Selemia 29 - Tosi Tapu

Ko le tosi ki le kau popula

¹ Ko leinei le kanofi o le tosi leia na ave e le polofeta ko Selemia mei Selusalemi ki le toetoega o le kau matua i le popula, mo le kau faisakilifisio, mo le kau polofeta mo le kakai katoa, ala na ave popula e Nepukatenesale ki Papilone,

² I le oki o le mavae mei Selusalemi o le sau ko Sekonia, mo le sau fafine, mo le kau enuke, mo le kau pule o Suta mo Selusalemi, mo le kau fai papa, mo le kau fai ukamea.

³ Na fakatoo e ia a ia kia Eleasale, vosa o Safani, mo Kemalia, vosa o Ilekisa, ala na kakau ki Papilone e Setesiasi, sau o Suta, kia Nepukatenesale, sau o Papilone. Na tuu i ai :

⁴ E folafola le Eteleno o kau tau, le Atua o Iselaele, ki le kau popula fuli ala na kau ave mei Selusalemi ki Papilone, o pati :

⁵ Kotou fakatuu ni fale, kotou nonofo i ai ; kotou to ni oloto ti kotou kai olatou fua.

⁶ Kotou too ni avaga kia koutou ti kotou fakatupu ni vosa mo ni taineliki ; kotou too ni avaga ki okoutou vosa, ti kotou soli ni avaga ki okoutou taineliki, o tupu ke lotou fakatupu ni vosa mo ni taineliki ; kotou liuliuga i le ganea leia e kotou nonofo ai, kae aua na kotou lavaki.

⁷ Kotou afa le malie o le kolo leia kua kau ave popula koutou ki ai, ti kotou kole ki le Eteleno le malie o le kolo, talie e fakalogo lokoutou manuia ki lona manuia.

⁸ Talie e folafola le Eteleno o kau tau, le Atua o Iselaele : Aua na kotou tuku ke kakai koutou e okoutou kau polofeta ala e nofo ia koutou, mo okoutou kau faikikite. Aua na kotou fakalogo ki okoutou kau moe miti, ala e kotou fakatupu alatou moe miti !

⁹ Talie ko le loi leia e lotou fakasa atu kia koutou i loku suafa. Na leaise kau kakau latou, e pati le Eteleno.

¹⁰ Kae ko leinei le nea leia e fakasa e le Eteleno : Ka sili loa ni fetuu e kau fitu o Papilone, e kau toe manatui loa koutou, ti e kau fakasoko loa kia koutou laku folafola malie, o kau toe aumai loa koutou ki le ganea leinei.

¹¹ Talie e pati le Eteleno, e kau iloa a fakatuutuu ala kua kau fai kia koutou, ko fakatuutuu o le tokamalie kae leai o le malaia, o tupu ke soli kia koutou se apogipogi mo se amanaki malie.

¹² E kotou kalaga mai loa kiate au, ti e kotou ano loa ; e kotou faikole mai loa kiate au, ti e kau fakalogo atu loa kia koutou.

¹³ E kotou afa loa au, ti e kotou maua loa au, mo kapau e kotou afa au i lokoutou loto katoa.

¹⁴ E pati le Eteleno, e kau tuku loa ke kotou maua au, ti e kau toe aumai loa okoutou kau popula. E kau fakatasii loa koutou mei puleaga fuli, mei ganea fuli ala na kau kapu koutou ki ai, e pati le Eteleno, ti e kau toe aumai loa koutou ki le ganea leia na kau ave ai koutou o fakapopula.

¹⁵ E fakasa e le Eteleno a nea fuli ana, o tupu kua kotou pati : Kua fakanofo e le Atua kia matou ni kau polofeta i Papilone !

¹⁶ Ti ko leinei le nea leia e folafola e le Eteleno ki le sau leia e nofo i le ekeekeaga fakasau o Tavite, mo le kakai katoa leia e nofo i le kolo lena, mo okoutou fetaina ala na leaise ano mo koutou ki le popula.

¹⁷ E folafola le Eteleno o kau tau, o pati : Ko leinei, e kau kakau loa kia latou le seleta, mo le oge, mo le taumasaki, ti e kau fakaliliu loa latou o tatau mo ni fiki fakalialia, ala e leaise feala ke kai o tupu ko lolatou fuaveveli.

¹⁸ E kau tuli loa latou ki le seleta, mo le oge, mo le taumasaki, ti e kau fakaliliu loa latou ko se nea fakaii ki puleaga fuli o le kele, mo se nea fakamalaia, mo se nea fakaaloalofa, mo se nea fakagologolo, mo se nea fakalumaluma i puleaga fuli ala e kau kapu loa latou ki ai,

¹⁹ O tupu na leaise lotou fakalogo ki aku folafola, e pati le Eteleno, latou ala na kau kakau ki ai aku tagata fakasausau, le kau polofeta, ala na kau kakau latou ki ai koi usu ; kae na leaise lotou fakalogo, e pati le Eteleno.

²⁰ Kae ko koutou, kotou fakalogo ki le folafola a le Eteleno, koutou fuli, kau popula, ala kua kau ave mei Selusalemi ki Papilone !

²¹ E folafola le Eteleno o kau tau, le Atua o Iselaele, o pati kia Akapo, vosa o Kolasa, mo Setesiasi, vosa o Maasesa, ala e kikite kia koutou le loi i loku suafa : Ko leinei, e kau tuku loa laua ki lima o Nepukatenesale, sau o Papilone ; ti e tamate loa e ia laua i okoutou mua.

²² E la liliu loa ko ni nea fakatakuga malaia i le kau popula o Suta ala i Papilone, o pati : Ke tautea a koe e le Eteleno ofaipe Setesiasi mo Akapo, ala na tutu mauli e le sau o Papilone !

²³ Ti e soko loa le nea lena, o tupu kua la fai se nea fakalialia i Iselaele, o la tono mo avaga o ola oloi, ti mo la fakasa ni loi i loku suafa, kae na leaise kau tuku fua kia laua se fakatotonu. E kau iloa a nea ana, ti e kau fakamaoki ki ai, e pati le Eteleno.

²⁴ E ke pati loa kia Semaesa, tagata Neselami :

²⁵ E folafola le Eteleno o kau tau, le Atua o Iselaele, o pati : O tupu kua ke ave i lou igoa ki le kakai katoa o Selusalemi, kia Sofoni, le tagata faisakilifisio, vosa o Maasesa, mo tagata faisakilifisio fuli, se tosi leia e pati i ai :

²⁶ Kua fakanofo a koe e le Eteleno ko le tagata faisakilifisio o fetogi Seosata, le tagata faisakilifisio, o tupu ke i ai i le fale o le Eteleno ni tagata ke leoleo ia latou fuli ala e valea mo fia polofeta, o velo latou ki le pilisoni mo fakamaumau ki ni tini.

²⁷ Ti kolea na leaise ke valoki ai Selemia mei Anatote, leia e kikite ia koutou,

²⁸ Leia na kakau ia foki ke fakasa mai kia matou i Papilone, o pati : E fualoa loa le popula ; kotou fakatuu ni fale, ti kotou nonofo i ai ; kotou to ni oloto, ti kotou kai olatou fua !

²⁹ Na lau loa e Sofoni, le tagata faisakilifisio, le tosi lena i mua o le polofeta ko Selemia.

³⁰ Ti na tuku loa le folafola a le Eteleno kia Selemia, o pati :

³¹ Kakau o fakasa ki kau popula fuli : E folafola le Eteleno, o pati kia Semaesa, le tagata Neselami : O tupu kua kikite Semaesa kia koutou kae na leaise kau kakau a ia, ti kua tuku e ia kia koutou se fanaki sala,

³² Ko leinei le nea leia e fakasa e le Eteleno : E kau tautea loa Semaesa, le tagata Neselami, mo lona sakoga ; e leaise nofo loa se tasi o lona sakoga i loto malie o le kakai lena, ti e leaise tio loa a ia ki le malie leia e kau fai loa ki loku kakai, e pati le Eteleno ; talie ko ana masau ko se agatuu ki le Eteleno.