Selemia 40 - Tosi Tapu

Na nofo Selemia i Suta

¹ Na tuku loa le folafola a le Eteleno kia Selemia i le oki o lona kakau e Nepusalatane, pule o tagata leo mei Lama. I le temi leia na fakatotonu ai e Nepusalatane ke afa mai a ia, na saisai Selemia ki ni tini i loto malie o le kau popula katoa o Selusalemi mo Suta ala na ave ki Papilone.

² Na fakatotonu loa e le pule o tagata leo ke afa mai Selemia kiate ia, ti na pati loa a ia kiate ia : Na fakasa e le Eteleno, lou Atua, a malaia anei ki le ganea leinei.

³ Ti ko leinei, kua fakasoko e le Eteleno, ti kua fai o mulimuli ki ana folafola, ti kua soko a nea anei kia koutou o tupu kua kotou agasala ki le Eteleno, na leaise kotou fakalogo ki lona leo.

⁴ I le aso nei, e kau saofaki a koe mei tini ala e piki i ou lima ; kapau e ke fia ano mo au ki Papilone, ti e ke ano loa mo au, e kau taupau loa a koe ; ti kapau e leaise ke fia ano mo au ki Papilone, ti aua na ke au mo au ; tio, e tuu le fenua katoa i ou mua, ano ki le ganea leia e ke malie ia ti e ke fia ano ki ai.

⁵ I le tuvai o le tali a Selemia, na pati loa le pule kiate ia : Toe liliu kia Ketalia, vosa o Asikame, vosa o Safani, leia kua fakanofo e le sau o Papilone ke pule ki kolo o Suta, o nofo mo ia mo le kakai, ti kapau e leai, ano ki le ganea leia e malie kiate koe. Ti na soli loa e Nepusalatane kia Selemia ni nea kai mo ni nea alofa, ti na kakau loa e ia a ia ke ano.

⁶ Ti na ano loa Selemia kia Ketalia, vosa o Asikame, i Misipa, ti na nofo loa a ia mo Ketalia mo le kakai leia na nofo i le fenua.

Ketalia, kovana o Suta

⁷ I le maua e kau pule solia fuli ala na nonofo i kolo vao, e latou mo alatou kau solia, le logo leia kua fakanofo e le sau o Papilone a Ketalia, vosa o Asikame, ko le kovana o le fenua, ti kua tuku e le sau kiate ia a tagata, mo fafine, mo fanau, mo le kau mativa o le fenua, ala na leaise ave popula ki Papilone,

⁸ Na lotou ano loa kia Ketalia i Misipa, mo Isemaele, vosa o Netania, mo Sokanane, mo Sonatane, vosa o Kalease, mo Selasa, vosa o Tanumete, mo vosa o Efai mei Netofa, mo Sesania, vosa o se tagata Maaka, latou mo alatou kakai.

⁹ Ti na fakapapau loa Ketalia, vosa o Asikame, vosa o Safani, kia latou mo alatou kakai, o pati : Aua na kotou i ki le tausi ki le kau Kaletea ; kotou nonofo i le fenua, ti kotou tausi le sau o Papilone, ti e kotou malie loa i ai !

¹⁰ Ko leinei, e kau nofo i Misipa, o fakafofoga koutou i mua o le kau Kaletea ala e au loa kia tatou ; kae ko koutou, kotou fai le tanaki o le vino, mo fuai laakau o le temi vevela, mo le lolo ; kotou tanaki latou ki ni fagu, ti kotou nonofo i okoutou kolo, ala kua kotou nonofo ai.

¹¹ Na logo loa le kau Sutea katoa, leia na nofo i le fenua o Moape, mo le fenua o le kau Amone, mo le fenua o Etome, mo fenua fuli, kua tuku e le sau o Papilone se ga toetoega i Suta, ti kua fakanofo e ia Ketalia, vosa o Asikame, vosa o Safani, ke pule kia latou.

¹² Ti na toe liliu mai loa le kau Sutea katoa mei ganea fuli ala na lotou mavetevete ai, o lotou au loa ki le fenua o Suta, kia Ketalia i Misipa, ti na lotou fai loa se tanaki lasi o le vino mo fuai laakau o le temi vevela.

¹³ Ti na au loa Sokanane, vosa o Kalease, mo kau pule fuli o kau tau ala na nonofo i kolo vao kia Ketalia i Misipa.

¹⁴ Ti na lotou pati loa kiate ia : Pe ke iloa kua fakatotonu e Paalise, sau o le kau Amone, kia Isemaele, vosa o Netania, ke tamate a koe ? Kae na leaise tui Ketalia, vosa o Asikame, kia latou.

¹⁵ Ti na pati fakafufu loa Sokanane, vosa o Kalease, kia Ketalia i Misipa : Fakataga mai ke kau ano o tamate Isemaele, vosa o Netania. E leaise iloa loa a ia e se tasi. Kolea e tamate ai loa e ia a koe ? Kolea e mavetevete ai loa latou fuli o Suta ala kua fakatasi mai kiate koe ? ti kolea e mate ai loa le toetoega o Suta ?

¹⁶ Ti na tali loa Ketalia, vosa o Asikame, kia Sokanane, vosa o Kalease : Aua na ke fai le nea lena ; talie e sala le nea leia e ke pati ki ai o uiga mo Isemaele.