Selemia 38 - Tosi Tapu

Ko Selemia i le sosoni

¹ Na logo loa a Sefatia, vosa o Matane, mo Ketalia, vosa o Pasule, mo Sukale, vosa o Selemia, mo Pasule, vosa o Malekisa, ki folafola ala na fakasa e Selemia ki le kakai katoa, o pati :

² E folafola le Eteleno, o pati : Ko leia e nofo loa i le kolo leinei e mate loa i le seleta, mo le oge, mo le taumasaki ; kae ko leia e mavae loa o ano ki le kau Kaletea e saofaki loa e ia lona mauli ; ti ko lona totogi ko lona mauli, io, e mauli loa a ia.

³ E folafola le Eteleno, o pati : E tuku loa le kolo leinei ki le solia a le sau o Papilone, leia e maua ia loa a ia.

⁴ Ti na pati loa le kau pule ki le sau : E tonu ke tamate le tagata leinei ! O tupu e fakalotogaegae e ia a tagata tau ala koi toe i le kolo leinei, mo le kakai katoa, i lana fai kia latou a tau masau ana ; e leaise afa e le tagata leinei le malie o le kakai, kae e loto a ia ki lona malaia.

⁵ Ti na tali loa le sau ko Setesiasi : Ko leinei kua tuku atu a ia ki okoutou lima ; talie e leaise mafai e le sau se nea kia koutou.

⁶ Koia na lotou too loa Selemia, o ti ki loto o le sosoni a Malekisa, vosa o le sau, leia na tuu i le malae o le fale pilisoni ; na lotou fakaifo loa Selemia ki ni maea. Na leaise i ai se vai i le sosoni, kae na i ai se pela ; ti na ogo loa Selemia i le pela.

⁷ Na logo loa Epeti-Meleke, tagata Etiopia, enuke leia na nofo i le fale o le sau, kua tuku Selemia ki le sosoni. Na tonatona loa le sau i le matapa o Pesamino.

⁸ Ti na ulu mai loa Epeti-Meleke mei le fale o le sau, o masau ki le sau, o pati :

⁹ Ei sau, loku aliki, e veli le nea leia kua fai e kau tagata anei kia Selemia, le polofeta, o lotou ti a ia ki le sosoni ; e mate loa a ia i ai i le fia kai, talie e leaise koi i ai se pane i le kolo.

¹⁰ Ti na tuku loa e le sau le fakatotonu leinei kia Epeti-Meleke, le tagata Etiopia : Too i leinei, ni kau tagata e tino tolu, ke ano mo koe o toso ake mei le sosoni, Selemia, le polofeta, i mua o lona mate.

¹¹ Na too loa e Epeti-Meleke ni kau tagata, o ano mo ia ki le fale o le sau, i se ganea i lalo o le fale koloa ; ti na too loa e ia mei ai ni kofu mago ti kua masaesae, o fakaifo latou kia Selemia i le sosoni, mo ni maea.

¹² Ti na pati loa Epeti-Meleke, le tagata Etiopia, kia Selemia : Fakapiki a kofu masaesae ana ki ou afiga mo maea. Ti na fai loa ki ai a Selemia.

¹³ Ti na lotou toso ake loa Selemia ki maea, ti na lotou paleaki ake aia i le sosoni ki tafa. Ti na nofo loa Selemia i le malae o le fale pilisoni.

Ko le felogoi a Selemia mo Setesiasi

¹⁴ Na kakau loa e le sau ko Setesiasi ke afa ake kiate ia Selemia, le polofeta, ti na taki ake loa a ia kiate ia i le uluaga lasi o le fale o le Eteleno. Ti na pati loa le sau kia Selemia : E i ai se nea leia e kau fia kole atu kiate koe : Aua na ke fufu mai kiate au se nea.

¹⁵ Ti na tali loa Selemia kia Setesiasi : Kapau e kau fakasa atu loa a ia kiate koe, pe leaise ke tamate loa au ? Ti kapau e kau soli loa se tokoi kiate koe, e leaise ke fakalogo loa kiate au.

¹⁶ Ti na fakapapau fakafufu loa le sau ko Setesiasi kia Selemia, o pati : E mauli le Eteleno, leia kua soli ia kia tatou le mauli ! E leaise kau tamate loa a koe, ti e leaise kau tuku loa a koe ki lima o kau tagata anei ala e loto ki lou mauli.

¹⁷ Ti na pati loa Selemia kia Setesiasi : E folafola le Eteleno, le Atua o kau tau, le Atua o Iselaele, o pati : Kapau e ke ano loa ki le kau pule a le sau o Papilone, e ke mauli loa, ti e leaise tutu loa le kolo leinei ; io, e ke mauli loa, a koe mo lou fale.

¹⁸ Ti kapau e leaise ke ano loa ki pule a le sau o Papilone, e tuku loa le kolo leinei ki lima o le kau Kaletea, ti e lotou tutu loa a ia ki le afi ; ti ko koe, e leaise ke sao loa mei olatou lima.

¹⁹ Ti na pati loa le sau ko Setesiasi kia Selemia : E kau i ki le kau Sutea ala kua sosola ki le kau Papilone ; talie na lotou tuku au ki olatou lima, ti ke lotou gologolo kiate au.

²⁰ Ti na tali loa Selemia : E leaise tuku loa a koe kia latou. Fakalogo ki le leo o le Eteleno i le nea leinei kua kau fakasa kiate koe ; e ke maua loa i ai le malie, ti e ke mauli loa.

²¹ Kae kapau e ke fakafiti ke mavae, ti ko leinei le nea leia kua fakasa mai e le Eteleno kiate au :

²² E ave loa a fafine fuli ala na toe i le fale o le sau o Suta ki le kau pule a le sau o Papilone, ti e lotou pati loa : Na kakaai a koe, ti na pulei a koe e latou ala na fakasa ia kiate koe le tokamalie ; ti ko leinei kua ogo ou vae i le pela, kua lotou sosola.

²³ E taki loa au avaga fuli mo au fanau ki le kau Kaletea ; ti ko koe, e leaise ke sao loa mei olatou lima, e too loa a koe e le lima o le sau o Papilone, ti e tutu loa le kolo leinei e le afi.

²⁴ Ti na pati loa Setesiasi kia Selemia : Ke aua na iloa e se tasi a masau anei, ti e ke mauli loa.

²⁵ Kapau e iloa loa e le kau pule na kau masau mo koe, ti kapau e lotou natu loa, o pati atu kiate koe : Fakamatala mai kia matou le nea leia na ke fakasa ki le sau, ti mo le nea leia na pati atu le sau ki ai, aua na ke fufu se nea kia matou, ti e leaise motou tamate loa a koe,

²⁶ E ke tali loa kia latou : Na kau kole ki le sau ke aua na kau toe liliu ki le fale o Sonatane, talie ke aua na kau mate i ai.

²⁷ Ti na au loa a kau pule fuli kia Selemia, o fakavesilii a ia. Ti na tali loa Selemia kia latou o mulimuli katoa ki le nea leia na fakatotonu ake e le sau kiate ia. Ti na lotou tuku loa a ia, talie na leaise logo se tasi ki nea ala na masau ki ai le sau mo Selemia.

²⁸ Ti na nofo loa Selemia i le malae o le fale pilisoni o kaku ki le aso leia na too ai Selusalemi.