁰ Na to loa se oge i le fenua. Ti na ifo loa Apalamo ki Esipito ke nofo i ai, talie na lasi ai le oge i le fenua.

¹¹ I lana fakafeofi ke ulu ki Esipito, na pati loa a ia ki lana avaga ko Salai : Ko leinei, e kau iloa ko se fafine fulumalie a koe.

¹² Ka tio loa le kau Esipito kiate koe, e lotou pati loa : Ko lana avaga ! Ti e lotou tamate loa au, kae e lotou fakamauli loa a koe.

¹³ E kau kole atu kiate koe ke ke pati loa, ko loku tuagaane a koe, o tupu ke lotou agamalie kiate au o tupu ko koe, ti ke lotou fakamauli loa au o tupu ko koe.

¹⁴ I le kaku a Apalamo ki Esipito, na tio loa le kau Esipito ki le fulumalie lasi o le fafine.

¹⁵ Ti na tio foki le kau aliki a Falaone ki le fafine ti na lotou viki loa a ia kia Falaone ; ti na ave loa le fafine ki le fale o Falaone.

¹⁶ Na agamalie loa Falaone kia Apalamo o tupu ko le fafine ; ti na soli loa e Falaone kia Apalamo ni ovi, mo ni pipi, mo ni asino, mo ni tagata fakasausau, mo ni fafine fakasausau, mo ni asino fafine, ti mo ni kamelo.

¹⁷ Kae na tautea loa e le Eteleno a Falaone mo lona fale ki ni malaia lalasi, o tupu ko Salai ko le avaga o Apalamo.

¹⁸ Koia na fakatotonu ai loa e Falaone ke avake Apalamo kiate ia, ti na pati loa a ia : Kolea na ke fai ai le nea leinei kiate au ? Kolea na leaise ke fakasa mai ai kiate au ko lau avaga ?

¹⁹ Kolea na ke pati ai : Ko loku tuagaane ? Koia na kau too ai a ia ke liliu ko laku avaga. I le lakaga nei, ko lena lau avaga, ke ke too a ia, ti ke ano !

²⁰ Ti na tuku loa e Falaone le fakatotonu ki ana tagata ke kakau a ia ke ano, a ia mo lana avaga, ti mo nea fuli ala na maua e ia.