Selemia 42 - Tosi Tapu

Ko le fakalotomakeke o le kakai ke aua na ano ki Esipito

¹ Ti na fakafeofi ake loa a kau pule solia fuli, mo Sokanane, vosa o Kalease, mo Sesania, vosa o Ose, mo le kakai katoa, mei leia e ikiiki o kaku ki leia e lasi,

² O pati kia Selemia, le polofeta : Tali malie amatou kole ! Ulufaki matou ki le Eteleno, lou Atua, mo latou fuli ala koi toe, talie na motou api ti kua motou lavaki, ofaipe le nea leia e ke tio ki ai ;

³ Ti ke fakasa mai e le Eteleno, lou Atua, le ala leia e tonu ke motou muli ai, mo le nea leia e tonu ke motou fai !

⁴ Ti na pati loa le polofeta ko Selemia kia latou : Kua kau logo ; ti e kau ano loa o faikole ki le Eteleno, lokoutou Atua, o mulimuli ki lakotou kole ; ti e kau fakasa atu loa kia koutou le tali a le Eteleno, e leaise kau fufu loa se nea.

⁵ Ti na lotou pati loa kia Selemia : Ke soko le Eteleno ko se tagata fakamaoki faitotonu mo agatonu kia matou, mo kapau e leaise motou fai a nea fuli ala e tuku atu loa e le Eteleno, lou Atua, kiate koe, ke fakasa mai kia matou !

⁶ Pe ko se nea e malie pe ko se nea e veli, e motou fakalogo loa ki le leo o le Eteleno, lomatou Atua, leia e motou kakau a koe ki ai, o tupu ke motou fiafia, mo kapau e motou fakalogo ki le leo o le Eteleno, lomatou Atua.

⁷ I le sili o aso e kau agafulu, na tuku loa le folafola a le Eteleno kia Selemia.

⁸ Ti na kalagai loa e Selemia a Sokanane, vosa o Kalease, mo kau pule solia fuli ala na nonofo mo ia, mo le kakai katoa, mei leia e ikiiki ki leia e lasi.

⁹ Ti na pati loa Selemia kia latou : E folafola le Eteleno, le Atua o Iselaele, leia na kotou kakau au ki ai, ke kau fakasoko kiate ia akoutou tagi :

¹⁰ Kapau e kotou nonofo i le fenua leinei, e kau fakanonofo oki loa koutou i ai, ti e leaise kau maumaui loa koutou, kae kau to loa koutou, ti e leaise kau toe taaki loa koutou ; talie kua kau fakasemala ki le veli leia na kau fai kia koutou.

¹¹ Aua na kotou i ki le sau o Papilone, leia e kotou i ki ai ; aua na kotou i kiate ia, e pati le Eteleno, talie e kau nofo mo koutou o fakamauli koutou ti mo saofaki koutou mei lona lima.

¹² E kau fakalotoi loa a ia ke alofa kia koutou, ti e alofa loa a ia kia koutou, ti e tuku loa e ia koutou ke nonofo i lokoutou fenua.

¹³ Kae kapau e leaise kotou fakalogo ki le leo o le Eteleno, lokoutou Atua,

¹⁴ Ti kapau e kotou pati loa : E leaise motou nonofo loa i le fenua leinei, kae motou ano loa ki le fenua o Esipito, leia e leaise motou tio ai loa ki se tau, leia e leaise motou logo ai loa ki le pupusi o le fakatagi pupusi, leia e motou maua tuumau ai loa le pane, ti ko le ganea lena e motou nonofo ai loa,

¹⁵ Ti kotou fakalogo ki le folafola a le Eteleno, toetoega o Suta ! E folafola le Eteleno o kau tau, le Atua o Iselaele, o pati : Kapau e mafuli loa okoutou mata ke ano ki Esipito, ti kapau e kotou ano loa o nonofo i ai,

¹⁶ Ko le seleta leia e kotou i ki ai e maua ia loa koutou i le fenua o Esipito, ti ko le oge leia e kotou i ki ai e pipiki loa kia koutou i Esipito, ti e kotou mamate loa i ai.

¹⁷ Ko latou fuli ala e mafuli loa olatou mata ke ano ki Esipito, o tupu ke lotou nonofo i ai, e mamate loa i le seleta, mo le oge, mo le taumasaki, ti e leaise sao loa se tasi pe sola loa i mua o malaia ala e kau tuku loa kia latou.

¹⁸ Talie e folafola le Eteleno o kau tau, le Atua o Iselaele : E kau liligi loa loku sausau kia koutou ofaipe laku liligi a ia ki le kakai o Selusalemi, mo kapau e kotou ano loa ki Esipito ; e kotou liliu loa ko se nea fakalialia, mo fakaii, mo fakatupu malaia, mo fakalumaluma, ti e leaise kotou toe tio loa ki le ganea leinei.

¹⁹ Toetoega o Suta, e pati atu le Eteleno kia koutou : Aua na kotou ano ki Esipito ! Ke kotou iloa e kau tapui kia koutou le nea lena i le aso nei.

²⁰ E kotou kakaai a koutou totonu, talie na kotou kakau au ki le Eteleno, lokoutou Atua, o pati : Faikole ki le Eteleno, lomatou Atua, o uiga mo matou ; fakasa mai kia matou a nea fuli ala e pati loa ki ai le Eteleno, lomatou Atua, ti e motou fai loa latou.

²¹ Kua kau fakasa atu a ia kia koutou i le aso nei ; kae e leaise kotou fakalogo ki le leo o le Eteleno, lokoutou Atua, mo nea fuli ala kua tuku mai e ia ke fakasa atu kia koutou.

²² Ke kotou iloa i le aso nei, e kotou mamate loa i le seleta, mo le oge, ti mo le taumasaki, i le ganea leia e kotou loto ke kotou ano o nonofo ai.