Selemia 43 - Tosi Tapu

Patigataa o le kau Sutea ; ave fakamakeke o Selemia ki Esipito

¹ I le oki o le fakasa e Selemia ki le kakai katoa a folafola a le Eteleno, lolatou Atua, a folafola fuli ana na fakatotonu e le Eteleno, lolatou Atua, ke fakasa kia latou,

² Na pati loa kia Selemia a Asalia, vosa o Ose, mo Sokanane, vosa o Kalease, mo tagata fia nealasi fuli ana : E ke fakasa se loi : na leaise fakatotonu e le Eteleno, lomatou Atua, ke pati mai kia matou : Aua na kotou ano o nonofo i Esipito.

³ Kae ko Paluke, vosa o Nelisa, leia e soka ia a koe kia matou, o tupu ke tuku matou ki lima o le kau Kaletea, ke lotou tamate matou pe lotou ave popula matou ki Papilone.

⁴ Na leaise fakalogo loa Sokanane, vosa o Kalease, mo kau pule solia fuli, mo le kakai katoa, ki le leo o le Eteleno, leia na fakatotonu ia kia latou ke lotou nonofo i le fenua o Suta.

⁵ Ti na too loa e Sokanane, vosa o Kalease, mo kau pule solia fuli, a toetoega fuli o Suta, ala, i le oki o lolatou mavetevete i mua i atu puleaga fuli, na toe liliu mai ke nofo i le fenua o Suta,

⁶ A tagata, mo fafine, mo fanau, mo taineliki o le sau, mo le kakai katoa leia na tuku e Nepusalatane, pule o le kau leo, ke nonofo mo Ketalia, vosa o Asikame, vosa o Safani, mo Selemia, le polofeta, mo Paluke, vosa o Nelisa.

⁷ Na lotou ano loa ki le fenua o Esipito, talie na leaise lotou fakalogo ki le leo o le Eteleno, ti na lotou kaku loa ki Takepanese.

Kikite ki le too o Esipito e Nepukatenesale

⁸ Ti na tuku loa le folafola a le Eteleno kia Selemia i Takepanese, o pati :

⁹ Too i lou lima ni fa fatu lalasi, o fufu latou i mua o le kau Sutea, i le kelemea o le gutuumu fai piliki leia e tuu i le uluaga o le fale o Falaone, i Takepanese.

¹⁰ Ti e ke pati loa ki le kau Sutea : E folafola le Eteleno o kau tau, le Atua o Iselaele, o pati : E kau fakatotonu loa ke au Nepukatenesale, sau o Papilone, laku tagata fakasausau, ti e kau fakatuu loa lona ekeekeaga fakasau i aluga o fatu anei kua kau aga o fufu, ti e folasi loa e ia lona la i aluga.

¹¹ E au loa a ia, ti e tautea loa e ia le fenua ko Esipito, ki le mate latou ala e tonu ke mate, ki le popula latou ala e tonu ke popula, ki le seleta latou ala e tonu ke mate i le seleta !

¹² E tuku loa e ia le afi ki fale o atua o Esipito ; e tutu loa e Nepukatenesale a taulaatua, pe ave popula loa e ia latou ; ti e pulupulu loa a ia ki le fenua o Esipito ofaipe le tagata tausi ovi leia e takatakai ki lona taupulupulu, ti e mavae loa a ia mei Esipito i le tokamalie.

¹³ E fatifatii loa e ia a fakatata o Pete-Semesi, i le fenua o Esipito, ti e tutu loa e ia ki le afi a fale o atua o Esipito.