Selemia 4 - Tosi Tapu

Fakasa o le tautea

¹ Iselaele, kapau e ke tafoki mai, kapau e ke tafoki mai kiate au, e pati le Eteleno, Kapau e ke too au nea fakalialia i oku mua, E leaise ke toe sese loa.

² Kapau e ke fakapapau : E mauli le Eteleno ! I le maoki, mo le loto sako ti mo le faitotonu, Ti e tapuakina loa a atu puleaga iate ia, Ti e lotou fakakololia loa iate ia.

³ Talie e folafola le Eteleno ki tagata o Suta mo Selusalemi, o pati : Kotou faala kia koutou se faisaga foou ; Ti aua na kotou muluki i laakau talatala.

⁴ Kotou silikosisio koutou ki le Eteleno, kotou silikosisio okoutou loto, Tagata o Suta ti mo le kakai o Selusalemi, O tupu ke aua na natu kia koutou loku sausau ofaipe se afi, Ti ke aua na vela a ia, kae e leaise feala ke toe tamate, O tupu ko le veli o akoutou gaoi.

Le ulu ki Iselaele o se fenua matapule

⁵ Kotou fakasa i Suta, kotou kalaga i Selusalemi, Ti kotou pati : Kotou pupusi le fakatagi pupusi i le fenua ! Kotou kalaga i le makeke katoa, ti kotou pati : Kotou fakamaopo mai, ti ke tou ano ki kolo tau !

⁶ Kotou toso se manumanu o fakaagaaga ki Sione ; Kotou sosola, aua na kotou toe tutuu ! Talie e kau kakau loa mei le potu noleto le malaia Ti mo se maumau lasi.

⁷ E sopo le laione mei lona ulu vao, Ko leia e maumau ia a atu puleaga e saele, kua mavae a ia i lona nofoaga, Ke maumaui lou fenua. E maumaui loa ou kolo, e leaise toe nofo loa se tasi i ai.

⁸ Koia ke kotou tui ni taga, ke kotou tagi ti ke kotou tagi laulau, Talie e leaise toe maliu loa le sausau kaka o le Eteleno ia tatou.

⁹ I le aso lena, e pati le Eteleno, E puli loa le loto makeke o le sau mo le kau pule, E ofolele loa le kau faisakilifisio, Ti e mamae loa le kau polofeta.

¹⁰ E kau pati : Ei Aliki Eteleno ! Na ke kakaai maoki le kakai leinei mo Selusalemi, o pati : E kotou maua loa le tokamalie ! Ka ko leinei kua siki le seleta ki lolatou mauli.

¹¹ I le aso lena, e pati loa ki le kakai leinei mo Selusalemi : E agi se matagi vevela mei potu taualuga o le toafa Ki le ala o le taine o loku kakai, Ti e leaise ko se matagi maamaa ke tu ia mo fakamea ia le fulumeto.

¹² Kae ko se matagi makeke leia e au mei ai kiate au. I le aso nei, e kau tuku loa kia latou lolatou tua.

¹³ Ko leinei e saele mai le tagata maumau ofaipe ni ao ; E fai ana saliote pe se asesio, E gasolo ake ana osi i akuila. Malaia kia tatou, talie kua maumaui tatou !

¹⁴ Selusalemi, fakamea lou loto i le veli, O tupu ke fakamauli a koe ! E kaku loa kiafea lau taofi i lou loto au manatu veveli ?

¹⁵ Talie e malaga se leo i Tane o fakasa le malaia, Ti e kamata fakasa e ia i le mauga o Efalaimi.

¹⁶ Kotou fakasa a ia ki atu puleaga, kotou fakasa a ia ki Selusalemi : E au se kau tau mei se fenua mamao ; E lotou kalaga ki kolo o Suta.

¹⁷ E lotou takatakai Selusalemi ofaipe latou ala e taupau ia se faisaga, O tupu na agatuu a ia kiate au, e pati le Eteleno.

¹⁸ Ko le fua lena o ou ala mo au gaoi, Ko le fua lena o lou agaveli ; E maoki e kona le nea lena, e ulu a ia o kaku ki lou mafu.

¹⁹ Oi loku manava, oi loku manava ! E kau mamae i loku mafu. Kua ta vave loku mafu, e leaise koi mafai laku fakalologo ; O tupu kua ke logo, ei loku laumalie, ki le pupusi o le fakatagi, Ki le kalaga o le tau.

²⁰ E fakasa le malaia ki le malaia, Talie kua maumaui le fenua katoa ; Kua maumaui fakafokifa oku falela, Mo oku puipui i se temi e tasi.

²¹ E kaku loa kiafea laku tio ki le manumanu tau, Ti mo laku logo ki le leo o le fakatagi pupusi ?

²² Kua valea maoki loku kakai, e leaise iloa e ia au ; Ko ni fanau valelea mo sala atamai latou ; E lotou popoto i le fai o le veli, Kae e leaise lotou iloa le fai o le malie.

²³ E kau tio ki le malama nei, ti ko leinei, kua maveuveu a ia mo lavaki, Ki atu lagi, ti kua puli lolatou malama.

²⁴ E kau tio ki atu mauga, ti ko leinei, kua lotou lulu ; Ti kua sisiga a mauga liliki fuli.

²⁵ E kau tio, ti ko leinei, e leaise koi i ai se tagata ; Ti kua sosola a manu lele fuli o le lagi.

²⁶ E kau tio, ti ko leinei, kua toafa le Kalemelo ; Ti kua maumaui ona kolo fuli, i mua o le Eteleno, I mua o lona sausau kaka.

²⁷ Talie e folafola le Eteleno, o pati : E maumaui loa le fenua katoa ; Kae e leaise kau fai loa se maumau katoa.

²⁸ O tupu ko le nea lena, e mamae loa le fenua, Ti e fakapouli loa a atu lagi i aluga ; Talie na kau fakasa a ia, na kau fakapapau a ia, Ti e leaise kau toe fakasemala i ai, E leaise kau toe liliu loa ki muli.

²⁹ I le patatu o le kau ekeosi mo le kau faikalolo, e sosola a kolo fuli ; E ulu ki ulu vao, e kava i utu ; Kua tiaki a kolo fuli, e leaise koi nofo i ai se tasi.

³⁰ Ti ko koe, leia na maumaui, kolea loa ka ke fai ? E ke teu kula loa, e ke tui loa ni nea fakateuteu aulo, E ke pena loa ou mata ki vali ; Kae e leaise aoga fua o lou fakafulumalie, Talie e vesia au feauaki kiate koe, E lotou loto ki lou mauli.

³¹ Talie e kau logo ki ni tagi ofaipe ni tagi i le mamae a se fafine e lolotoga gaoi, Ni tagi o le mamae ofaipe se uluaki fanau. Ko le leo o le taine o Sione ; e tukumanava a ia, e siki e ia ona lima, O pati : Malaia kiate au ! E gaegae loku laumalie o tupu ko le kau tukipo !