Selemia 48 - Tosi Tapu

Folafola kikite ki Moape

¹ O uiga mo Moape. E folafola le Eteleno o kau tau, le Atua o Iselaele, o pati : Malaia kia Nepo, talie kua maumaui a ia ! Luma kia Kiliataimi, talie kua too a ia ! Luma kia Misikape, talie kua fati a ia.

² Kua puli le kololia o Moape ; I Eseponi e fai ai ni fakakaukau veli kiate ia : Tou ano, tou fakapuli a ia i loto malie o atu puleaga ! Mo koe foki, Matemene, e maumaui loa a koe ; E tuli loa a koe e le seleta.

³ E logo ni tagi mei Kolonaimi : Ko se maumau lasi, ko se mamae lasi.

⁴ Kua fati Moape ! Kua logo ana tagi o kaku ki Soa.

⁵ Talie e fetagisi i le paleaga ki Lukite, Ti e logo le tagi mamae i le ifoaga ki Kolonaimi :

⁶ Kotou sosola, kotou saofaki okoutou mauli, Ti kotou nonofo i le toafa ofaipe se asino vao !

⁷ Talie, o tupu na ke fanaki ki au gaoi mo ou koloa, Ko koe foki, e ke too loa, Ti e ano loa Kemosi o popula, Mo ona kau pelepitelo ti mo ona kau pule.

⁸ E ulu loa le tagata maumau ki le kolo taki tasi, Ti e leaise sao loa se kolo e tasi ; E mate loa le fenua o le vaivailiua, Ti e maumaui loa le fenua o le toafa, Ofaipe lona fakasa e le Eteleno.

⁹ Kotou soli ni kapakau kia Moape, Ti ke lele a ia o ano ! Talie e fakaliliu loa ona kolo ko se toafa, E leaise lotou toe maua loa ni kakai.

¹⁰ Malaia leia e fai fakakaka ia le gaoi a le Eteleno, Malaia leia e fakamamao ia lana seleta i le matea !

¹¹ Na fimalie Moape talu mei lona ikiiki, Na malolo a ia i lona nofoaga, Na leaise liligi a ia mei se tasi a ipu ki se tasi ake ipu, Ti na leaise ano a ia o popula. Koia na taupau ai e ia lona suamalie, Ti na leaise fetogi ai lona manogi.

¹² Koia e pati ai le Eteleno, ko leinei e soko mai loa a aso, Ala e kau kakau ai loa ni kakai ke liligi ia a ia ki ni iki ake a ipu ; E lotou liligi loa ke mamasa a fagu ala e tanaki ai a ia, Ti e lotou maumaui loa ona utele.

¹³ E luma loa Moape ki lona atua ko Kemosi, Ofaipe le luma o le fale o Iselaele Ki Petele, leia na fakaapele ia a ia i le fanaki.

¹⁴ Pe fefeaki e kotou pati ai : Ko matou ko ni tagata toa, ko ni tagata solia kua teuteu ki le tau ?

¹⁵ Kua maumaui Moape, kua vela ona kolo, Kua tamate le kau lalasi o lona kau tagata tupulaga, E pati le sau, leia e igoa ko le Eteleno o kau tau.

¹⁶ Kua vave soko fua le maumaui o Moape, Kua au fakatavili lona malaia.

¹⁷ Kotou tagi kiate ia, koutou fuli ala e takatakai ia a ia, Koutou fuli ala e iloa ia lona igoa ! Kotou pati : Pe na feaki loa le fati o le tokotoko fakasau makeke lena, Le laakau mamalu lena ?

¹⁸ Ifo mei le nofoaga o le kololia, o tonatona i le kele malo, A koe, taine o Tiponi ! Talie kua pale mai kiate koe le tagata maumau o Moape, Ti e maumaui e ia ou kolo tau.

¹⁹ Tuu i le ala, o tio, A koe leia e nofo i Aloele ! Vesili ki leia na sola, leia na sao, O afa : Kolea kua soko ?

²⁰ Kua luma Moape, talie kua fati a ia. Kotou tagi laulau ti kotou tagi leo lasi ! Kotou fakasa i Alenone Kua maumaui Moape !

²¹ Kua au le tautea ki le fenua o le toafa, Ki Oloni, mo Saati, mo Mefaati,

²² Ki Tiponi, mo Nepo, mo Pete-Tipelataimi,

²³ Ki Kiliataimi, mo Pete-Kamuli, mo Pete-Meoni,

²⁴ Ki Kelisoti, mo Potesela, mo kolo fuli o le fenua o Moape, Ala e mamao mo la e feofi.

²⁵ Kua tuuti le makeke o Moape, Ti kua fati lona lima, E pati le Eteleno.

²⁶ Kotou fakainu a ia ke kona, talie na malaga a ia ki le Eteleno ! Ke fuliteka Moape i lona lulua, Ti ke liliu foki mo ia ko se nea fakagologolo !

²⁷ Pe na leaise fai Iselaele kiate koe pe se nea fakagologolo ? Pe na ke maua a ia mo le kau kaia, ke ke masau ai kiate ia, o lu lou ulu ?

²⁸ Kakai o Moape, Kotou tiaki a kolo, ti kotou nonofo i ni utu ! Kotou faipe ni lupe, Ala e fai ia olatou ofaga i paa o ana !

²⁹ E motou iloa le fia nealasi o Moape fulumalie, Mo lona fia taualuga, mo lona nekenekea, mo lona matasoka, mo lona fia aliki.

³⁰ E pati le Eteleno : E kau iloa foki lona gutu loiloi, mo ana masau laulaunoa, Ti mo ana gaoi noa.

³¹ Koia leia e kau tagi ai kia Moape, E kau tagi kia Moape katoa ; E kau tagi ki le kakai o Kile-Elesi.

³² Vite o Sipema, e kau tagi kiate koe o lasi ake ia Saesele ; Na ano ou laa o kaku ki le tai ; Na lotou solofa o kaku ki le tai o Saesele ; Na oso le tagata maumau kiate koe, o tuuti lou fulumeto mo tau lou vite.

³³ Kua puli le fiafia mo le nekenekea i kolo vao Ti mo le fenua o Moape ; Na kau fakamasa le vino i tane vino ; E leaise koi takatakafi i le fiafia le fua o le vite i le tatauaga vino. E i ai ni kalaga ki le tau, kae leaise ko ni kalaga o le fiafia.

³⁴ E logo a kalaga a Eseponi o kaku ki Eleale, Ti e kaku foki olatou leo ki Saate, Mei Tesoale o kaku ki Kolonaimi, mo Ekalate-Selisisa ; Talie kua maumau foki a vai o Nimelimi.

³⁵ E pati le Eteleno : E kau loto ke fakapuli i Moape leia e pale ki ganea taualuga, O tutu le iseso ki lona atua.

³⁶ Koia e tagi ai loku loto ofaipe se fulute ki Moape, E tagi loku loto ofaipe se fulute ki le kakai o Kile-Elesi, O tupu kua pupuli a koloa fuli ala na lotou tanaki.

³⁷ Talie kua tele a ulu fuli, Kua tuuti a kaukava fuli, Kua matafatafa a lima fuli, Ti kua sulu ni taga ki vakavaka fuli.

³⁸ I ato o fale fuli o Moape mo ona malae fakafenua, Kua logo ata ki ni tagi laulau, Talie kua kau momoi Moape ofaipe se ipu veli, E pati le Eteleno.

³⁹ Kua lasi ai lona fatii ! Kotou tagi laulau ! Kua titua Moape i lona luma ! Kua liliu Moape ko se nea fakagologolo mo fakaii Kia latou fuli ala e nonofo i ona tafatafa.

⁴⁰ Talie folafola le Eteleno, o pati : Ko leinei, e lele a ia ofaipe se akuila, Ti e folasi e ia ona kapakau ki Moape.

⁴¹ Kua too Kelisoti, Kua too e le fili a kolo tau, Ti kua fai a mafu o tagata toa o Moape i le aso lena Pe le mafu o le fafine e fanau.

⁴² E puli loa Moape, e leaise toe tuu loa a ia ko se kakai, Talie na malaga a ia ki le Eteleno.

⁴³ Ko le i, mo le popoko, ti mo le kupega, Kua ifo kiate koe, kakai o Moape ! E pati le Eteleno.

⁴⁴ Ko leia e sola i mua o le i e vilo ki le popoko, Ti ko leia e pale ake i le popoko e pikiia i le masele ; Talie e kau kakau mai kiate ia, kia Moape Le fetuu o lona tautea, e pati le Eteleno.

⁴⁵ I le malu o Eseponi e manavanava latou na sosola kua gagae ; Kae e ulu mai se afi mei Eseponi, Se ula mei loto malie o Sioni, E kai e ia a vakavaka o Moape, Ti mo tumuaki o le ulu o vosa o le maveuveu.

⁴⁶ Malaia kiate koe, Moape ! Kua puli le kakai o Kemosi ! Talie kua ave ou vosa ki le popula, Ti mo ou taineliki ki le popula.

⁴⁷ Kae e kau toe aumai loa le kau popula o Moape, i se temi ki muli, E pati le Eteleno. Ko lena le fakamaau o Moape.