Selemia 35 - Tosi Tapu

Ko le sakoga o Lekape

¹ Na folafola loa le Eteleno kia Selemia, i le temi o Sosakimi, vosa o Sosiasi, sau o Suta, o pati :

² Ano ki le fale o le kau Lekape, o masau kia latou ; e ke taki loa latou ki le fale o le Eteleno, ki se kogafale, ti e ke soli loa kia latou se vino ke inu.

³ Na kau too loa Saasania, vosa o Selemia, vosa o Apasinia, mo ona fetaina, mo ona vosa fuli, mo le fale katoa o le kau Lekape,

⁴ Ti na kau taki loa latou ki le fale o le Eteleno, ki le kogafale o vosa o Anane, vosa o Siketalia, le tagata a le Atua, i tafa o le kogafale o le kau pule, i aluga o le kogafale o Maasesa, vosa o Salume, le tagata leo o le uluaga o le fale tapu.

⁵ Na kau tuku loa ki mua o le fale o le kau Lekape ni fa ipu lalasi kua apelepele i le vino mo ni ga ipu liliki, ti na kau pati loa kia latou : Kotou inu le vino !

⁶ Kae na lotou tali : E leaise motou inu vino ; talie kua tuku mai kia matou e Sonatape, lomatou tamana, vosa o Lekape, le fakatotonu leinei : Aua na kotou inu loa ki se vino, koutou mo okoutou vosa ;

⁷ Ti aua na kotou fakatuu loa ni fale, ti aua na kotou muluki loa se fakaili e tasi, ti aua na kotou to loa se faisaga vite, ti aua na kotou maua loa se faisaga vite ; kae kotou nonofo loa i ni falela, i lokoutou mauli katoa, o tupu ke kotou mauli fualoa i le fenua leia e kotou nofo matapule ai.

⁸ E motou fakalogo ki nea fuli ala na fakatotonu mai e Sonatape, lomatou tamana, vosa o Lekape : e leaise motou inu ki le vino i lomatou mauli katoa, matou, mo amatou avaga, mo omatou vosa ti mo omatou taineliki ;

⁹ Ti e leaise motou fakatuu ni fale ke motou nonofo ai, ti e leaise motou maua ni faisaga vite, pe ko ni faisaga, pe ko ni kele kua to pulapula.

¹⁰ Ti e motou nonofo i ni falela, ti e motou mulimuli mo fai a nea fuli ala na fakatotonu mai e Sonatape, lomatou tamana.

¹¹ I le temi leia na pale mai ai Nepukatenesale, sau o Papilone, o taui le fenua leinei, na motou pati : Tou ano, tou mavae o ano ki Selusalemi, o mamao mei le solia a le kau Kaletea, mo le solia a le kau Silia. Ko le tupuaga lena o lomatou nonofo i Selusalemi nei.

¹² Koia na tuku loa le folafola a le Eteleno kia Selemia, o pati :

¹³ E folafola le Eteleno o kau tau, le Atua o Iselaele : Ano, o pati ki tagata o Suta mo le kakai o Selusalemi : Pe e leaise kotou ako la le fakalogo ki aku folafola ? E pati le Eteleno.

¹⁴ Na lotou fakalogo loa ki masau a Sonatape, vosa o Lekape, leia na fakatotonu ki ona vosa ke aua na lotou inu ki le vino, ti na leaise lotou inu ki ai o kaku mai ki le aso nei, talie na lotou fakalogo ki le fakatotonu a lolatou tamana. Ti ko au, na kau masau kia koutou, na kau masau kia koutou koi usu, kae na leaise kotou fakalogo mai kiate au.

¹⁵ Na kau kakau atu kia koutou aku tagata fakasausau fuli, le kau polofeta, na kau kakau atu latou koi usu, o pati kia koutou : Kotou tasi toe liliu mai mei lona ala veli, kotou fai akoutou gaoi ke malilie, aua na kotou ano o tausi ki ni iki ake atua kese, o tupu ke kotou nonofo loa i le fenua leia kua kau soli kia koutou mo okoutou tamana. Kae na leaise tokaga mai okoutou taliga, ti na leaise kotou fakalogo mai kiate au.

¹⁶ Io, kua taupau e vosa o Sonatape, vosa o Lekape, a fakatotonu ala na tuku e lolatou tamana kia latou, kae e leaise fakalogo le kakai leinei kiate au !

¹⁷ Koia e folafola le Eteleno, le Atua o kau tau, le Atua o Iselaele, o pati : Ko leinei, e kau kakau mai loa ki Suta mo le kakai katoa o Selusalemi a malaia fuli ala kua kau fakasa kia latou, talie kua kau masau kia latou kae na leaise lotou fakalogo, ti kua kau kalaga kia latou kae na leaise lotou tali.

¹⁸ Ti na pati loa Selemia ki le fale o le kau Lekape : E folafola le Eteleno o kau tau, le Atua o Iselaele : O tupu kua kotou fakalogo ki fakatotonu a Sonatape, lokoutou tamana, o tupu kua kotou tausi ana lao fuli, ti mo fai a nea fuli ala kua tuku atu e ia kia koutou ;

¹⁹ o tupu ko le nea lena, e folafola le Eteleno o kau tau, le Atua o Iselaele, o pati : E leaise mativa loa Sonatape, vosa o Lekape, i se tagata ke tuu i oku mua, o lee gato.