Selemia 37 - Tosi Tapu

Fakasa o le toe liliu o le kau Kaletea

¹ Na sau loa Setesiasi, vosa o Sosiasi, o fetogi Sekonia, vosa o Sosakimi, ti na fakanofo loa a ia ke sau i le fenua o Suta e Nepukatenesale, sau o Papilone.

² Kae na leaise fakalogo loa a ia, mo ana tagata fakasausau, mo le kakai katoa o le fenua, ki folafola a le Eteleno ala kua fakasa e le polofeta ko Selemia.

³ Na kakau loa e le sau ko Setesiasi a Sukale, vosa o Selemia, mo Sofoni, vosa o Maasesa, le tagata faisakilifisio, ke ano o pati kia Selemia, le polofeta : Ulufaki matou ki le Eteleno, lotatou Atua.

⁴ I le temi lena na ano ti au Selemia i le kakai ; na leikiaise tuku a ia ki le pilisoni.

⁵ Na mavae loa le solia a Falaone mei Esipito ; ti na logo loa ki ai le kau Kaletea ala na takatakai ia Selusalemi, ti na lotou mavae loa mei Selusalemi.

⁶ Ti na tuku loa le folafola a le Eteleno kia Selemia, le polofeta, o pati :

⁷ E folafola le Eteleno, le Atua o Iselaele, o pati : E kotou pati loa ki le sau o Suta leia na kakau ia mai koutou ke au o afa loku finegalo : Ko le solia leia a Falaone na au ke saofaki koutou, kua toe liliu ki lona fenua i Esipito ;

⁸ Ti e toe liliu mai loa le kau Kaletea, o taui loa le kolo leinei, ti e lotou maua loa a ia, ti e lotou tutu loa a ia ki le afi.

⁹ E folafola le Eteleno, o pati : Aua na kotou moe miti, o pati : Kua ano le kau Kaletea o mamao meia tatou !

¹⁰ Ti kapau foki e kotou tamate loa le solia katoa a le kau Kaletea leia e tau kia koutou, ti kapau foki e toe loa ia latou ni kau lavelavea ata, e lotou toe tutuu ake loa o taki toka tasi mei lona falela, ti e lotou tutu loa le kolo leinei ki le afi.

Ko Selemia i le pilisoni

¹¹ I le temi na fakamamao ai le kau Kaletea mei Selusalemi, o tupu ko le solia a Falaone,

¹² Na loto Selemia ke mavae mei Selusalemi, o ano ki le fenua o Pesamino, o sola mei le kakai.

¹³ I lana kaku ki le matapa o Pesamino, na i ai se tagata pule o le kau leo, leia na igoa ko Sileisa, vosa o Selemia, vosa o Anania ; ti na na taofi loa e ia le polofeta ko Selemia, o pati kiate ia : E ke sola ki le kau Kaletea !

¹⁴ Na tali loa Selemia : E sala ! E leaise kau sola ki le kau Kaletea. Kae na leaise fia fakalogo Sileisa kiate ia ; ti na too loa e ia Selemia, o taki ki mua o le kau pule.

¹⁵ Na itaita loa le kau pule kia Selemia ti na lotou lalava a ia, o velo ki le pilisoni, i le fale o Sonatane, le sekalaipe ; talie kua lotou fakaliliu lona fale ko se fale pilisoni.

¹⁶ Na ulu loa i ai Selemia ki se ana i le pilisoni, ti na nofo fualoa ai a ia i ai.

¹⁷ Na kakau loa e le sau ko Setesiasi ke afa mai Selemia kiate ia, ti na fakavelii fakafufu loa a ia e le sau i lona fale, o pati : Pe i ai se folafola mei le Eteleno ? Na tali loa Selemia : E io. Ti na toe pati loa a ia : E tuku loa a koe ki lima o le sau o Papilone.

¹⁸ Na toe pati loa Selemia ki le sau ko Setesiasi : Kolea laku nea leia kua sala kiate koe, mo au tagata fakasausau mo le kakai leinei, ke kotou tuku ai au ki le pilisoni ?

¹⁹ Ti kofea okoutou kau polofeta ala na folafola atu kia koutou, o pati : E leaise pale mai loa le sau o Papilone o taui koutou mo le fenua ?

²⁰ Ko leinei, e kau kole atu kiate koe, ei loku aliki sau : tali malie laku kole i ou mua ! Aua na ke toe fakaliliu au ki le fale o Sonatane, le sekalaipe, talie ke aua na kau mate loa i ai !

²¹ Ti na fakatotonu loa e le sau ko Setesiasi ke ave Selemia ki le malae o le fale pilisoni, ti ke soli kiate ia i aso taki tasi se fa pane e tasi mei le ala o le kau tao pane, o kaku ki le oki o le pane i le kolo. Ti na nofo loa Selemia i le malae o le fale pilisoni.