Selemia 36 - Tosi Tapu

Ko le tutu e Sosakimi o le tosi a Selemia

¹ I le fetuu fa o Sosakimi, sau o Suta, vosa o Sosiasi, na tuku loa le folafola a le Eteleno kia Selemia, o pati :

² Too se tosi, o tosi i ai a folafola fuli ala kua kau tuku atu kiate koe o uiga mo Iselaele, mo Suta, mo puleaga fuli, mei le aso leia na kau kamata masau ai kiate koe, i le sau o Sosiasi o kaku mai ki le aso nei.

³ I le aso leia e logo ai loa le fale o Suta ki le veli katoa leia e kau manatu ke fai kiate ia, e lagi lotou toe liliu taki toka tasi mai loa mei lona ala veli ; ti e kau fakamolemole loa ki alatou agaveli mo alatou agasala.

⁴ Na kalagai loa e Selemia a Paluke, vosa o Nelisa : ti na tosi loa e Paluke i se tosi, i le sua a Selemia, a folafola fuli ala na fakasa e le Eteleno kia Selemia.

⁵ Ti oki, na tuku loa e Selemia le fakatotonu leinei kia Paluke : E kau nofo popula, e leaise mafai ke kau ano ki le fale o le Eteleno.

⁶ E ke ano loa, a koe totonu, ti e ke lau loa i le tosi leia kua ke tosi i laku sua a folafola a le Eteleno ki taliga o le kakai, i le fale o le Eteleno, i le aso o le sesunio ; ti e ke toe lau foki latou ki taliga o latou fuli o Suta, ala e au loa mei olatou kolo.

⁷ E lagi logo loa le Eteleno ki alatou kolekole, ti e lagi tasi tafoki mai loa le tagata mei lona ala veli ; talie kua lasi ai le ita mo le sausau o le Eteleno leia ka to ki le kakai leinei.

⁸ Ti na fai loa e Paluke, vosa o Nelisa, a nea fuli ala na fakatotonu e Selemia, le polofeta, kiate ia, ti na lau loa e ia i le tosi a folafola a le Eteleno, i le fale o le Eteleno.

⁹ I le fetuu lima o le sau o Sosakimi, vosa o Sosiasi, sau o Suta, i le masina iva, na fakatotonu loa se sesunio i mua o le Eteleno ki le kakai katoa o Selusalemi mo le kakai katoa leia na au mei kolo o Suta ki Selusalemi.

¹⁰ Ti na lau loa e Paluke i le tosi a folafola fuli a Selemia, ki taliga o le kakai katoa, i le fale o le Eteleno, i le kogafale o Kemalia, vosa o Safani, le sekalaipe, i le malae lasi, i le uluaga o le matapa foou o le fale o le Eteleno.

¹¹ I le logo a Mikea, vosa o Kemalia, vosa o Safane, ki folafola fuli a le Eteleno i le tosi,

¹² na ifo loa a ia ki le fale o le sau, i le kogafale o le sekalaipe, leia na nonofo ai a kau pule fuli, ko Elisama, le sekalaipe, mo Telasa, vosa o Semaesa, mo Elenatane, vosa o Akepole, mo Kemalia, vosa o Safani, mo Setesiasi, vosa o Anania, ti mo la ake kau pule fuli.

¹³ Ti na fakamatala loa e Mikea kia latou a folafola fuli ala na logo a ia ki ai, i le temi leia na lau ai e Paluke le tosi ki taliga o le kakai.

¹⁴ Ti na kakau loa e kau pule fuli a Seutese, vosa o Netania, vosa o Selemia, vosa o Kusi, ke ano o pati kia Paluke : Too lima le tosi leia na ke lau ki taliga o le kakai, ti ke au ! Ti na too loa e Paluke, vosa o Nelisa, le tosi o ano kia latou.

¹⁵ Na lotou pati loa kiate ia : Nofo ki lalo, ti ke lau mai le tosi ke motou logo ki ai. Ti na lau loa e Paluke le tosi ki olatou taliga.

¹⁶ I le oki o lalatou logo ki folafola fuli, na lotou fetioaki loa i lolatou i, ti na lotou pati loa kia Paluke : E motou fakamatala loa ki le sau a folafola fuli anei.

¹⁷ Na lotou toe fai foki kia Paluke le vesili leinei : Fakasa mai pe na feaki lau tosi a folafola fuli anei kae lau e ia.

¹⁸ Na tali loa Paluke kia latou : Na sua gutu mai e ia a folafola fuli anei kiate au, ti na kau tosi latou i le tosi leinei ki le vaitosi.

¹⁹ Na pati loa le kau pule kia Paluke : Ano, o mumuni, a koe mo Selemia, ti ke aua na iloa e se tasi le ganea leia e kolua nonofo ai.

²⁰ Na lotou ano loa ki le sau i le malae, kae lotou tuku le tosi i le kogafale o le sekalaipe ko Elisama, ti na lotou fakamatala loa a folafola fuli ki le sau.

²¹ Ti na kakau loa e le sau Seutese ke ano o aumai le tosi ; na too loa e Seutese le tosi mei le kogafale o Elisama, le sekalaipe, ti na lau loa e ia ki taliga o le sau mo pule fuli ala na nonofo i tafa o le sau.

²² Na tonatona le sau i le fale o le temi momoko, ko le iva masina lena, ti na kaka se afi i ona mua.

²³ I le oki o le lau e Seutese o pasina e tolu pe fa, na tuuti loa e le sau le tosi ki le ga sele a le sekalaipe, o ti a ia ki le afi, o okioki i ai.

²⁴ Na leaise i loa le sau mo ana tagata fakasausau fuli ala na logo ki folafola fuli ana, ti na leaise lotou sae loa olatou kofu.

²⁵ Kae na kolekole loa e Elenatane, mo Telasa, mo Kemalia, ki le sau ke aua na tutu le tosi, kae na leaise fakalogo le sau kia latou.

²⁶ Kae na fakatotonu loa e le sau kia Selasemeele, ko se tasi i le famili sau, mo Selasa, vosa o Aseliele, mo Selemia, vosa o Apeteele, ke lotou too Paluke, le sekalaipe, mo Selemia, le polofeta. Kae na fufu loa laua e le Eteleno.

²⁷ Na folafola loa le Eteleno kia Selemia, i le oki o le tutu e le sau o le tosi, leia na tosi ai e Paluke a folafola ala na sua ake e Selemia, o pati :

²⁸ Too se tasi ake a tosi, ti e ke tosi loa i ai a folafola fuli ala na tuu i le uluaki tosi leia na tutu e Sosakimi, sau o Suta.

²⁹ Ti e ke fakasa loa le nea leinei o uiga mo Sosakimi, sau o Suta : E folafola le Eteleno, o pati : Na ke tutu le tosi lena, o pati : Kolea na ke tosi ai a folafola anei : E au loa le sau o Papilone, o maumaui le fenua leinei, ti e tamate loa e ia a tagata mo manu ?

³⁰ Koia e folafola le Eteleno kia Sosakimi, sau o Suta, o pati : E leaise eke loa se tasi i lou sakoga i le ekeekeaga fakasau o Tavite, ti e tiaki loa le tino o Sosakimi ki le vevela o le ao mo le momoko o le pouli.

³¹ E kau tautea loa a ia mo lona sakoga, mo ana kau tagata fakasausau, o tupu ko alatou agaveli, ti e kau aumai loa kia latou, mo le kakai o Selusalemi, mo tagata o Suta, a malaia fuli ala kua kau fakasa kia latou, kae na leaise lotou fia fakalogo kiate au.

³² Ti na too loa e Selemia se tasi ake a tosi, o soli kia Paluke, le sekalaipe, vosa o Nelisa. Ti na tosi loa i ai e Paluke, i le lau a Selemia, a folafola fuli o le tosi leia na tutu e Sosakimi, sau o Suta. Ti na toe fakalasi e ia a ia ki ni iki ake folafola tatau.