Selemia 44 - Tosi Tapu

Agasala mo le fakamaau o le kau Sutea o Esipito

¹ Ti na tuku loa le folafola kia Selemia o uiga mo le kau Sutea katoa leia e nofo i le fenua o Esipito, i Miketoli, mo Takepenese, mo Nofi, mo le fenua o Patolosi, o pati :

² E folafola le Eteleno o kau tau, le Atua o Iselaele, o pati : Kua kotou tio ki malaia fuli ala na kau kakau mai ki Selusalemi mo kolo fuli o Suta : I le aso leinei kua lotou tuu ko ni kolo maumau, ti e leaise koi i ai se kakai,

³ O tupu ko le agaveli leia na lotou fai ke tupu ai loku sausau, o lotou ano o momoli le iseso ti mo tausi ki ni atua kese ala na leaise lotou iloa, e koutou, mo okoutou tamana.

⁴ Na kau kakau atu kia koutou aku tagata fakasausau, le kau polofeta, na kau kakau atu latou koi usu, ke pati kia koutou : Aua na kotou fai a nea fakalialia ana, ala e kau vesia ki ai.

⁵ Kae na leaise lotou fakalogo, na leaise tokaga olatou taliga, na leaise lotou tafoki mei alatou agaveli, ti na leaise gato lalatou momoli le iseso ki ni iki ake atua kese.

⁶ Ti na kau liligi loa loku sausau mo loku mafaia, ti na tutu loa a kolo o Suta, mo ala o Selusalemi, ala kua liliu ko ni kolo maumau ata ti ko se toafa, ofaipe le nea e tio ki ai i le aso nei.

⁷ I le aso nei, e folafola le Eteleno, le Atua o kau tau, le Atua o Iselaele : Kolea e kotou fai ai kia koutou totonu se veli lasi felaaki, ke tuuti ai mei loto malie o Suta a tagata, mo fafine, mo fanau, mo toe memea, ke aua na toe maua loa se ga toetoega o koutou ?

⁸ Kolea e kotou fakatupu ai loku sausau ki gaoiaga o okoutou lima, o kotou momoli le iseso ki ni iki ake atua kese i le fenua o Esipito, leia kua kotou ano o nonofo i ai, ke tupu ai lokoutou mamate ti ke kotou liliu ai ko se nea fakatupu lauveli mo fakalumaluma i puleaga fuli o le kele ?

⁹ Pe kua galo ia koutou a agasala o okoutou tamana, mo agasala o sau o Suta, mo agasala o alatou avaga, mo akoutou agasala, mo agasala o okoutou avaga, ala na fai i le fenua o Suta mo ala o Selusalemi ?

¹⁰ Na leaise lotou fakasemala o kaku mai ki le aso nei, ti na leaise lotou maua se i, ti na leaise lotou mulimuli ki laku lao mo aku fakatotonu ala na kau tuku kia koutou mo okoutou tamana.

¹¹ Koia e folafola le Eteleno o kau tau, le Atua o Iselaele, o pati : Ko leinei, e tio fakaagatonu oku mata kia koutou, ke kau fai kia koutou se nea veli, ti ke kau motusi a Suta katoa.

¹² E kau too loa a toetoega o Suta, ala kua mafuli olatou mata o ano ki le fenua o Esipito, ke nofo i ai, ti e lotou mamate fuli loa. Io, ko le fenua lena e lotou vivilo ai loa, o mamate i le seleta, mo le oge, latou fuli mei leia e ikiiki o kaku ki leia e lasi ; ti e lotou liliu loa ko se nea fakalialia, mo se nea fakaii, mo fakatupu lauveli, mo fakalumaluma.

¹³ E kau tautea loa latou ala e nonofo i le fenua o Esipito, ofaipe laku tautea Selusalemi ki le seleta, mo le oge, mo le taumasaki.

¹⁴ E leaise sao loa se fa toka tasi, pe sola, ia latou fuli ala na toe i Suta ti na ano o nonofo i le fenua o Esipito mo le amanaki malie ke lotou toe liliu mai ki le fenua o Suta o toe nonofo i ai ; talie e leaise lotou toe liliu loa ki ai, kae e gato loa ki se ga toka teiki leia e sao loa.

¹⁵ Ko tagata fuli ala kua iloa ia kua tutu e olatou avaga le iseso ki ni iki ake atua kese, mo fafine fuli ala na tutu i ai, ti na lotou api ai, ti mo le kakai katoa leia na nofo i le fenua o Esipito, i Patolosi, na tali loa kia Selemia :

¹⁶ E leaise motou fakalogo loa ki se nea i nea ala kua ke fakasa mai kia matou i le suafa o le Eteleno.

¹⁷ Kae e motou fai loa o mulimuli ki le nea leia kua fakasa e omatou gutu, ke tutu le iseso ki le fafine aliki o le lagi, ti mo fai kiate ia ni moliga nea inu, ofaipe lamatou fai masani, a matou mo omatou tamana, mo omatou sau, ti mo omatou pule, i kolo o Suta mo ala o Selusalemi. Ti na motou maua loa i ai se pane ke motou kai, ti na motou fiafia loa i ai, ti na leaise motou tio loa ki se malaia.

¹⁸ Kae talu loa mei le aso leia na motou fakagato ai le tutu o le iseso ki le fafine aliki o le lagi ti mo fai ni moliga nea inu, kua leaise motou toe maua loa se nea, ti kua motou mamate i le seleta mo le oge…

¹⁹ Tasi leia, i lamotou tutu le iseso ki le fafine aliki o le lagi ti mo fai kiate ia ni moliga nea kai, pe na leaise loto ki ai omatou avaga, ke motou teuteui ni kato ki le fafine aliki o le lagi, ti ke motou fai ni moliga nea inu kiate ia ?

²⁰ Ti na pati loa Selemia ki le kakai katoa, ki tagata, mo fafine, mo latou fuli ala na fai ia kiate ia le tali lena :

²¹ Pe na leaise manatui loa e le Eteleno, pe na leaise taofi loa e ia i lana fakakaukau le iseso leia na kotou tutu i kolo o Suta mo ala o Selusalemi, e koutou, mo okoutou tamana, mo okoutou sau, mo okoutou pule, mo le kakai o le fenua ?

²² Na leaise mafai loa e le Eteleno ke toe kataki atu a ia, o tupu ko le agaveli o akoutou gaoi, o tupu ko nea fakalialia ala kua kotou fai ; ti kua liliu lokoutou fenua ko se fenua maumau, ko se toafa, ko se nea fakatupu malaia, ofaipe le nea leia kua kotou tio ki ai i le aso nei.

²³ E tupu kua kotou tutu le iseso ti kua kotou agasala ki le Eteleno, talie na leaise kotou fakalogo ki le leo o le Eteleno, ti na leaise kotou taupau lana lao, mo ana fakatotonu, mo ana pelesepeto, koia leia kua soko ai a malaia ana kia koutou, ofaipe le nea kua kotou tio ki ai i le aso nei.

²⁴ Ti na toe pati loa Selemia ki le kakai katoa mo fafine fuli : Kotou fakalogo mai ki le folafola a le Eteleno, koutou fuli ko le kakai o Suta, ala e nonofo nei i le fenua o Esipito !

²⁵ E folafola le Eteleno o kau tau, le Atua o Iselaele, o pati : Kua kotou fakasa i okoutou gutu, e koutou mo akoutou avaga, ti kua kotou fai ki okoutou lima le nea leia kua kotou fakasa : E motou loto ke motou fakasoko a fakapapau ala kua motou fai, ke motou tutu le iseso ki le fafine aliki o le lagi mo fai kiate ia ni moliga nea inu. I le lakaga leinei kua oki ai akoutou fakapapau i le fai, ti kua kotou fakamaoki ai akoutou fakapapau,

²⁶ Kotou fakalogo mai ki le folafola a le Eteleno, koutou fuli ko kakai o Suta ala e nonofo i le fenua o Esipito ! E pati le Eteleno : Ko leinei, e kau fakapapau i loku suafa taualuga, e leaise toe too loa loku suafa e le gutu o se tagata fuai e tasi o Suta, ti e leaise pati loa se tasi i le fenua katoa o Esipito : E mauli le Aliki, le Eteleno !

²⁷ Ko leinei, e kau tokaga loa ke fai kia latou le veli kae leai le malie ; ti e mamate loa a tagata fuli o Suta i le fenua o Esipito i le seleta, mo le oge, o kaku ki le fakamulimuli.

²⁸ Kae ko se ga toka teiki fua leia e sao loa i le seleta, ti e toe liliu loa mei le fenua o Esipito ki le fenua o Suta. Kae ko le ga toetoega fua o Suta, latou fuli ala kua au ki le fenua o Esipito ke nofo i ai, e lotou iloa loa pe ko laku folafola pe ko lalatou leia e soko loa.

²⁹ Ti ko leinei, e pati le Eteleno, se fakamailoga leia e kotou iloa ai loa e kau tautea loa koutou i le ganea leinei, o tupu ke kotou fakasoko loa aku folafola kia koutou ki lokoutou malaia.

³⁰ Ti e folafola le Eteleno, o pati : E kau tuku loa Falaone Ofala, sau o Esipito, ki lima o ona fili, mo lima o latou ala e loto ki lona mauli, ofaipe laku tuku Setesiasi, sau o Suta, ki lima o Nepukatenesale, sau o Papilone, lona fili, leia na loto ki lona mauli.