Selemia 31 - Tosi Tapu

E fetogi loa le mamae e le fiafia

¹ E pati le Eteleno : I le temi lena, e kau liliu loa ko le Atua o famili fuli o Iselaele, Ti e lotou liliu loa ko loku kakai.

² E folafola le Eteleno, o pati : Na maua e ia le kalasia i le toafa, Le kakai o latou ala na sao i le seleta ; E saele Iselaele ki lona maloloaga.

³ Mei mamao na sa mai le Eteleno kiate au, o pati : E kau alofa kiate koe i se alofa lee gato ; Koia e kau taupau ai kiate koe loku agamalie.

⁴ E kau toe laga loa a koe, ti e toe laga loa a koe, Taine taupoou o Iselaele ! E ke toe too loa au nafa, Ti e ke toe ano loa i loto malie o ni mako fakafiafia.

⁵ E ke toe to loa ni faisaga vite i mauga o Samalia ; E to loa e le kau to laakau, ti e lotou tau loa olatou fua.

⁶ Talie e soko mai loa le aso leia e kalaga ai loa le kau leo i le mauga o Efalaimi : Kotou tutuu mai ke tou pale ki Sione, ki le Eteleno, lotatou Atua !

⁷ Talie e folafola le Eteleno, o pati : Kotou kalaga fakafiafia kia Sakopo, Kotou sua fakafiafia i mua o atu puleaga ! Kotou kalaga leo lasi, kotou sua ni fakafetai, ti kotou pati : Eteleno, fakamauli lou kakai, le toetoega o Iselaele !

⁸ Ko leinei, e kau aumai latou mei le fenua o le potu noleto, E kau fakatasi latou mei potupotu o le malama nei ; E kau ia latou le kivi mo le kito, Le fafine tinae mo leia e fanau ; Ko se kakai lasi ai, leia e toe liliu mai ki leinei.

⁹ E lotou au fetagisi, ti e kau taki latou i loto malie o alatou kolekole ; E kau taki latou ki ni liua apelepele i le vai, I se ala tokamalie leia e leaise lotou sisiga ai ; Talie ko au ko se tamana ki Iselaele, Ti ko Efalaimi loku uluaki.

¹⁰ Atu puleaga, kotou fakalogo mai ki le folafola a le Eteleno, Ti kotou fakasa ia i atu motu mamao ! Kotou pati : Ko leia na fakamavetevete ia Iselaele e toe fakatasi ia loa a ia, Ti e taupau loa e ia a ia ofaipe le tagata tausi manu e taupau ia lana kau manu.

¹¹ Talie e toe totogi e le Eteleno Sakopo, E saofaki e ia a ia i le lima o se tasi e makeke ake iate ia.

¹² E lotou au loa, ti e lotou fai loa ni kalaga fakafiafia i potu taualuga o Sione ; E lotou fiafia loa i nea malilie a le Eteleno, Le fulumeto, mo le vino, mo le lolo, Mo ovi ti mo pipi ; E fai loa lolatou laumalie pe se oloto fakavai, Ti e leaise lotou toe nofo loa i le mamae.

¹³ Ti e mako fiafia loa taineliki, E toe fiafia foki a kau tupulaga mo kau matua ; E kau fetogi loa lolatou mamae ki le nekenekea ti e kau fakapelepele loa latou ; E kau soli loa kia latou le fiafia i le oki o mamae.

¹⁴ E kau fakamakona loa ki le gako le laumalie o le kau faisakilifisio, Ti e makona loa loku kakai i aku nea malilie, e pati le Eteleno.

¹⁵ E folafola le Eteleno, o pati : E logo ki ni tagi i Lama, Ki ni tagi laulau, ki ni loimata kona ; E tagi Lasele ana fanau ; Ti e leaise tali e ia ke fakapelepele a ia i ana fanau, Talie kua lotou pupuli.

¹⁶ E folafola le Eteleno, o pati : Taofi au tagi, Taofi a loimata i ou mata ; Talie e i ai loa se totogi o au gaoi, e pati le Eteleno ; E lotou toe liliu mai loa mei le fenua o le fili.

¹⁷ E i ai se amanaki malie ki lou apogipogi, e pati le Eteleno ; E toe liliu mai loa au fanau ki lolatou fenua.

¹⁸ E kau logo ki le tagi laulau a Efalaimi : Na ke tautea au, ti na tautea au Ofaipe se uviki pipi leia na leaise ako ke lalata ; Fai ke kau toe liliu, ti e kau toe liliu loa, Talie ko koe ko le Eteleno, loku Atua.

¹⁹ I le oki o laku titua kiate koe, e kau logoi se loto fakasemala ; Ti i le oki o laku fakasa aku sala, e kau papa ki loku tega, E kau luma ti e kau mamae, Talie e kau amo le luma o loku temi tupulaga.

²⁰ Pe ko Efalaimi ko se vosa alofaina kiate au ? Se fanau leia e fakafiafia ia loku loto ? Talie ka lasi laku masau kiate ia, ti e toe lasi ake laku manatu kiate ia ; Koia e mamae ai loku manava o tupu ko ia : E kau alofa loa kiate ia, e pati le Eteleno.

²¹ Fakatuu ni fakamailoga, fakatuu ni pou, Tokaga ki le ala lasi, mo le ala ikiiki leia na ke ano ai… Toe liliu mai, taine taupoou o Iselaele, Toe liliu mai ki kolo anei o ou !

²² E kaku loa kiafea lau eva, taine agatuu ? Talie e fakatupu e le Eteleno se nea foou i le malama nei : E afa loa e le fafine le tagata.

²³ E folafola le Eteleno o kau tau, le Atua o Iselaele, o pati : Ko leinei foki le tasi a nea e toe masau loa ki ai i le fenua o Suta ti mo ona kolo, Mo ka kau toe aumai loa olatou kau popula : Ke tapuaki le Eteleno kiate koe, nofoaga o le faitotonu, Mauga maokioki !

²⁴ E nofo loa i ai a Suta ti mo ona kolo fuli, Le kau gaoi kele ti mo latou ala e takitaki ia a kau manu.

²⁵ Talie e kau fakainu loa le laumalie e fia inu, Ti e kau fakamakona loa a laumalie fuli e gaegae.

²⁶ I le nea lena na kau ala loa, ti na kau tio : Na ano malie laku moemiti kiate au.

Ko le sai foou

²⁷ Ko leinei, e soko mai loa a aso, e pati le Eteleno, Ala e kau muluki ai loa se pulapula i le fale o Iselaele ti mo le fale o Suta, Ko se pulapula tagata mo se pulapula manu.

²⁸ Ti e faipe laku tokaga kia latou O taaki, mo fatii ki lalo, mo maumaui, mo fakamativa, ti mo fakaveli, E kau toe tokaga loa kia latou o fakatuu mo to, E pati le Eteleno.

²⁹ I aso ana, e leaise toe pati loa : Na kai e tamana ni vite momoto, Ti na makiti a nifo o fanau.

³⁰ Kae e mate loa le tagata taki tasi, o tupu ko lana agaveli totonu ; Ko tagata fuli e kai ia loa ni vite momoto, e makiti loa ona nifo.

³¹ E pati le Eteleno : E soko mai loa a aso, Ala e kau fai ai loa mo le fale o Iselaele mo le fale o Suta, Se sai foou,

³² E leaise faipe le sai leia na kau fai mo olatou tamana, I le aso leia na kau too ai latou i le lima o fakamavae latou i le fenua o Esipito, Sai leia na lotou maumaui, Logo ko au ko lolatou pule, e pati le Eteleno.

³³ Kae ko leinei le sai leia e kau fai loa mo le fale o Iselaele, I le oki a aso ana, e pati le Eteleno : E kau tuku loa laku lao ki olatou loto, E kau tosi loa a ia i olatou mafu, Ti e kau liliu loa ko lolatou Atua, Ti e lotou liliu loa ko loku kakai.

³⁴ E leaise toe ako loa e se tasi lona oloi, Pe ko se tasi lona taina, o pati : Kotou iloa le Eteleno ! Talie e iloa loa au e latou fuli, Mei leia e ikiiki ki leia e lasi, e pati le Eteleno ; Talie e kau fakamolemole loa lalatou agaveli, Ti e leaise kau toe manatui loa lalatou agasala.

³⁵ E folafola le Eteleno, leia na fakatupu ia le laa ke fakamalama ia le ao, Leia na fakatuutuu ia le masina mo fetuu ke fakamalama ia le pouli, Leia e fakamalagalaga ia le tai ti e fakagugulu ia ona galu, Leia e igoa ko le Eteleno o kau tau :

³⁶ Kapau e gato loa a lao ana i se aso i oku mua, e pati le Eteleno, Ti e gato loa le puleaga o le sakoga o Iselaele i oku mua.

³⁷ E folafola le Eteleno, o pati : Kapau e mafai ke fuafua a atu lagi i aluga, Kapau e mafai ke ulu o kaku ki fakatafito o le kele, Ti e kau tiaki loa le sakoga katoa o Iselaele, O tupu ko nea fuli ala na lotou fai, e pati le Eteleno.

³⁸ Ko leinei, e au a aso, e pati le Eteleno, Ala e toe laga ai loa le kolo ki le Eteleno, Mei le tule o Ananeele o kaku ki le matapa i le agele.

³⁹ E toe fua loa le kolo mei le potu uesite O kaku ki le mauga ikiiki o Kalepe, Ti e toe fua loa mei ai o kaku ki Koati.

⁴⁰ E fakatapu loa ki le Eteleno le vaivailiua katoa o le kau mate mo le mugalafu, Ti mo faisaga fuli o kaku ki le liua o Setolone, O kaku ki le matapa o osi i le potu esite, Ti e leaise toe taaki loa pe toe maumaui loa latou i se aso.