Selemia 50 - Tosi Tapu

Ko le folafola kikite ki Papilone

¹ Na tuku loa le folafola a le Eteleno ki le polofeta ko Selemia o uiga mo Papilone, o uiga mo le fenua o le kau Kaletea :

² Kotou fakasa le nea leinei ki atu puleaga, kotou futi se manumanu ! Kotou logologo a ia, aua na kotou fufu se nea e tasi ! Kotou pati : Kua too Papilone ! Kua luma Pele, kua fati Melotake ! Kua luma ona taulaatua, kua fatifati ona fakatata !

³ Talie kua pale mai se puleaga mei le potu noleto kiate ia, ti e fakaliliu loa e ia lona fenua o toafa, ti e leaise toe maua loa se tagata i ai ; e sosola loa a tagata mo manu, o ano.

⁴ I aso ana, i le temi lena, e pati le Eteleno, e toe liliu fakatasi loa fanau o Iselaele mo fanau o Suta ; E lotou saele tagi loa, Ti e lotou afa loa le Eteleno, lolatou Atua.

⁵ E lotou afa loa le ala o Sione, E agaaga loa olatou mata kiate ia : Kotou au, kotou pipiki ki le Eteleno I se sai lee gato leia e leaise toe galo loa i se aso !

⁶ Ko loku kakai ko se kau ovi leia na puli noa ; Na fakasese latou e olatou tausi ovi, o taki latou i mauga ; Na lotou ano mei mauga lalasi ki mauga liliki, Kae galo lolatou lotoa.

⁷ Ko latou fuli ala na maua ia latou na kai ia latou, Ti na pati olatou fili : E leaise motou sala fua, Talie na lotou agasala ki le Eteleno, ki le nofoaga o le faitotonu, Ki le Eteleno, le amanaki malie o olatou tamana.

⁸ Kotou sosola i Papilone, kotou sosola i le fenua o le kau Kaletea, Ti kotou fai pe ni koti tagata ala e takitaki ia le kau manu !

⁹ Talie ko leinei, e kau lagai loa kia koutou Ni puleaga lalasi mo mauke ai mei le potu noleto ; E lotou pale loa ki Papilone, E lotou tau loa kiate ia, ti e lotou too loa a ia ; E fai alatou gasau pe se tagata poto i le tau, Leia e leaise se toe liliu noa.

¹⁰ Ti e tuku loa Kaletea ke maumaui ti ke kaia, Ti e makokona loa latou ala e kaia ia loa a ia, e pati le Eteleno.

¹¹ Io, kotou nonofo i le fiafia, mo le nekenekea, Koutou ala na maumaui ia loku tofiga ! Io, kotou soposopo ofaipe se uviki pipi fafine i le mutie, Kotou tagi ofaipe ni osi itaita !

¹² Kae ko leinei, e apele lokoutou tinana i le luma, E nofo i le luma leia na fanaui ia koutou ; E liliu a ia ko le mulimuli o atu puleaga, ko se toafa, ko se kele malo mo kaka.

¹³ O tupu ko le sausau o le Eteleno, e leaise toe nofoi loa a ia, Kae tuu lavaki loa a ia. E ofolele loa latou fuli ala e fakalaka loa i tafa o Papilone, Ti e lotou mapu loa ki ona lavea fuli.

¹⁴ Kotou fakaatu ki le tau, ti kotou takatakai Papilone, koutou fuli ala e faikalolo ! Kotou fana akoutou kalolo kiate ia, aua na kotou tuku noa a gasau ! Talie na agasala a ia ki le Eteleno.

¹⁵ Kotou fai kiate ia se kalaga o le tau mei potu fuli ! E falo e ia ona lima ; E sisiga ona fakatafito, E sosolo ona paa. Talie ko le sausau o le Eteleno. Kotou totogi kiate ia le veli ! Kotou fai kiate ia ofaipe le nea na fai e ia !

¹⁶ Kotou fakapuli i Papilone leia e muluki fakaili mo leia e too ia le sele piko i le temi tuuti o le fulumeto ! I mua o le seleta maumau, Ke tasi liliu le tagata ki lona kakai, Ke tasi sola le tagata ki lona fenua.

¹⁷ Ko Iselaele ko se ovi na sese noa, Leia na kapu e laione ; Na uluaki kai a ia e le sau o Asilia ; Ti na gugu ona ivi e Nepukatenesale, sau o Papilone.

¹⁸ Koia e folafola ai le Eteleno o kau tau, le Atua o Iselaele, o pati : Ko leinei, e kau tautea loa le sau o Papilone mo lona fenua, Ofaipe laku tautea le sau o Asilia.

¹⁹ E kau toe aumai loa Iselaele ki lona nofoaga ; E maua loa e ia ona faisaga mutie i Kalemelo mo Pasani, Ti e makona loa lona laumalie i le mauga o Efalaimi mo Kalaate.

²⁰ I aso ana, i le temi lena, e pati le Eteleno, E afa loa le agaveli a Iselaele, ti e leaise maua loa a ia, Le agasala a Suta, ti e leaise maua loa a ia ; Talie e kau fakamolemole loa ki le toetoega leia e kau tuku loa i le fenua.

²¹ Pale ki le fenua leia na agatuu tua lua, Ki lona le kakai, ti tautea latou ! Tuli latou, tamate latou, fakapuli latou ! e pati le Eteleno. Fai katoa aku fakatotonu !

²² E gugulu ni kalaga tau i le fenua, Ti e lasi le tamatea.

²³ Kolea ! Kua fati, kua maumau, le amale o le malama nei katoa ! Kua maumaui Papilone i loto malie o atu puleaga !

²⁴ Na kau fakatuu kiate koe se masele, ti kua ke piki ia, Papilone, Kae na leaise ke iloa ; Kua maua a koe, kua too a koe, Talie na ke tau ki le Eteleno.

²⁵ Koia na fakamavaa ai e le Eteleno lona fale masafu tau, Ti na too e ia i ai a masafu o lona sausau ; Talie ko se gaoi lena a le Aliki, a le Eteleno o kau tau, I le fenua o le kau Kaletea.

²⁶ Kotou ulu mei potu fuli ki Papilone, Kotou fakamavaa ona fale magiti, Kotou fetuku a koloa o tanaki fakatuuga, Ti kotou maumaui a ia ! Ke aua na toe toe se nea iate ia !

²⁷ Kotou tamate ana pipi tagata fuli, ke ave latou ki le fale tamate manu ! Malaia kia latou ! talie kua soko mai lolatou aso, Le temi o lolatou tautea.

²⁸ Kotou fakalogo ki tagi a latou ala e sosola, a latou ala e sosola i le fenua o Papilone, O fakasa i Sione le lagavaka a le Eteleno, lotatou Atua, Mo le lagavaka o lona fale tapu !

²⁹ Kotou kalagai ki Papilone le kau faikalolo, koutou fuli ala e poto i le kalolo ! Kotou takatakai a ia, ke aua na sao se tasi ! Kotou totogi kiate ia o mulimuli ki ana gaoi ! Kotou fai katoa kiate ia o mulimuli ki le nea na fai e ia ! Talie na malaga a ia i le fia nealasi ki le Eteleno, Ki le Sagato o Iselaele.

³⁰ Koia e vivilo loa ona kau tupulaga i ala, Ti e mamate loa ona tagata tau fuli i le aso lena, E pati le Eteleno.

³¹ Ko leinei, e kau mamae kiate koe, taine fia nealasi, e pati le Aliki, le Eteleno o kau tau ; Talie kua soko mai lou aso, le temi o lou tautea.

³² E seke loa le taine fia nealasi o vilo ki lalo, ti E leaise toe lagai loa a ia ki aluga e se tasi. E kau tuku loa le afi ki ona kolo, Ti e kai loa e ia ona tafatafa fuli.

³³ Koia e folafola ai le Eteleno o kau tau, o pati : E taomia fakatasi fanau o Iselaele mo fanau o Suta ; Ti ko latou fuli ala na ave ia latou ki le popula e taofi ia latou, Ti e leaise lotou loto ke toe tuku ake latou.

³⁴ Kae e makeke leia e totogi ia latou, Leia e igoa ko le Eteleno o kau tau. E puipui loa e ia lolatou mauli, O tupu ke tuku le malolo ki le fenua Ti ke lulu le kakai o Papilone.

³⁵ E pati le Eteleno : Ke siki le seleta ki le kau Kaletea, Ki le kakai o Papilone, mo ona pule, mo ona poto !

³⁶ Ke siki le seleta ki polofeta loi, ke lotou faipe ni tagata valelea ! Ke siki le seleta ki ona tagata toa, ke lotou i !

³⁷ Ke siki le seleta ki ana osi mo ana saliote tau ! Ke siki le seleta ki kakai kesekese ala e nonofo i loto malie o ona, Ke lotou liliu ofaipe ni fafine ! Ke siki le seleta ki ona fale koloa, ke kaia latou !

³⁸ Ke vilo le tau laa ki ona vai ! ke lotou mamasa ! Talie ko se fenua o taulaatua ; Kua lotou valelea ki olatou taulaatua.

³⁹ Koia e nonofo ai loa a manu o le toafa i ai mo kuli vao, Ti e fai loa e otulusi lolatou nofoaga i ai. E leaise toe nofoi loa a ia i se aso, E leaise toe fakakakai loa a ia i se aso.

⁴⁰ Ofaipe Sotoma mo Komola, ti mo kolo i ola tafatafa, ala na maumaui e le Atua, E pati le Eteleno, E leaise toe nofoi loa a ia, E leaise toe liliu loa a ia ko se nofoaga fakatemi o se tagata.

⁴¹ Ko leinei, e au se kakai mei le potu noleto, ko se puleaga lasi, Ti e malaga ake ni sau makeke i potupotu o le malama nei.

⁴² E lotou too le kalolo mo le tao ; E lotou tukipo, sala manava alofa ; E gugulu lolatou leo ofaipe le tai ; E lotou eke i ni osi, O teuteu pe se fa tagata e tasi, Ke tau kiate koe, taine o Papilone !

⁴³ Kua maua e le sau o Papilone le logo, Ti kua lulu ona lima, Kua kaku le i kiate ia, Ofaipe le mamae o se fafine e fanau…

⁴⁴ Ko leinei, pe se laione, e pale mai a ia mei laugutu fia nealasi o le Solotane, Ki le nofoaga makeke. Fokifa e kau kapu loa latou, Ti e kau fakanofo loa iate ia leia na kau filifili. Talie ko ai e tatau mo au ? Ko ai e tuku ia kiate au ni fakatotonu ? Ti ko le pule fea leia e tuu mai loa kiate au ?

⁴⁵ Koia kotou fakalogo mai ki le fakapapau leia na fai e le Eteleno ki Papilone, Ti mo fakatuutuu ala na fai e ia ki le fenua o le kau Kaletea ! E maoki e toso loa latou ki fafo ofaipe ni ovi gagae, E maoki e kaia loa lolatou nofoaga.

⁴⁶ I le logo ki le too o Papilone, e galulu le malama nei, Ti e logo se tagi i lotolotoga o atu puleaga.