Selemia 8 - Tosi Tapu

Ko le fakaagaaganoa ki le agasala

¹ E pati le Eteleno : I le temi lena, e too loa mei olatou tanuma a ivi o sau o Suta, mo ivi o ona kau pule, mo ivi o ona kau tagata faisakilifisio, mo ivi o ona kau polofeta, ti mo ivi o kakai o Selusalemi.

² E fola loa latou i mua o le laa, mo mua o le masina, mo mua o le kau tau fuli o le lagi, ala na lotou alofa ki ai, ala na lotou tausi ki ai, ala na lotou mulimuli ki ai, ala na lotou afa ia, ala na lotou atolasio ki ai ; e leaise tanaki loa latou, ti e leaise tanu loa latou, kae e lotou fai loa pe se taei kele fakagako i aluga o le kele.

³ E malie ake loa le mate i le mauli kia latou fuli ala e toe loa i le kakai agaveli lena, i ganea fuli ala na kau kapu loa latou ki ai, e pati le Eteleno o kau tau.

⁴ Pati kia latou : E folafola le Eteleno, o pati : Pe ka siga ti e leaise toe tuu ake ki aluga ? Pe ka sese ti e leaise toe tafoki mai ?

⁵ Ti kolea e sese tuumau ai le kakai leinei o Selusalemi ? E lotou tuu makeke i le kaka, E lotou fakafiti ke tafoki.

⁶ E kau tokaga, ti e kau fakalogo : E leaise lotou masau ki le nea leia e tonu ke lotou masau ki ai ; E leaise fakasemala se tasi ki lana agaveli, O pati : Kolea na kau fai ia ? E lotou toe makape fuli, Ofaipe se osi leia e makape ki le tau.

⁷ Io, e iloa foki e le amatuku i le lagi lona temi leia e tonu ke ano ai ; E iloa foki e le lupe, mo le pekapeka, ti mo le amatuku Le temi leia e tonu ke lotou toe liliu ai ; Kae e leaise iloa fua e loku kakai le lao a le Eteleno.

⁸ Pe fefeaki ke kotou pati : E motou popoto, E motou maua le lao a le Eteleno ? E leaise aoga le gaoi a le kau sekelipa, Talie e lotou tosi loi le lao.

⁹ Kua luma le kau poto, Kua lotou sevaia, kua tapo latou e le masele. Ko leinei, na lotou tiaki le folafola a le Eteleno, Ti ko le poto fea leia e lotou maua ?

¹⁰ Koia e kau soli ai loa alatou avaga ki ni tagata kese, Ti mo alatou faisaga kia latou ala e fakamativa ia loa latou. Talie mei leia e ikiiki oki o kaku ki leia e mauiga, E lotou manumanu nea fuli ; Mei le polofeta o kaku ki le tagata faisakilifisio, E lotou fai nea fuli i le kaka.

¹¹ E lotou faitoo fakakaka le lavea o le taine o loku kakai : E lotou pati : Tokamalie ! tokamalie ! Kae e leai se tokamalie.

¹² Pe lotou luma loa, talie e lotou fai ni nea fakalialia ? E leaise lotou kukula fua, e leaise lotou iloa fua le luma. Koia leia e lotou vivilo loa mo latou ala e vivilo, E lotou sisiga loa i le aso leia e kau tautea ai loa latou, E pati le Eteleno.

¹³ E kau loto ke fakapuli latou fuli, e pati le Eteleno ; E leaise toe maua loa se fa vite i le vite, Pe ko se fa fiki i le fiki, Ti e gini loa a lau ; Ti e sola loa ia latou le nea leia na kau soli kia latou.

¹⁴ Kolea e tou tonatona ai i le kele ? Kotou fakatasi, ti tou ano ki kolo tau, O mamate i ai ! Talie kua tuku tatou e le Eteleno, lotatou Atua, ki le mate, Ti kua fakainu e ia tatou ki ni vai kona, O tupu na tou agasala ki le Eteleno.

¹⁵ Na tou amanaki malie ki le tokamalie, Kae e leaise soko fua se nea e malie kia tatou ; Ki se fakamauli, ti ko leinei, ko le nea fakaii !

¹⁶ E logo mai le tagi o osi mei le fetuu o Tane, Ti e galulu le kele katoa i le logoa o olatou tagi ; E lotou au, e lotou kai le fenua ti mo nea fuli e maua i ai, Le kolo ti mo latou e nonofo i ai.

¹⁷ Talie e kau kakau kia koutou ni gata, mo ni gata kona, Ala e leaise feala ke fai ki ai ni nea fakatemonio ; E lotou uuti loa koutou, e pati le Eteleno.

Tagi laulau ki Selusalemi

¹⁸ E kau loto ke fakafimalie loku mamae ; E mamae loku mafu iate au.

¹⁹ Ko leinei kua logo a tagi o le taine o loku kakai Mei se kele mamao : Pe leaise koi nofo le Eteleno i Sione ? Pe leaise koi nofo lona sau iate ia ? Kolea na lotou fakatupu ai loku sausau ki alatou fakatata laakau, Ki ni taulaatua matapule ?

²⁰ Kua oki le temi tuuti o le fulumeto, kua oki le temi vevela, Kae e leaise fakamauli tatou !

²¹ Kua kau fati i le mamae o le taine o loku kakai, Kua kau nofo i le mamae, kua kau maua e se i lasi ai.

²² Pe leaise maua se faitoo i Kalaate ? Pe leai se toketa ? Kolea e leaise fai ai le fakamauli o le taine o loku kakai ?