Selemia 41 - Tosi Tapu

Ko le tukipo o Ketalia

¹ I le masina fitu, na au loa Isemaele, vosa o Netania, vosa o Elisama, mei le famili sau, mo ni kau tagata lalasi a le sau, mo se kau tagata e tino agafulu, kia Ketalia, vosa o Asikame i Misipa. Ti na lotou kakai fakatasi loa i Misipa.

² Ti na tuu ake loa Isemaele, vosa o Netania mo le tino agafulu leia na au mo ia, o tamate ki le seleta a Ketalia, vosa o Asikame, vosa o Safani ; na tamate loa e Isemaele i Misipa leia na fakanofo e le sau o Papilone ko le kovana o le fenua.

³ Ti na tamate foki e Isemaele le kau Sutea katoa leia na nonofo mo Ketalia i Misipa, mo le kau Kaletea leia na nofo i ai, ko ni tagata tau.

⁴ I le sili o aso e lua ki le tamate o Ketalia, ti na leikiai se iloa a ia e se tasi,

⁵ Na kaku mai loa mei Siseme, mo Silo, mo Samalia ni kau tagata e toka valu ala kua tele olatou kaukava, ti kua masaesae olatou kofu, ti kua mavakuvaku olatou mata. Na lotou aumai loa ni moliga mo se iseso ke momoli i le fale o le Eteleno.

⁶ Ti na mavae loa a Isemaele, vosa o Netania, mei Misipa ki olatou mua ; na saele tagi a ia. I le felavei loa mo latou, na pati loa a ia kia latou : Kotou au kia Ketalia, vosa o Asikame.

⁷ Kae i lalatou kaku loa ki le loto kolo, na tamate loa latou e Isemaele, vosa o Netania, o laku ki le sosoni, e ia mo lana kau tagata leia na au mo ia.

⁸ Kae na i ai ni tagata e tino agafulu ia latou, na pati loa kia Isemaele : Aua na ke tamate matou, talie e i ai ni amatou tokonaki magiti kua fufu i faisaga : ko se fulumeto, mo se olese, mo se lolo, mo se meli. Ti na fakamauli loa latou e Isemaele, o leaise tamate loa e ia latou mo olatou fetaina.

⁹ Ko le sosoni, leia na laku ki ai e Isemaele a tagata ala na tamate e ia fakatasi mo Ketalia, na fau e le sau ko Asa, i lona i kia Paesa, sau o Iselaele ; ko le sosoni lena na fakaapele loa ki mate e Isemaele, vosa o Netania.

¹⁰ Na fakapilisoni loa e Isemaele latou fuli ala na toe i Misipa, a taineliki o le sau mo latou fuli o le kakai leia na nonofo i ai, latou ala na tuku e Nepusalatane, pule o tagata leo, kia Ketalia, vosa o Asikame. Ti na ave fakapopula loa latou e Isemaele, vosa o Netania, ti na ano loa a ia ki le kau Amone.

¹¹ Ti na iloa loa e Sokanane, vosa o Kalease, mo kau pule solia fuli ala na nonofo mo ia, le veli katoa leia kua fai e Isemaele, vosa o Netania.

¹² Ti na lotou too loa a tagata fuli, o lotou ano loa ke taui Isemaele, vosa o Netania. Na lotou maua loa a ia i tafa o vai lalasi o Kapaone.

¹³ I le tio a le kakai katoa leia na nofo mo Isemaele kia Sokanane, vosa o Kalease, mo kau pule solia fuli, na lotou fiafia loa ;

¹⁴ Ti maliu loa le kakai katoa leia na aumai fakapopula e Isemaele mei Misipa, o toe kau fakatasi mo Sokanane, vosa o Kalease.

¹⁵ Kae na sola loa Isemaele, vosa o Netania, mo ni tagata e toka valu i mua o Sokanane, o ano ki le kau Amone.

¹⁶ Ti na saofaki loa e Sokanane, vosa o Kalease, mo kau pule solia fuli ala na nonofo mo ia, le toetoega o le kakai mei lima o Isemaele, vosa o Netania, i le temi leia na aumai ai latou e ia mei Misipa, i le oki o lana tamate Ketalia, vosa o Asikame. Na toe aumai loa e Sokanane mei Kapaone a tagata tau, mo fafine, mo fanau, mo enuke.

¹⁷ Na lotou ano loa, ti na lotou manavanava loa i le fale talifanoga o Kimame, ofi ki Peteleemi, ti na lotou ano loa ki Esipito,

¹⁸ o mamao mei le kau Kaletea, ala na lotou i ki ai, o tupu ko le tamate e Isemaele, vosa o Netania, a Ketalia, vosa o Asikame, leia na fakanofo e le sau o Papilone ko le kovana o le fenua.