Selemia 51 - Tosi Tapu

¹ E folafola le Eteleno, o pati : Ko leinei, e kau lagai loa ki Papilone Ti mo le kakai o Kaletea Se matagi maumau.

² E kau kakau ki Papilone ni tagata ta fulumeto, ala e ta ia loa a ia, Ala e fakalavaki ia loa lona fenua. E lotou oso mai loa kiate ia mei potu fuli, I le aso o le malaia.

³ Ke fao le kalolo ki leia e fao ia le kalolo, Ki leia e fia tagata i lona kofu tau ! Aua na kotou fakasao ona tagata tupulaga ! Kotou fakapuli lana solia katoa !

⁴ Ke lotou vivilo lavelavea i le fenua o le kau Kaletea, Ti ke lotou pupu i gasau i ala o Papilone.

⁵ Talie e leaise tiaki Iselaele mo Suta e lola Atua, E le Eteleno o kau tau, Ti kua apele le fenua o le kau Kaletea i agasala Ki le Sagato o Iselaele.

⁶ Kotou sosola i Papilone, ti ke tasi saofaki e le tagata lona mauli, Ke aua na kotou mamate i lona maumau ! Talie ko se temi o le lagavaka ki le Eteleno ; E totogi e ia kiate ia o mulimuli ki ana gaoi.

⁷ Ko Papilone ko se ipu aulo i le lima o le Eteleno, Leia na fakakona ia le malama nei katoa ; Na inu e atu puleaga lana vino : Koia e totogi loa kiate ia o mulimuli ki ana gaoi.

⁸ Fokifa kua vilo Papilone, o fatifati ! Kotou tagi kiate ia, kotou too se lolo ke faitoo ai lona lavea. E lagi toe mauli loa a ia !

⁹ Na motou loto ke fakamauli Papilone, kae na leaise mauli a ia. Tou tiaki a ia, ti ke tasi ano le tagata ki lona fenua ; Talie kua kaku lona tautea ki le lagi, Ti kua pale a ia o kaku ki ao.

¹⁰ Kua fakasa e le Eteleno lotatou agatonu. Kotou au, ti tou fakamatala i Sione Le gaoi a le Eteleno, lotatou Atua.

¹¹ Kotou fakamatakakai a gasau, Kotou too a paletau ! Kua fakamakeke e le Eteleno a loto o sau o Meti, Talie kua loto a ia ke maumaui Papilone ; Talie ko le lagavaka a le Eteleno, Le lagavaka o lona fale tapu.

¹² Kotou toso ki aluga se manumanu ki paa o Papilone ! Kotou fakamakeke a nofolaga solia, Kotou fakatuu ni tagata leo, kotou fakatuu ni masele ! Talie kua fai e le Eteleno se fakapapau, Ti e fai e ia le nea leia na puaki e ia ki Papilone.

¹³ Ko koe leia e nofo i tafa o atu vai lalasi, Leia e maua ia ni fale koloa lalasi, Kua soko lou lakaga fakamuli, Kua kaku lou manumanu koloa ki lona gatoaga !

¹⁴ Na fakapapau le Eteleno o kau tau iate ia totonu : Io, e kau fakaapele loa a koe ki ni tagata ofaipe ni seseivaka ; Ti e lotou fai loa kiate koe ni kalaga tau.

¹⁵ Na fakatupu e ia le malama nei i lona mafimafi, Na fakatafito e ia le kele i lona poto, Na folasi e ia le atu lagi i lona atamai.

¹⁶ I lona leo, e gugulu a vai i le atu lagi ; E fakapale ake e ia a ao i potupotu o le malama nei, E fakatupu e ia a uila mo le ua, E too e ia le matagi mei ona fale koloa.

¹⁷ E liliu tagata fuli o valea i lona iloa, E luma tagata fai ukamea fuli o tupu ko lana fakatata togi ; Talie ko ana taulaatua ko loi, E leaise maua ia latou se tukumanava.

¹⁸ Ko nea noa latou, ko se gaoiaga kaka, E lotou pupuli loa, mo ka kaku mai loa le tautea.

¹⁹ Kae e leaise tatau mo latou le vaega o Sakopo ; Talie ko ia leia na fau ia nea fuli, Ti ko Iselaele ko le kakai o lona tofiga. Ko le Eteleno o kau tau ko lona suafa.

²⁰ Na ke fai kiate au pe se amale, pe se masafu tau. Na kau fatifatii ni puleaga iate koe, Na kau maumaui ni kakai iate koe.

²¹ Iate koe na kau fatii le osi mo le tagata ekeosi ; Iate koe na kua fatii le saliote mo leia e eke i ai.

²² Iate koe na fatii le tagata mo le fafine ; Iate koe na kau fatii le matua mo le toe ; Iate koe na kau fatii le tagata tupulaga mo le taine tupulaga.

²³ Iate koe na kau fatii le tagata tausi manu mo lana kau manu ; Iate koe na kau fatii le tagata gaoi kele mo ana pipi ; Iate koe na kau fatii a kovana mo pule.

²⁴ E kau totogi loa ki Papilone mo le kakai katoa o Kaletea Le veli katoa leia na lotou fai ki Sione i okoutou mata, E pati le Eteleno.

²⁵ Ko leinei, e kau ita kiate koe, mauga maumau, e pati le Eteleno, A koe leia na maumaui ia le malama nei katoa ! E kau falo loa loku lima kiate koe, Ti e kau tekai loa a koe ki lalo mei aluga o utu, Ti e kau fakaliliu loa a koe ko se mauga ulaula.

²⁶ E leaise maua loa iate koe ni fatu agele pe ko ni fatu fakatafito ; Talie e ke liliu loa ko se nea maumau o lee gato, e pati le Eteleno…

²⁷ Kotou fakatuu se manumanu i le fenua ! Kotou pupusi le fakatagi pupusi i atu puleaga ! Kotou teuteu a atu puleaga kiate ia ! Kotou kalagai kiate ia a puleaga o Alalate, mo Mine, mo Asekenase ! Kotou fakanofo ni pule kiate ia ! Kotou fakasaele kiate ia a osi ofaipe ni seseivaka !

²⁸ Kotou teuteu kiate ia a puleaga, a sau o Meti, Ona kovana mo ona pule, Ti mo le fenua katoa leia e fakalogo kia latou !

²⁹ E galulu le kele, e lulu a ia ; Talie e fakasoko ki Papilone le fakatuutuu a le Eteleno ; E fakaliliu loa e ia le fenua o Papilone ko se toafa sala kakai.

³⁰ E leaise koi tau a tagata tau o Papilone, E lotou nonofo i kolo tau ; Kua oki lolatou makeke, kua lotou faipe ni fafine. Kua tuku le afi ki nofoaga, Kua fatifatii a fakamaumau o matapa o le kolo.

³¹ Kua fakafelavei a tagata ave tosi, Kua sosoko a tagata avelogo, O fakasa ki le sau o Papilone Kua too lona kolo mei potu fuli.

³² Kua ulu i matapa, Kua tutu a nofolaga solia e le afi, Kua gagae a tagata tau.

³³ Talie e folafola le Eteleno o kau tau, le Atua o Iselaele : Kua fai le taine o Papilone pe se ganea ta fulumeto i le temi e takatakafi ai le fulumeto ; Koi toe fai le ga temi ikiiki ti soko mai lona temi ta ofaipe le fulumeto.

³⁴ Ko Nepukatenesale, sau o Papilone, na kai ia au ti na maumaui ia au ; Na fakaliliu e ia au ko se ipu masa ; Pe se talakone, na folo e ia au, Na fakaapele e ia lona manava ki nea ala na mauiga kiate au ; Na kapu e ia au.

³⁵ Ke vilo ki Papilone le totogi o oku lavea mo le veli leia na fai e ia kiate au ! E pati le kakai o Sione. Ke vilo loku toto ki le kakai o Kaletea ! E pati Selusalemi.

³⁶ Koia e folafola ai le Eteleno, o pati : Ko leinei, e kau puipui loa a koe, E kau totogi loa le veli leia na fai kiate koe ! E kau fakamalo loa le tai o Papilone, Ti e kau fakamasa loa lona matapuna vai.

³⁷ E liliu loa Papilone ko se kolo maumau, ko se nofoaga o kuli vao, Ko se nea fakaofolele mo fakagologolo ; E leaise toe maua loa i ai se kakai.

³⁸ E lotou gugulu fakatasi loa ofaipe ni laione, E lotou tagi loa ofaipe ni uviki laione.

³⁹ Kae ka lotou kamata velaia loa, e kau fakainu loa latou, E kau fakainu loa latou ke konana, ke lotou fakafiafia, Ti ke lotou momoe o talu oki, e leaise lotou toe ala ake loa, e pati le Eteleno.

⁴⁰ E kau fakaifo loa latou ofaipe ni akeno ki le fale tamate manu, Ofaipe ni ovi tagata mo ni koti tagata.

⁴¹ Kolea ! Kua too Sesake ! Kua lava leia na fakaapele ia le malama nei katoa ki lona kololia ! Kolea koia, kua maumaui Papilone i loto malie o atu puleaga !

⁴² Kua ake le tai ki Papilone : Kua ufiufi Papilone e ni galu lalasi.

⁴³ Kua maumau ona kolo, Kua malo le kele mo toafa ; Ko se fenua leia e leaise koi nofo ai se tasi, Ti e leaise koi fakalaka ai se tasi.

⁴⁴ E kau tautea loa Pele i Papilone, E kau tatai loa mei lona gutu le nea leia na folo e ia, Ti e leaise toe feoso loa a atu puleaga kiate ia. Kua siga foki ki lalo le paa o Papilone !

⁴⁵ Kotou mavae i Papilone, ei loku kakai, Ti ke tasi saofaki e le tagata lona mauli ! Kotou sosola i le sausau lasi o le Eteleno !

⁴⁶ Ke aua na kotou loto gaegae, ti ke aua na kotou i, O tupu ko logoa ala e mafola loa i le fenua ; Talie e soko loa se logoa i le fetuu leinei, Ti mo se tasi i le fetuu ka au, E pule loa le fakamakeke i le fenua, Ti e malaga ake loa se pule fakamakeke ki se tasi pule fakamakeke.

⁴⁷ Koia ko leinei, e au a aso Ala e kau tautea ai loa a taulaatua o Papilone, Ti e apele loa lona fenua katoa i le luma ; E vivilo loa ona mate fuli i loto malie o ona.

⁴⁸ Ki Papilone e sua fakafiafia loa le lagi mo le kele, Ti mo nea fuli i ai ; Talie e au loa kiate ia le tagata maumau mei le noleto, E pati le Eteleno.

⁴⁹ Ei kau mate o Iselaele, e vilo loa Papilone Ofaipe lana fakavilo a mate i le fenua katoa.

⁵⁰ Koutou ala na sao i le seleta, kotou ano, aua na kotou tuvai ! I le kele mamao, kotou manatu ki le Eteleno, Ti ke tuu Selusalemi i okoutou loto o lee gato !

⁵¹ Na motou luma i lamotou logo ki lauveli ; Na apele omatou mata i le luma, I le aso na ulu ni matapule Ki le sagatualio o le fale o le Eteleno.

⁵² Koia e pati ai le Eteleno, ko leinei, e soko mai loa a aso, Ala e kau tautea ai loa ona taulaatua ; Ti e logo ai loa ki tagi mamae a le kau lavevea i lona fenua katoa.

⁵³ Ka malaga loa Papilone o kaku ki le atu lagi, Ka fakamakeke loa e ia ona kolo tau ke aua na toe too, E kau kakau loa kiate ia ni tagata maumau, e pati le Eteleno…

⁵⁴ E ulu ni tagi mei Papilone, E lasi se maumau i le fenua o le kau Kaletea.

⁵⁵ Talie kua maumaui e le Eteleno a Papilone, Kua fakagato e ia a kalaga logoa iate ia. Kua fai ni kalaga e le fili ofaipe le gugulu o galu o le tai, ti kua kaku mai lona logoa.

⁵⁶ Io, kua oso le tagata maumau kiate ia, ki Papilone ; Kua too a tagata tau o Papilone, Kua fatifati alatou kalolo. Talie ko le Eteleno ko se Atua e totogi ia ki le tagata taki toka tasi o mulimuli ki ana gaoi, Ti e soli ia ki le tagata taki toka tasi lona totogi.

⁵⁷ E kau fakainu loa ona sau ke konana, Mo ona kau poto, mo ona kovana, mo ona pule, mo ona tagata solia ; E lotou momoe loa i se moe lee gato, ti e leaise lotou toe ala loa, E pati le sau, leia e suafa ko le Eteleno o kau tau.

⁵⁸ Koia e folafola ai le Eteleno o kau tau : E sisiga loa ki lalo a paa matotolu o Papilone, E tutu loa e le afi ona matapa taualuga. O tupu ke aua na aoga le gaoi a kakai, Ti ke pakia noa a atu puleaga.

⁵⁹ Ko le fakatotonu leinei na tuku e le polofeta ko Selemia kia Selasa, vosa o Nelisa, vosa o Makesesa, i lana ano ki Papilone mo Setesiasi, sau o Suta, i le fetuu fa o le sau o Setesiasi. I le temi lena na uluaki tokoi a Selasa.

⁶⁰ Na tosi loa e Selemia i se tosi a malaia fuli ala na tonu ke soko ki Papilone, a folafola fuli anei kua tosi ki Papilone.

⁶¹ Na pati loa Selemia kia Selasa : Ka ke kaku loa ki Papilone, e ke tokaga loa o lau a folafola fuli anei,

⁶² Ti e ke pati loa : Eteleno, ko koe leia na fakasa ia e maumaui loa le ganea leinei, ti e leaise toe nofoi loa a ia e se tagata pe ko se manu, kae e liliu loa a ia ko se toafa o lee gato.

⁶³ Ti ka oki loa lau lau le tosi leinei, e ke nonoa loa ki ai se fa fatu, ti ke ti loa a ia ki le vaitafe ko le Eufalate,

⁶⁴ Ti e ke pati loa : E feneeki loa le ogo o Papilone, e leaise toe tuuake loa a ia ki aluga mei malaia ala e kau aumai loa kiate ia. E mamate loa a atu puleaga. Ko le gatoaga leinei o folafola a Selemia.