Selemia 7 - Tosi Tapu

Valoki i le matapa o le fale tapu

¹ Na tuku loa le folafola e le Eteleno kia Selemia, o pati :

² Tuu i le matapa o le fale o le Eteleno, Ti ke fakasa le folafola leinei, Ti ke pati : Kotou fakalogo mai ki le folafola a le Eteleno, Koutou fuli, tagata o Suta, ala e ulu i matapa anei, Ke atolasio ki le Eteleno !

³ E folafola le Eteleno o kau tau, le Atua o Iselaele, o pati : Kotou fetogi okoutou ala mo akoutou gaoi, Ti e kau tuku loa koutou ke nofo i le fenua leinei.

⁴ Aua na kotou fanaki ki ni amanaki kaka, o pati : Ko leinei le fale tapu o le Eteleno, le fale tapu o le Eteleno, Le fale tapu o le Eteleno !

⁵ Kapau e kotou fetogi okoutou ala mo akoutou gaoi, Kapau e kotou fai le faitotonu i okoutou vasaa,

⁶ Kapau e leaise kotou fakamamae le matapule, mo le toe sala matua, mo le fafine lokonui, Kapau e leaise kotou liligi le toto mea i le ganea leinei, Ti kapau e leaise kotou ano ki ni iki ake atua ke kotou malaia ai,

⁷ Ti e kau tuku loa koutou ke nonofo i le ganea leinei, I le fenua leia na kau tuku ki okoutou tamana, I tautupu ki tautupu.

⁸ Kae ko leinei, e kotou fanaki ki ni amanaki kaka, ala e leai sona aoga.

⁹ Kolea ! Kaia, tukipo, tono avaga, Fakapapau loi, momoli iseso kia Paale, Tausi ki ni atua kese ala e leaise kotou iloa !…

¹⁰ Ti oki, ti kotou au o tutuu i oku mua, I le fale leinei e fetapa ai ki loku suafa, Ti e kotou pati : Kua saofaki matou !… Ti e kotou soko atu aifai le fai o nea fakalialia fuli ana !

¹¹ Pe fai loku fale tapu ki okoutou mata pe se ana o ni kau kaia, Le fale leia e fetapa ai ki loku suafa ? E kau tio totonu ki ai, e pati le Eteleno.

¹² Kotou ano ki le ganea leia na fakatapui kiate au i Silo, Leia na kau fakaagai ai loku suafa i mua. Ti kotou tio pe na kau fai feaki a ia, O tupu ko le agaveli o loku kakai ko Iselaele.

¹³ Ti ko leinei, e pati le Eteleno, O tupu na kotou fai a nea fuli ana, O tupu na kau masau atu kia koutou i le usu kae na leaise kotou fakalogo mai kiate au, O tupu na kau kalagai koutou kae na leaise kotou fakalogo mai kiate au,

¹⁴ E kau fai loa le nea leia na kau fai ki Silo, Ki le fale leia na fetapa ai ki loku suafa, Ki le fale leia na kotou tuku ki ai lakoutou fanaki, Ki le ganea leia na kau tuku kia koutou mo okoutou tamana ;

¹⁵ Ti e kau tiaki loa koutou ke mamao i oku mata, Ofaipe laku tiaki ia okoutou fetaina fuli, Le sakoga katoa o Efalaimi.

¹⁶ Ti ko koe, aua na ke ulufaki le kakai leinei, Aua na ke fai loa se tagi pe ko se kole kia latou, Aua na ke fai mai kiate au ni kole fakamakeke ; Talie e leaise kau fakalogo atu loa kiate koe.

¹⁷ Pe leaise ke tio ki le nea leia e lotou fai i Suta Ti mo ala o Selusalemi ?

¹⁸ E tae e fanau se fafie, E tafu e tamana le afi, Ti e lusi e fafine le falina, Ke teuteu ai ni kato ki le fafine sau o le lagi, Ti ke fai ai ni sakilifisio nea inu ki ni atua kese, Ke fakatupu ai loku sausau.

¹⁹ Pe ko au leia e lotou fakaitaita ? e pati le Eteleno ; Pe leaise ko latou totonu, Ke lotou luma ai ?

²⁰ Koia e folafola ai le Aliki, le Eteleno, o pati : Ko leinei, kua liligi loku sausau mo loku mafaia ki le ganea leinei, Ki tagata mo manu, Ki laakau o faisaga mo fua o le kele ; Kua mu loku sausau ti e leaise toe mate loa a ia.

²¹ E folafola le Eteleno o kau tau, le Atua o Iselaele, o pati : Kotou fakalasi akoutou failaulau ki akoutou sakilifisio, Ti kotou kai le kanofi !

²² Talie na leaise kau masau fua mo okoutou tamana ti na leaise kau tuku fua kia latou se fakatotonu e tasi, I le aso leia na kau fakamavae ai latou i le fenua o Esipito, O uiga mo ni failaulau ti mo ni sakilifisio.

²³ Kae ko leinei le fakatotonu leia na kau tuku kia latou : Kotou fakalogo ki loku leo, Ti e kau liliu loa ko lokoutou Atua, Ti e kotou liliu loa ko loku kakai ; Kotou saele i ala fuli ala na kau fakatotonu atu kia koutou, O tupu ke kotou manuia.

²⁴ Kae na leaise lotou fakalogo, Na leaise lotou fakatokaga fua olatou taliga ; Na lotou mulimuli ki tokoi mo oli o lolatou loto veli, Ti na lotou liliu ki muli kae na leaise lotou ano ki mua.

²⁵ Talu mei le aso leia na mavae ai okoutou tamana i le fenua o Esipito, O kaku mai ki le aso leinei, Na kau kakau atu kia koutou aku tagata fakasausau fuli, le kau polofeta, Na kau kakau atu latou kia koutou i aso fuli, mei le usu.

²⁶ Kae na leaise lotou fakalogo mai kiate au, Na leaise fakatokaga mai olatou taliga ; Na lotou fakafefeka olatou ua, Na lotou fai le veli o fakalaka ake i olatou tamana.

²⁷ Kapau e ke fakasa kia latou a nea fuli ana, e leaise lotou fakalogo atu loa kiate koe ; Kapau e ke kalaga kia latou, e leaise lotou tali atu loa kiate koe.

²⁸ Koia pati kia latou : Ko leinei le kakai leia e leaise fakalogo ki le leo o le Eteleno, lona Atua, Ti e leaise loto ke tali ia se akonaki ; Kua puli le maoki, kua mavae a ia i lolatou gutu.

²⁹ Koti lou lau ulu, ti ke ti a ia ki mamao ; Ke ke pale ki potu taualuga, o fai se tagi laulau ! Talie kua tiaki e le Eteleno Ti kua tulei kese e ia le tautupu leia na fakatupu ia lona sausau.

³⁰ Talie na fai e fanau a Suta le nea leia e veli ki oku mata, E pati le Eteleno ; Na lotou fakatuu alatou nea fakalialia i le fale leia e fetapa ai ki loku suafa, O tupu ke fakakelekelei ai latou.

³¹ Na lotou fakatuu ni ganea taualuga i Tofete, i le vaivailiua o Pene-Inome, ke tutu ai i le afi olatou vosa mo olatou taineliki : Nea leia na leaise kau fakatotonu fua ke fai, Nea leia na leaise au fua ki laku fakakaukau.

³² Koia e pati ai le Eteleno : Ko leinei, e soko mai loa ni aso ala e leaise toe pati ai loa ko Tofete mo le vaivailiua o Pene-Inome, Kae e pati loa ko le vaivailiua o le matea tagata, Ti e tanu loa a mate i Tofete, talie e leaise koi maua se ganea.

³³ E liliu loa a mate o le kakai leinei ko le nea kai A manu lele o le lagi mo manu o le kele ; Ti e leaise maua loa se tasi ke kapu ia latou.

³⁴ E kau fakagato loa i kolo o Suta ti mo ala o Selusalemi A kalaga fakafiafia, mo kalaga nekenekea, A sua a le tama feauaki ti mo sua a le taine feauaki ; Talie e liliu loa le fenua ko se toafa.