Selemia 52 - Tosi Tapu

Ko le taui mo le too o Selusalemi

¹ Na kamata sau Setesiasi i lona fetuu kau lua tupu tasi, ti na sau a ia i fetuu e kau agafulu tupu tasi i Selusalemi. Na igoa lona tinana ko Amutale, taine o Selemia mei Lipena.

² Na fai loa e Setesiasi le nea leia e veli ki mata o le Eteleno, o tatau oki mo le fai a Sosakimi.

³ Ti na soko loa le nea lena o tupu ko le sausau o le Eteleno ki Selusalemi mo Suta, ala na loto a ia ke tiaki mei ona mata. Ti na agatuu loa Setesiasi ki le sau o Papilone.

⁴ I le fetuu iva o le sau o Setesiasi, i le aso kau agafulu o le masina kau agafulu, na au loa Nepukatenesale, sau o Papilone, mo lana solia katoa ki Selusalemi ; na lotou fakatuu loa lolatou nofolaga tau i ona mua, ti na lotou takatakai loa a ia ki ni palepale tau.

⁵ Na takatakai loa le kolo o kaku ki le fetuu kau agafulu tupu tasi o le sau ko Setesiasi.

⁶ I le aso iva o le masina fa, na veli ai le oge i le kolo, ti na leaise koi maua se pane ki le kakai o le fenua.

⁷ Ti na fai loa se pu i le kolo, ti na sosola loa a tagata tau fuli, o mavae mei le kolo i le pouli, i le matapa leia i loto o paa e lua, feofi ki le oloto o le sau, kae na lolotoga takatakai le kolo e le kau Kaletea. Na too loa e latou ala na sosola le ala ki le toafa.

⁸ Kae na tuli loa e le kau Kaletea le sau, ti na lotou tapo loa Setesiasi i le toafa o Seliko ; ti mavete loa lana solia katoa o mamao meiate ia.

⁹ Na lotou too loa le sau, o ave ki le sau o Papilone i Lipela, i le fenua o Amati ; ti na fakamaaui loa a ia e le sau o Papilone.

¹⁰ Na fakatotonu loa e le sau o Papilone ke tamate a vosa o Setesiasi i ona mua ; ti na toe fakatotonu foki e ia ke tamate a pule fuli o Suta i Lipela.

¹¹ Ti na fakatotonu loa e ia ke kape a mata o Setesiasi, ti ke saisai a ia ki ni tini ukamea ; ti na ave loa a ia e le sau o Papilone ki Papilone, o velo ki le pilisoni o kaku ki lona mate.

¹² I le aso kau agafulu o le masina lima, - ko le fetuu kau agafulu tupu iva a ia o le sau o Nepukatenesale i Papilone, - na au loa Nepusalatane, pule o le kau tagata leo, leia na tausi ki le sau o Papilone, ki Selusalemi.

¹³ Na tutu loa e ia ki le afi le fale o le Eteleno, mo le fale o le sau, mo fale fuli o Selusalemi ; kae tafito a fale o latou fuli ala na mauiga.

¹⁴ Ko le solia katoa a le kau Kaletea, leia na nofo mo le pule o le kau leo, na maumaui ia loa ki lalo a paa fuli ala na takatakai ia Selusalemi.

¹⁵ Ko Nepusalatane, pule o tagata leo, na ave ia loa se koga o le kau mativa o le fenua o fakapopula, latou o le kakai ala na nonofo i le kolo, latou ala na ano ki le sau o Papilone, ti mo le toetoega o le kakai katoa.

¹⁶ Kae na tuku loa e Nepusalatane, pule o tagata leo, ni iki i le kau mativa, ke nofo i le fenua o gaoi vite ti mo gaoi kele.

¹⁷ Na maumaui loa e le kau Kaletea a fa pou sila ala na tuu i le fale o le Eteleno, mo fakatafito, mo le tanoa sila leia na tuu i le fale o le Eteleno, ti na lotou fetuku le sila katoa ki Papilone.

¹⁸ Na lotou too loa a tanakiaga mugalafu, mo supeti, mo sele, mo ipu lalasi, mo ipu liliki, mo ipu fuli ala na lotou fai ki ai le tausi.

¹⁹ Na toe too foki e le pule o le kau leo a pesini, mo tanakiaga malala, mo ipu, mo tanakiaga mugalafu, mo fa malama, mo ipu kavei, mo kalise, le nea leia na aulo mo le nea leia na paaga.

²⁰ Na leai se iloa le mamafa o fa pou e lua, mo le tanoa, mo pipi sila e kau agafulu tupu lua ala na tuu ai le tanoa, mo nea ala na fai e le sau ko Salomone ki le fale o le Eteleno.

²¹ Na meta iva le taualuga o le fa pou e tasi, ti na meta ona lona fualasi ; na pu le fa pou i ona loto ti na satimeta valu lona matotolu.

²² Na teki i lona tumutumu se puloga kapa, ti na meta lua vaelua le taualuga o le puloga ; na teuteui le puloga ki ni kaui tini kapa ala na lalaga mo ni fuai kelenati, na kapa a nea fuli ana ; na toe tatau oki mo le lua o fa pou, na i ai ni ona kelenati.

²³ Na i ai ni fuai kelenati e kau iva tupu ono i fetuu taki tasi, ti ko le fakatasi o fuai kelenati fuli o le kupega ko le kau lelau.

²⁴ Na too loa e le pule o le kau leo a Selesa, le tagata faisakilifisio lasi, mo Sofoni, le lua o tagata faisakilifisio, ti mo kau leo matapa e toka tolu.

²⁵ Ti na too loa e ia i le kolo se enuke leia na pule ki tagata tau, mo tagata e toka fitu ala na kau ki le fono a le sau ti na maua i le kolo, mo le sekalaipe a le pule o le solia leia e tokaga ki le tae o le solia, ti mo ni tagata e tino ono o le kakai o le fenua ala na maua i le kolo.

²⁶ Na too loa latou e Nepusalatane, pule o le kau leo, o ave ki le sau o Papilone i Lipela.

²⁷ Na taai loa latou e le sau o Papilone, ti na tamate loa latou i Lipela, i le fenua o Amate. Na ave popula loa i ai a Suta, o mamao mei lona fenua.

²⁸ Ko leinei le kakai leia na ave popula e Nepukatenesale : I le fetuu fitu, ko se kau Sutea e tino afe e tolu tino lua tupu tolu ;

²⁹ I le fetuu kau agafulu tupu valu o Nepukatenesale, na ave loa e ia mei Selusalemi a tino lelau e valu tino tolu tupu lua ;

³⁰ I le fetuu kau lua tupu tolu o Nepukatenesale, na ave loa e Nepusalatane, pule o le kau leo, a kau Sutea e tino lelau e fitu mo le tino fa tupu lima ; ko le katoa ko tino afe e fa mo tino lelau e ono.

³¹ I le fetuu kau tolu tupu fitu o le popula a Sosakimi, sau o Suta, i le aso kau lua tupu lima o le masina kau agafulu tupu lua, na lagai loa e Evile-Melotake, sau o Papilone, le ulu o Sosakini, sau o Suta, o fakamavae a ia mei le pilisoni, i le uluaki fetuu o lana sau.

³² Na masau malie loa a ia kia Sosakini, ti na fakatuu loa e ia lona ekeekeaga fakasau i aluga o ekeekeaga o sau fuli ala na nonofo mo ia i Papilone.

³³ Na fakatotonu loa e ia ke fetogi ona kofu mei le pilisoni, ti na kai tuumau loa Sosakini i le laupapa o le sau i le temi katoa o lona mauli.

³⁴ Na tokaga tuumau loa le sau o Papilone ki lona taupau i aso taki tasi o kaku ki lona mate, i le temi katoa o lona mauli.