Selemia 9 - Tosi Tapu

Tagi ki lona kakai

¹ Oi ! ka na apele loku ulu i le vai, Ka na fai oku mata pe se matapuna loimata, E kau tagi loa i le ao mo le po Ki mate o le taine o loku kakai !

² Oi ! ka na kau maua i le toafa se falepola talifanoga, E kau tiaki loa loku kakai, e kau fakamamao loa i ai, Talie ko ni kau fai tono fuli latou, Ko ni kau kaka.

³ E lotou maua le alelo kita ofaipe se kalolo ti e lotou fana le loi ; E leaise lotou makeke i le fenua o tupu ko le maoki ; Talie e lotou ano mei le agaveli ki le agaveli, Ti e leaise lotou iloa au, e pati le Eteleno.

⁴ Ke tasi nofo tokaga ki lona kaukau nea, Ti ke aua na fanaki ki se tasi o ona fetaina ; Talie e afa e fetaina fuli ke kaka, Ti e fakamafola e kaukau nea fuli ni fatufatu.

⁵ E lotou feloiaki pe se fakamanogi, Ti e leaise lotou masau fua i se temi i le maoki ; E lotou ako olatou alelo ki le loi, E lotou tokaga ata ki le fai o le veli.

⁶ E tuu lou nofoaga i loto malie o le kaka ; E leaise lotou fia iloa au, o tupu ko le fai kaka, E pati le Eteleno.

⁷ Koia leia e masau ai le Eteleno o kau tau, o pati : Ko leinei, e kau oono loa latou, e kau asiasii loa latou, Talie kolea ke fai ki le taine o loku kakai ?

⁸ Ko lolatou alelo ko se gasau mateia, E lotou pati ata ki loi ; I le gutu e lotou masau ki le tokamalie ki lolatou oloi, Kae i le takele o le loto e lotou fakatuu kia latou ni masele.

⁹ Pe leaise kau tautea loa latou, o tupu ko nea ana ? e pati le Eteleno. Pe leaise kau totogi loa ki se puleaga felaaki ?

¹⁰ E kau fia tagi mo tagi laulau o tupu ko atu mauga, E kau fia tagi laulau o tupu ko nofoaga o le toafa ; Talie kua vela, ti e leaise koi fakalaka se tasi i ai, E leaise koi logo i ai ki le tagi o kau manu ; Kua sosola a manu lele o le lagi mo manu o le vao, kua lotou pupuli.

¹¹ Io, e kau fakaliliu loa Selusalemi ko se kolo maumau, ko se mumuniaga o kuli vao, Ti e kau fakaliliu loa a kolo o Suta ko se toafa lavaki.

¹² Kofea le tagata poto leia e matala ki nea anei ? Ke fakasa e ia a ia, e leia na masau ki ai le gutu o le Eteleno ! Kolea kua maumau ai le fenua, Kua vela ai ofaipe se toafa leia e leaise fakalaka ai se tasi ?

¹³ E pati le Eteleno : E tupu na lotou tiaki laku lao, Leia na kau tuku ki olatou mua. E tupu na leaise lotou fakalogo ki loku leo, ti Na leaise lotou mulimuli ki ai.

¹⁴ E tupu na lotou mulimuli ki oli o olatou loto, Ti na lotou ano i muli o Paale, Ofaipe lona ako kia latou e olatou tamana.

¹⁵ Koia leia e folafola ai le Eteleno o kau tau, le Atua o Iselaele, o pati : Ko leinei, e kau fagai loa le kakai leinei ki le nea kona, Ti e kau fakainu loa kia latou se vai kona.

¹⁶ E kau fakamavetevete loa latou i ni atu puleaga, Ala na leaise lotou iloa, e latou ti mo olatou tamana, Ti e kau kakau loa le seleta i olatou muli O kaku ki laku maumaui latou fuli.

¹⁷ E folafola le Eteleno o kau tau, o pati : Kotou afa, kotou kalagai mai le kau fafine tagi, ti ke lotou au ! Kotou kakau se tasi ki le kau fafine poto, ti ke lotou au !

¹⁸ Ke lotou fakatavili o sua mai kia tatou se tagi laulau ! Ti ke sali ni loimata mei omatou mata, Ke tafe se vai i omatou laumata !

¹⁹ Talie kua logo mai ni tagi mamae mei Sione : Kolea ! Kua motou maumaui ! Kua motou apele i le luma ! Kua tonu ke motou tiaki le fenua ! Kua maumaui omatou nofoaga !

²⁰ Fafine, kotou fakalogo mai ki le folafola a le Eteleno, Ti ke taofi e lokoutou taliga le nea leia e fakasa e lona gutu ! Kotou ako ki okoutou taineliki ni tagi mate, Kotou feakoaki ni tagi laulau ia koutou.

²¹ Talie kua ulu le mate i omatou katupa, Kua ulu a ia ki omatou fale sau ; Kua tamate e ia a toe liliki i le ala, Mo tupulaga i lapalasi fakafenua.

²² Ke ke pati : E folafola le Eteleno, o pati : E vivilo loa a mate o tagata Ofaipe se nea fakagako kele i faisaga, Ofaipe le vilo o se taulu fulumeto i muli o le tagata tuuti fulumeto, Leia e leaise tae e se tasi.

²³ E folafola le Eteleno, o pati : Ke aua na fakakololia le tagata poto o tupu ko lona poto, Ke aua na fakakololia le tagata makeke o tupu ko lona makeke, Ke aua na fakakololia le tagata mou koloa o tupu ko ona koloa.

²⁴ Kae ko leia e loto ke fakakololia, ke fakakololia a ia O tupu ko lana maua se atamai ti mo lana iloa au, Lana iloa ko au ko le Eteleno Leia e fai ia le agamalie, mo le lao, mo faitotonu i le malama nei ; Talie ko lena le nea e kau fiafia ai, e pati le Eteleno.

²⁵ Ko leinei, e soko mai loa a aso, e pati le Eteleno, Ala e kau tautea ai loa latou fuli ala na silikosisio kae na leaise silikosisio i lolatou loto :

²⁶ Esipito, Suta, Etome, fanau o Amone, Moape, Latou fuli ala e tele ia olatou ma, Latou ala e nonofo i le toafa ; Talie e lee silikosisio a atu puleaga fuli, Ti e lee silikosisio le loto o le fale katoa o Iselaele.