Selemia 33 - Tosi Tapu

Fakapapau o le toe laga o Iselaele

¹ Na tuku loa le folafola a le Eteleno kia Selemia, ko lona tua lua, ka koi nofo a ia i le malae o le fale pilisoni, o pati :

² E folafola le Eteleno, leia e fai ia a nea ana, Le Eteleno, leia e fakakaukau ia latou ti e fakasoko ia latou, Leia e igoa ko le Eteleno :

³ Fetapa mai kiate au, ti e kau tali atu loa kiate koe ; E kau fakasa loa kiate koe ni nea lalasi, ni nea fakapulipuli, Ala e leaise ke iloa.

⁴ Talie e folafola le Eteleno, le Atua o Iselaele, Ki fale o le kolo leinei Ti mo fale o sau o Suta, Ala e laku loa ki le kele e palepale tau mo le seleta,

⁵ I le aso leia e kotou ano ai loa o tau ki le kau Kaletea, Ti e lotou apele ai loa i mate o tagata, Ti e kau tamate ai loa i loku sausau mo loku ita lasi ; Ti e kau fufu loa oku mata ki le kakai o Selusalemi, O tupu ko le lasi o lana agaveli.

⁶ Ko leinei, e kau soli loa kiate ia le mauli mo le malolo, ti e kau faitoo loa latou, Ti e kau fakamavaa loa kia latou se matapuna lasi o le tokamalie mo le agatonu.

⁷ E kau toe aumai loa le kau popula o Suta mo le kau popula o Iselaele, Ti e kau fakanonofo loa latou ofaipe le temi mua.

⁸ E kau fakamea loa latou i alatou agasala fuli ala na lotou fai kiate au, E kau fakamolemole loa a agaveli fuli ala na lotou agasala ai kiate au, Ti na lotou agatuu ai kiate au.

⁹ E liliu loa le kolo leinei kiate au ko se nea fakatupu fiafia, mo fakatupu fakafetai, ti mo fakatupu kololia, I lotolotoga o atu puleaga fuli o le malama nei, Ala e logo loa ki le tapuakina leia e kau fai loa kia latou ; E lotou ofolele loa ti e lotou sevaia loa, I le malie katoa mo le manuia ala e kau soli loa kia latou.

¹⁰ Koia e folafola ai le Eteleno, o pati : E toe logo loa i le ganea leinei Leia e kotou pati ki ai : E toafa a ia, sala tagata mo sala manu ; E toe logo loa i kolo o Suta ti mo ala o Selusalemi, Ala kua maumau, mo sala tagata, mo sala kakai, ti mo sala manu,

¹¹ Ki kalaga fakafiafia mo kalaga nekenekea, Ki sua a le tama feauaki ti mo sua a le taine feauaki, Ki le leo o latou ala e pati : Kotou fakafetai ki le Eteleno o kau tau, Talie e agamalie le Eteleno, talie e lee gato lona manava alofa ! Ki le leo o latou ala e momoli ia ni sakilifisio fakafetai I le fale o le Eteleno. Talie e kau toe aumai loa le kau popula o le fenua, E kau toe fakanofo loa latou ofaipe le temi mua, E pati le Eteleno.

¹² Koia e folafola ai le Eteleno o kau tau, o pati : E toe maua loa i le ganea leinei Leia e toafa, sala tagata mo sala manu, Ti mo ona kolo fuli, E maua loa ni nofoaga ki kau tausi manu, Ala e fakamalolo ia alatou kau manu.

¹³ I kolo o le mauga, mo kolo o le potu laumalie, I kolo o le potu saute, I le fenua o Pesamino ti mo tafatafa o Selusalemi, Ti mo kolo o Suta, E toe ano loa a ovi i lalo o le lima o leia e lau ia latou, E pati le Eteleno.

¹⁴ Ko leinei, e soko mai loa a aso, e pati le Eteleno, Ala e kau fakasoko ai loa le folafola malie Leia na kau fakasa ki le fale o Iselaele mo le fale o Suta.

¹⁵ I aso ana ti mo le temi lena, E kau fakatupu loa kia Tavite se uli Maokioki ; E fai loa e ia le faitotonu mo le maoki i le fenua.

¹⁶ I aso ana, e fakamauli loa a Suta, E maua loa e Selusalemi le fimalie i lona nofoaga ; Ti e tuku loa kiate ia le igoa leinei : Le Eteleno lomatou faitotonu.

¹⁷ Talie e folafola le Eteleno, o pati : E leaise mativa loa Tavite i se tagata Ke nofo i le ekeekeaga fakasau o le fale o Iselaele ;

¹⁸ Ti e leaise mativa loa i se aso le kau faisakilifisio, mo le kau Levi, i se tagata Ke momoli ia ni failaulau, mo tutu ia le iseso mo moliga, Ti mo fai ia ni sakilifisio i aso fuli.

¹⁹ Na tuku loa le folafola a le Eteleno kia Selemia, o pati :

²⁰ E folafola le Eteleno, o pati : Kapau e mafai ke kotou motusi laku sai mo le ao, Ti mo laku sai mo le pouli, Ke aua na toe sa loa le ao mo le pouli i ola temi,

²¹ Ti e motusi loa laku sai mo laku tagata fakasausau ko Tavite, Ke aua na toe maua sona vosa ke eke i lona ekeekeaga fakasau, Ti e toe tatau ki laku sai mo le kau Levi ti mo le kau faisakilifisio ala e fai ia loku tausi.

²² Ofaipe le one o le tai, leia e leaise mafai ke fuafua, Ti mo fetuu o le lagi, ala e leaise mafai ke lau, E kau liuliuga loa le sakoga o Tavite, laku tagata fakasausau, Ti mo le kau Levi leia e fai ia loku tausi.

²³ Na tuku loa le folafola a le Eteleno kia Selemia, o pati :

²⁴ Pe na ke fakatokagai le nea leia na pati ki ai a kakai ana : Ko famili ala e lua na filifili e le Eteleno, kua tiaki e ia laua ? Koia e lotou gologolo ai ki loku kakai, Ti e leaise koi lotou tio kiate ia ofaipe se puleaga.

²⁵ E folafola le Eteleno, o pati : Ka na leaise kau fai laku sai mo le ao ti mo le pouli, Ti ka na leaise kau fakatuu a lao o le lagi mo le kele,

²⁶ E kau tiaki loa le sakoga o Sakopo mo Tavite, laku tagata fakasausau, Ti e leaise kau toe too loa i lona sakoga latou ala e pule loa Ki fanau a Apalaamo, mo Isaake, mo Sakopo. Talie e kau toe aumai loa lolatou kau popula, ti e kau alofa loa kia latou.