Selemia 28 - Tosi Tapu

Ko Selemia mo le polofeta loi ko Anania

¹ I le fetuu fai lena, i le kamataaga o le pule a Setesiasi, sau o Suta, i le masina lima o le fetuu fa, na pati mai loa kiate au a Anania, vosa o Asule, polofeta mei Kapaone, i le fale o le Eteleno, i mua o le kau faisakilifisio mo le kakai katoa :

² E folafola le Eteleno o kau tau, le Atua o Iselaele, o pati : Kua kau fatii le amo a le sau o Papilone !

³ Koi toe fua ni fetuu e lua, ti e kau toe fakaliliu mai loa ki le ganea leinei a ipu fuli o le fale o le Eteleno, ala na too e Nepukatenesale, sau o Papilone, i le ganea leinei, o ave ki Papilone.

⁴ E pati le Eteleno : E kau toe fakaliliu mai loa ki le ganea leinei a Sekonia, vosa o Sosakimi, sau o Suta, mo le kau popula fuli o Suta, ala na ano ki Papilone ; talie e kau fatii loa le amo a le sau o Papilone.

⁵ Ti na tali loa Selemia, le polofeta, kia Anania, le polofeta, i mua o le kau faisakilifisio mo le kakai katoa, ala na tutuu i le fale o le Eteleno.

⁶ Na pati loa Selemia, le polofeta : Amene ! Ke fai fenaaki e le Eteleno ! Ke fakamaoki e le Eteleno a folafola ala kua ke fakasa, ti ke toe fakaliliu mai e ia mei Papilone ki le ganea leinei a ipu o le fale o le Eteleno mo le kau popula katoa !

⁷ Ko leia fuai, fakalogo mai ki le folafola leinei e kau fakasa ki ou taliga mo taliga o le kakai katoa leinei :

⁸ Ko le kau polofeta leia na muamua iate au mo koe, talu mei temi afea, na kikite ki ni fenua makeke mo ni puleaga lalasi, o fakasa le tau, mo le malaia, mo le taumasaki ;

⁹ Kae kapau e kikite e se polofeta le tokamalie, e fakamaoki loa kiate ia na kakau maoki mai a ia e le Eteleno, mo ka e soko loa le nea leia na kikite e ia.

¹⁰ Ti na too loa e Anania, le polofeta, le amo mei le ua o Selemia, le polofeta, o fatii a ia.

¹¹ Ti na pati loa Anania i mua o le kakai katoa : E folafola le Eteleno, o pati : E kau fatii feneeki loa mei le ua o puleaga fuli, i le oki o fetuu e lua, le amo a Nepukatenesale, sau o Papilone. Ti na ano loa Selemia, le polofeta.

¹² Kae i le oki o le fatii e le polofeta ko Anania le amo mei le ua o le polofeta ko Selemia, na tuku loa le folafola a le Eteleno kia Selemia, o pati :

¹³ Ano, o pati kia Anania : E folafola le Eteleno, o pati : Kua ke fatii le amo laakau, kae e ke maua loa se amo ukamea o fetogi ai.

¹⁴ Talie e folafola le Eteleno o kau tau, le Atua o Iselaele : Kua kau teki se amo ukamea ki ua o puleaga fuli ana, ke lotou popula kia Nepukatenesale, sau o Papilone, ti e lotou popula loa kiate ia ; e kau soli foki kiate ia a manu o le vao.

¹⁵ Ti na pati loa Selemia, le polofeta, ki le polofeta ko Anania : Fakalogo mai, Anania ! Na leaise kakau mai a koe e le Eteleno, kae kua ke tuku ki le kakai leinei se fanaki sala.

¹⁶ Koia e folafola le Eteleno, o pati : Ko leinei, e kau kapu a koe mei le kele ; ti e ke mate loa i le fetuu leinei, o tupu ko au folafola ko se agatuu latou ki le Eteleno.

¹⁷ Ti na mate loa Anania, le polofeta, i le fetuu lena, i le masina lena.