Selemia 32 - Tosi Tapu

Ko le totogi o se faisaga e Selemia

¹ Na tuku loa le folafola a le Eteleno kia Selemia, i le fetuu kau agafulu o Setesiasi, sau o Suta. Ko le fetuu kau agafulu tupu valu a ia o Nepukatenesale.

² Na takatakai e le solia a le sau o Papilone a Selusalemi i le temi a ia ; ti na tuku a Selemia, ko le polofeta, i le malae o le pilisoni leia na tuu i le fale o le sau o Suta.

³ Talie na fakatotonu e le sau ko Setesiasi ke tuku a ia ki ai, o pati kiate ia : Kolea e ke kikite ai, o pati : E folafola le Eteleno, o pati : Ko leinei, e kau tuku le kolo leinei ki lima o le sau o Papilone, ti e too loa e ia a ia ;

⁴ Ti e leaise sao loa Setesiasi, sau o Suta i le kau Kaletea, kae e tuku loa a ia ki lima o le sau o Papilone, ti e masau totonu loa a ia kiate ia, ti e tio loa ona mata ki ona mata.

⁵ E ave loa Setesiasi e le sau o Papilone ki Papilone, ti e nofo loa a ia i Papilone o kaku ki laku toe manatui loa a ia, e pati le Eteleno. Kapau e kotou tau ki le kau Kaletea, e leaise kotou maua loa se manuia.

⁶ Ti na pati loa Selemia : Na tuku mai kiate au le folafola a le Eteleno, o pati :

⁷ Ko leinei e au loa a Anameele, le vosa o lou tuatinana ko Salume, o pati atu kiate koe : Totogi laku faisaga leia e tuu i Anatote, talie e ke maua le lao o le toe totogi ke ke maua a ia.

⁸ Ti na au loa kiate au Anameele, vosa o loku tuatinana, o mulimuli ki le folafola a le Eteleno, i le malae o le pilisoni, ti na pati mai loa a ia kiate au : Totogi laku faisaga leia e tuu i Anatote, i le fenua o Pesamino, talie ko koe leia e tonu ke maua tofiga a ia ti e tonu ke totogi ia a ia, totogi a ia ! Na kau iloa loa ko le folafola a ia a le Eteleno.

⁹ Na kau totogi loa meia Anameele, vosa o loku tuatinana, le faisaga i Anatote, ti na kau fuafua loa kiate ia le paaga, ko fa sikele paaga e kau agafulu tupu fitu.

¹⁰ Na kau tosi loa se pepa fakamaoki, leia na kau fakamau loa, ti na kau too loa ni tagata fakamaoki, ti na kau fuafua loa le paaga i se fua.

¹¹ Ti na kau too loa le pepa fakamaoki, leia kua fakamau, o mulimuli ki le lao mo le agai fenua, ti mo leia na mavaa.

¹² Ti na kau tuku loa le pepa fakamaoki kia Paluke, vosa o Nelisa, vosa o Makesesa, i mua o Anameele, vosa o loku tuatinana, mo mua o tagata fakamaoki ala na fakamaoki ia le pepa fakamaoki, ti mo mua o le kau Sutea fuli leia na nonofo i le malae o le fale pilisoni.

¹³ Ti na kau tuku loa le fakatotonu leinei kia Paluke i olatou mua :

¹⁴ E folafola le Eteleno o kau tau, le Atua o Iselaele, o pati : Too a nea anei kua tosi, le pepa fakamaoki, leia kua fakamau mo leia e mavaa, ti ke tuku laua ki se fa ipu kele, o tupu ke la tologa o fualoa.

¹⁵ Talie e folafola le Eteleno o kau tau, le Atua o Iselaele, o pati : E toe totogi loa ni fale, mo ni faisaga, mo ni faisaga vite i le fenua leinei.

Fakamaoki o le toe laga o Iselaele

¹⁶ I le oki o laku tuku le pepa fakamaoki kia Paluke, vosa o Nelisa, na kau fai loa le kole leinei ki le Eteleno :

¹⁷ Ei Aliki Eteleno, Ko leinei, kua ke fakatupu le lagi mo le kele I lou mafimafi lasi mo lou lima falo : E leaise faigataa fua se nea kiate koe.

¹⁸ E ke manava alofa o kaku ki le tautupu afe, Ti e ke tautea le agaveli a tamana ki fatafata o alotou fanau ala e mulimuli ia latou. Ko koe ko le Atua lasi, le mafimafi, Leia e igoa ko le Eteleno o kau tau.

¹⁹ E ke lasi i au fakatuutuu ti e ke mafimafi i gaoi. E tio ou mata ki ala fuli o fanau a tagata, Ke totogi ki le tagata taki tasi o mulimuli ki ona ala, O mulimuli ki le fua o ana gaoi.

²⁰ Na ke fai ni milakulo mo ni nea fakamanamana i le fenua o Esipito o kaku mai ki le aso nei, Ki le kakai o Iselaele mo kakai fuli, Ti kua logologona lou suafa, ofaipe lona sa i le aso nei.

²¹ Na ke fakamavae lou kakai ko Iselaele, mei le fenua ko Esipito, I ni milakulo ti mo ni nea fakamanamana, ki lou lima makeke ti mo lou lima falo.

²² Na ke soli kia latou le fenua leinei, Leia na ke fakapapau ki olatou tamana ke soli kia latou, Fenua leia e sali ai le sua u mo le meli.

²³ Na lotou au, ti na lotou maua a ia. Kae na leaise lotou fakalogo ki lou leo, Na leaise lotou taupau lau lao, Na leaise lotou fai a nea fuli ala na ke fakatotonu kia latou ke fai. Koia na ke fakasoko ai kia latou a malaia fuli anei !

²⁴ Ko leinei, kua laga ni palepale tau ki le kolo ti kua lotou valoki a ia. E tuku loa le kolo ki lima o le kau Kaletea ala e osoi ia a ia, Ti e lava loa a ia i le seleta, mo le oge, ti mo le taumasaki. Kua soko le nea leia na ke pati ki ai, ti e ke tio ki ai.

²⁵ Kae logo ai le nea aia, Aliki Eteleno, na ke pati mai kiate au : Totogi se faisaga ki le paaga, too ni tagata fakamaoki… Ti ko leinei, kua tuku le kolo ki lima o le kau Kaletea !

²⁶ Na tuku loa le folafola a le Eteleno kia Selemia, o pati :

²⁷ Ko leinei, ko au ko le Eteleno, le Atua o tagata fuli. Pe i ai se nea e faigataa kiate au ?

²⁸ Koia e folafola ai le Eteleno, o pati : Ko leinei, e kau tuku le kolo leinei ki lima o le kau Kaletea, Ti mo lima o Nepukatenesale, sau o Papilone, Ti e too loa e ia a ia.

²⁹ E ulu loa ki le kolo leinei le kau Kaletea leia e taui ia a ia, E lotou tutu loa a ia ki le afi, ti e vela loa a ia Mo fale ala na momoli ai le iseso kia Paale i aluga o ato, Ti na fai ai ni lipasio ki ni atua kese, O tupu ke fakatupu ai loku sausau.

³⁰ Talie ko fanau a Iselaele mo fanau a Suta Na fai ia, talu mei lolatou liliki, le nea leia e veli ki oku mata ; Talie na fakatupu e fanau o Iselaele loku sausau Ki gaoiaga o olatou lima, e pati le Eteleno.

³¹ Talie kua fakatupu e le kolo leinei loku sausau mo loku mafaia, Talu mei le aso leia na laga ai a ia o kaku mai ki le aso nei ; Koia e kau loto ai ke too le kolo leinei i oku mua,

³² O tupu ko le veli katoa leia na fai e fanau o Iselaele mo fanau o Suta, Ke kau itaita ai, Latou, mo olatou sau, mo olatou pule, mo olatou kau tagata faisakilifisio ti mo olatou kau polofeta, Mo tagata o Suta ti mo le kakai o Selusalemi.

³³ Na lotou titua mai kiate au, na leaise lotou tio mai kiate au. Na ako latou, na ako latou talu mei le usu, Kae na leaise lotou fakalogo ke lotou popoto.

³⁴ Kae na lotou fakatuu olatou fakatata fakalialia I le fale leia e fetapa ai ki loku suafa, O tupu ke fakakelekele a ia.

³⁵ Na lotou fakatuu ni ganea taualuga ki Paale, i le vaivailiua o Pene-Inome, Ke momoli ai i le afi olatou vosa mo olatou taineliki kia Moloke, Nea leia na leaise kau fakatotonu ke fai ; Ti na leaise ake i laku fakakaukau E lotou fai loa ni nea fakalialia felaaki, Ke tupu ai le agasala o Suta.

³⁶ Ti ko leinei, e folafola le Eteleno, le Atua o Iselaele, o pati Ki le kolo leinei e kotou pati ki ai : E tuku loa a ia ki lima o le sau o Papilone, Ke taai e le seleta, mo le oge, mo le taumasaki :

³⁷ Ko leinei, e kau fakatasi mai loa latou mei fenua fuli ala na kau kapu latou ki ai, I loku mamae, mo loku sausau, mo loku fitaa lasi ; E kau toe aumai loa latou ki le ganea leinei, Ti e kau fakanonofo loa latou i ai, i le fimalie.

³⁸ E lotou liliu loa ko loku kakai, Ti e kau liliu loa ko lolatou Atua.

³⁹ E kau soli loa kia latou se loto e tasi, mo se ala e tasi, O tupu ke lotou i tuumau kiate au, Ti ke lotou manuia ai, ti ke manuia ai foki alatou fanau i olatou muli.

⁴⁰ E kau fai loa mo latou se sai lee gato, E leaise kau toe mafuli kese loa ia latou, E kau fai loa kia latou le nea leia e malie ; Ti e kau tuku loa ki olatou loto le i kiate au, O tupu ke aua na lotou fakamamao iate au.

⁴¹ E kau fiafia loa i le fai o le nea leia e malie kia latou, Ti e kau to fakamaokioki loa latou i le fenua leinei, I loku loto katoa mo loku laumalie katoa.

⁴² Talie e folafola le Eteleno, o pati : Ofaipe laku kakau mai ki le kakai leinei a malaia lalasi fuli ana, E kau toe aumai loa kia latou a nea malilie fuli ala kua kau fakapapau kia latou.

⁴³ E toe totogi loa ni faisaga i le fenua leinei, Leia e kotou pati ki ai : Ko se toafa a ia, sala tagata ti sala manu, Ti kua tuku a ia ki lima o le kau Kaletea.

⁴⁴ E totogi loa ni faisaga ki le paaga, E fai loa ni pepa fakamaoki, e fakamau loa latou, e too loa ni tagata fakamaoki, I le fenua o Pesamino ti mo tafatafa o Selusalemi, I kolo o Suta, mo kolo o le mauga, I kolo o le toafa, mo kolo o le potu saute ; Talie e kau toe aumai loa olatou kau popula, e pati le Eteleno.