Selemia 49 - Tosi Tapu

Folafola kikite ki Amone

¹ Ki fanau a Amone. E folafola le Eteleno, o pati : Pe leaise maua e Iselaele se vosa ? Pe leaise maua e ia se tasi ke mau tofiga ? Kolea e maua ai e Malekome a Kate, Ti e nofo ai lona kakai i ona kolo ?

² Koia e folafola ai le Eteleno, o pati : E soko mai loa a aso Ala e kau fakagugulu ai loa le kalaga o le tau ki Lapati o fanau a Amone ; E liliu loa a ia ko se tuuga fatu maumau, Ti e tutu loa e le afi ona kolo liliki ; I le aso lena e kapu loa e Iselaele latou ala na kapu ia a ia, e pati le Eteleno.

³ Eseponi, tagi mamae, talie kua maumaui Ai ! Taineliki o Lapa, kotou fetagisi, kotou kofu ni taga, Kotou tagi laulau, ti kotou makape saele i paa o le kolo ! Talie e ano Malekome ki le popula, Mo ona kau pelepitelo, ti mo ona kau pule.

⁴ Kolea e ke nekenekea ai o tupu ko ou vaivailiua ? Kua puli lou vaivailiua, taine agatuu, A koe leia na fanaki ki ou koloa : Ko ai ka au loa o tau kiate au ?

⁵ E pati le Aliki, le Eteleno o kau tau : E kau aumai loa kiate koe le i lasi E au loa a ia meia potu fuli ; E kapu loa le tagata taki toka tasi o koutou i ona mua, Ti e leaise toe tanaki loa e se tasi latou ala e sosola.

⁶ Kae i le oki o le nea lena, e kau toe aumai loa le kau popula o fanau a Amone, E pati le Eteleno.

Folafola kikite ki Etome

⁷ Ki Etome. E folafola le Eteleno o kau tau, o pati : Pe leaise koi maua se tagata poto i Temane ? Pe kua puli le fakakaukau i tagata atamai ? Pe kua puli noa lolatou poto ?

⁸ Kotou sosola, kotou titua mai, kotou ulu ki ana ! Kakai o Tetane ! Talie e kau aumai le malaia kia Esau, Le temi o lona tautea.

⁹ Kapau e au kiate koe ni kau tau vite, Pe leaise lotou fakatoe loa se nea ? Kapau e au kiate koe ni kau kaia i le pouli, E lotou maumaui fai le nea leia e lotou mafai.

¹⁰ Kae ko au, e kau fakamativa loa Esau, E kau fakasa loa ona maloloaga, E leaise mafai loa ke toe mumuni a ia ; E mamate loa ana fanau, mo ona fetaina, mo ona vasaa fale, Ti e leaise toe maua loa a ia.

¹¹ Tuku au fanau sala matua, e kau fakamauli loa latou, Ti ke fanaki au fafine lokonui kiate au !

¹² Talie e folafola le Eteleno, o pati : Ko leinei, ko latou ala na leaise tonu ke inu ia le ipu e inu ia loa a ia ; Ti ko koe, pe ke sala tautea loa ! E leaise nofo loa sala tautea, E ke inu loa a ia.

¹³ Talie e kau fakapapau iate au totonu, e pati le Eteleno, E liliu loa Potesela ko se nea fakaofolele mo fakalumaluma, Ko se nea maumau mo fakamalaia, Ti e liliu loa ona kolo fuli ko ni tuuga nea maumau o lee gato.

¹⁴ Na kau maua mei le Eteleno se logo, Ti na kakau se tagata avelogo ki atu puleaga : Kotou fakatasi mai, ti kotou saele kiate ia ! Kotou tutuu ki aluga ki le tau !

¹⁵ Talie ko leinei, e kau fakaliliu loa a koe ke ikiiki i atu puleaga, Mo vesiainai e tagata.

¹⁶ Ko lou fia makeke, mo le fia nealasi o lou loto na fakasese ia a koe, A koe leia e nofo i pu o utu, Ti e maua ia le tumutumu o mauga liliki. Ka ke fakatuu loa lou ofaga ke taualuga ofaipe leia o le akuila, E kau fakaifo loa a koe mei ai ki lalo, e pati le Eteleno.

¹⁷ E liliu loa Etome ko se nea maumau ; Ko latou fuli ala e fakalaka loa i ona tafa, E punamauli loa ti e mapumapu loa i ona lavea fuli.

¹⁸ Ofaipe Sotoma mo Komola ti mo kolo i tafatafa, ala na maumaui, E pati le Eteleno, E leaise toe nofoi loa a ia, E leaise toe nofo loa i ai se tagata…

¹⁹ Ko leinei, tatau mo se laione, e pale a ia mei laugutu matasoka o le Solotane Ki le nofoaga makeke ; Fokifa e kau kapu loa Etome mei ai, Kae kau fakanofo loa kiate ia leia na kau filifili. Talie ko ai e tatau mo au ? Ko ai e tuku ia loa ni fakatotonu kiate au ? Ti ko ai le pule e mafai ke tuu loa i oku mua ?

²⁰ Koia kotou fakalogo mai ki le fakapapau leia na fai e le Eteleno ki Etome, Ti mo fakatuutuu ala na fai e ia ki le kakai o Temane ! E maoki e toso loa latou ki fafo ofaipe ni ovi gagae, E maoki e maumaui loa lolatou nofoaga.

²¹ E galulu le kele i le logoa o lolatou vilo ; E logo alatou tagi o kaku ki le tai Kula…

²² Ko leinei, ofaipe le akuila leia e au, e lele a ia, E folasi e ia ona kapakau ki Potesela, Ti ko le mafu o toa o Etome i le aso lena E faipe le mafu o se fafine leia e fanau.

Folafola kikite ki Tamaso

²³ Ki Tamaso. Kua luma Amati mo Alepati, Talie kua la maua se logo veli, e la lulu ; Ko se tai malagalaga Leia e leaise feala ke toe tokamalie.

²⁴ Kua gaegae Tamaso, e maliu a ia ke sola, Talie kua kaku le i kiate ia ; Kua maua a ia e le i mo mamae Ofaipe se fafine leia e fanau.

²⁵ Oiau ! E leaise tiaki a ia, le kolo mauiga, Le kolo leia e fiafia ai loku loto !

²⁶ Koia e vivilo ai loa ona kau tupulaga i ala, Ti e mamate loa ona kau tagata tau i le aso lena, E pati le Eteleno o kau tau.

²⁷ E kau tutu loa paa o Tamaso ki le afi, Ti e kai loa e ia a fale sau o Pene-Atate.

Folafola kikite ki Ketale mo Atesoa

²⁸ Ki Ketale mo puleaga o Atesoa, ala na tamate e Nepukatenesale, sau o Papilone. E folafola le Eteleno, o pati : Kotou tutuu ki aluga, kotou pale ki Ketale, Ti kotou maumaui a vosa o le potu esite !

²⁹ E too loa olatou falela mo alatou kau manu : E ave loa olatou puipui, mo alatou kavega fuli, ti mo alatou kamelo, Ti e fai loa kia latou mei potu fuli ni kalaga fakaii.

³⁰ Kotou sosola, kotou sosola i lokoutou makeke katoa, kotou afa se nofoaga i se ganea kese, Kakai o Atesoa ! e pati le Eteleno ; Talie ko Nepukatenesale, sau o Papilone, Na fai ia se tonu kia koutou, Na Fakakaukaui e ia se fakatuutuu kia koutou.

³¹ Kotou tutuu ki aluga, kotou pale ki se puleaga tokamalie, Leia e nofo fimalie i lona nofoaga, e pati le Eteleno ; E leai ni ona matapa pe ko ni ona ukamea fakamaumau, E nofo toka tasi a ia.

³² E kaia loa alatou kamelo, E ave loa alatou kau manu ; E kau fakamavetevete loa latou i potu fuli, latou ala e tele ia a ma o le kaukava, Ti e kau aumai loa kia latou le maumau mei potu fuli, e pati le Eteleno.

³³ E liliu loa Atesoa ko le nofoaga o kuli vao, ko se toafa, o lee gato ; E leaise toe nofo loa se tasi i ai, e leaise toe fakalaka loa se tagata i ai.

Folafola kikite ki Elame

³⁴ Na tuku loa le folafola a le Eteleno ki le polofeta ko Selemia o uiga mo Elame, i le kamataaga o le sau o Setesiasi i Suta, o pati :

³⁵ E folafola le Eteleno o kau tau, o pati : Ko leinei, e kau fatii loa le kalolo a Elame, Lona makekeaga tafito.

³⁶ E kau aumai loa kia Elame a matagi e fa o potupotu e fa o le lagi, E kau fakamavetevete loa latou ki matagi fuli ana, Ti e leaise i ai loa se puleaga Leia e kaku loa ki ai latou ala na sosola i Elame.

³⁷ E kau fakalulu loa a kakai o Elame i mua o olatou fili, Mo mua o latou ala e loto ki lolatou mauli ; E kau aumai loa kia latou ni malaia, O tupu ko loku sausau lasi, e pati le Eteleno, Ti e kau kapu loa latou ki le seleta, O kaku ki laku tamatamate fuli latou.

³⁸ E kau fakatuu loa loku ekeekeaga fakasau i Elame, Ti e kau maumaui loa le sau mo pule, E pati le Eteleno.

³⁹ Kae i se temi ki muli, e kau toe aumai loa le kau popula o Elame, E pati le Eteleno.