Selemia 34 - Tosi Tapu

Ikuaga o Setesiasi

¹ Na folafola loa le Eteleno kia Selemia, o pati, i le temi leia na fai ai le tau ki Selusalemi mo kolo fuli ala na fakalogo kiate ia, e Nepukatenesale, sau o Papilone, mo lana solia katoa, mo puleaga fuli ala na fakalogo kiate ia, mo kakai fuli.

² E folafola le Eteleno, le Atua o Iselaele, o pati : Ano, o pati kia Setesiasi, sau o Suta, pati kiate ia : E folafola le Eteleno, o pati : Ko leinei, e kau tuku le kolo leinei ki lima o le sau o Papilone, ti e tutu loa e ia a ia ki le afi.

³ Ti ko koe, e leaise ke sao loa i ona lima, kae e too loa a koe o tuku ki ona lima, ti e tio loa ou mata ki mata o le sau o Papilone, ti e masau totonu loa a ia kiate koe, ti e ke ano loa ki Papilone.

⁴ Koleia fuai, fakalogo mai ki le folafola a le Eteleno, Setesiasi, sau o Suta ! Ko leinei le masau a le Eteleno kiate koe : E leaise ke mate loa i le seleta.

⁵ E ke mate loa i le tokamalie ; ti e tutu loa ni kaloni kiate koe ofaipe lona tutu ki ou tamana, a sau afea ala na mua iate koe, ti e tagi loa kiate koe, o pati : Oiau aliki ! Ko au leia kua fakasa ia le folafola leinei, e pati le Eteleno.

⁶ Ti na fakasa loa e le polofeta ko Selemia a folafola fuli ana kia Setesiasi, sau o Suta i Selusalemi.

⁷ Ti na taui loa e le kau tau a le sau o Papilone a Selusalemi, mo la ake a kolo o Suta, ko Lakisi mo Aseka, talie ko ni kolo tau latou, ala na toe i kolo o Suta.

Valoki

⁸ Na tuku loa le folafola a le Eteleno kia Selemia, i le oki o le fai e le sau ko Setesiasi se fakapapau mo le kakai katoa o Selusalemi, ke fakasa le lauatea,

⁹ o tupu ke tasi fakalauatea e le tagata lana tagata fakasausau mo lana fafine fakasausau, le tagata Epeleo mo lana avaga, ti ke aua na toe taofi fakapopula e se tasi se tagata Sutea leia ko lona taina.

¹⁰ Ko le kau pule mo le kakai katoa, ala na fai ia le fakapapau, na tasi fakalauatea loa le tagata mo le fafine leia na popula kiate ia, o tupu ke aua na la toe nofo i le popula ; na lotou fakalogo loa ti na lotou tuku loa latou ke lauatea.

¹¹ Kae i le oki o le nea lena, na toe fetogi loa alatou manatu ; na lotou toe too mai loa le tagata mo le fafine popula ala na lotou fakalauatea, o toe pulei ke popula kia latou.

¹² Koia na tuku loa le folafola a le Eteleno kia Selemia, o pati :

¹³ E folafola le Eteleno, le Atua o Iselaele : Na kau fai se sai mo okoutou tamana, i le aso leia na kau fakamavae ai latou mei le fenua o Esipito, mei le fenua leia na lotou popula ai ; ti na kau pati kia latou :

¹⁴ Ka oki ni fetuu e fitu, e tasi fakalauatea loa e le tagata lona taina Epeleo leia na popula kiate koe ; e fakasausau a ia kiate koe i fetuu e ono, ti e ke fakalauatea loa a ia ke mavae mei lou fale. Kae na leaise fakalogo okoutou tamana, na leaise tokaga olatou taliga.

¹⁵ Kae ko koutou, kua kotou toe maliu mai, o fai le nea leia e totonu ki oku mata, o kotou tuku okoutou fetaina ke lauatea, ti kua kotou fai se fakapapau i oku mua, i le fale leia e kalagai ai loku suafa.

¹⁶ Kae kua kotou toe fetogi manatu, ti kua kotou fakakelekele loku suafa ; kua kotou tasi toe too lana tagata mo lana fafine fakasausau, ala kua oki i lakoutou fakalauatea ke ano, ti kua kotou toe fakamakeke latou ke toe liliu ko akoutou tagata mo fafine popula.

¹⁷ Koia e folafola le Eteleno, o pati : Na leaise kotou fakalogo kiate au, talie na tonu ke kotou fakalauatea lokoutou taina mo lokoutou oloi. Ko leinei, e pati le Eteleno, e kau fakasa kia koutou le tautea o le seleta, mo le taumasaki, mo le oge, ti e kau fakaliliu loa koutou ko se nea fakaii ki puleaga fuli o le kele.

¹⁸ E kau tuku loa a tagata ala na maumaui ia laku sai, ala na leaise fakaapaapa ki le fakapapau leia na lotou fai i oku mua, o tuuti i loto malie le uviki pipi ti mo fakalaka i vasa o inati ;

¹⁹ E kau tuku loa a pule o Suta, mo pule o Selusalemi, mo enuke, mo tagata faisakilifisio, mo le kakai katoa o le fenua, ala na fakalaka i vasa o inati ;

²⁰ E kau tuku loa latou ki lima o olatou fili, mo lima o latou ala e loto ki lolatou mauli, ti e liliu loa olatou tino ko le nea kai a manu lele o le lagi mo manu o le kele.

²¹ E kau tuku loa a Setesiasi, sau o Suta, mo ona kau pule ki lima o latou ala e loto ki lolatou mauli, mo lima o le kau tau a le sau o Papilone, leia kua fakamamao meia koutou.

²² E pati le Eteleno : E kau tuku loa aku fakatotonu ti e kau toe fakaliliu mai loa latou ki le kolo leinei ; e lotou taui loa a ia, ti e lotou maua loa a ia, ti e lotou tutu loa a ia ki le afi. Ti e kau fakaliliu loa a kolo o Suta ko se toafa, sala kakai.