Selemia 27 - Tosi Tapu

Fakakolekole a Selemia ki le kakai ke fakalogo kia Nepukatenesale

¹ I le kamataaga o le sau o Sosakimi, vosa o Sosiasi, sau o Suta, na tuku loa le folafola a le Eteleno kia Selemia, o pati :

² Na pati mai le Eteleno kiate au : Fai kiate koe ni sai mo ni amoga, o teki ki lou ua.

³ Fakamomoli latou ki le sau o Etome, mo le sau o Moape, mo le sau o fanau o Amone, mo le sau o Tile, mo le sau o Sitone, i le lima o ni tagata avelogo ala na au ki Selusalemi kia Setesiasi, sau o Suta ;

⁴ Ti ke tuku loa kia latou aku fakatotonu ki olatou pule, o pati : E folafola le Eteleno o kau tau, le Atua o Iselaele, o pati : Ko leinei le nea leia e kotou fakasa loa ki okoutou pule :

⁵ Ko au leia na fakatupu ia le kele, mo tagata mo manu ala e taka i aluga o le kele, ki loku mafimafi lasi mo loku lima falo, ti e kau soli le kele ki leia e kau loto ki ai.

⁶ Ti ko leinei, kua kau tuku a fenua fuli anei ki lima o Nepukatenesale, sau o Papilone, ko laku tagata fakasausau ; ti kua kau soli foki kiate ia a manu o faisaga ke fakalogo kiate ia.

⁷ E fakalogo loa a puleaga fuli kiate ia, mo lona vosa, mo le vosa o lona vosa, o kaku ki le tatae mai o le temi o lona fenua, leia e pule ai loa kiate ia ni puleaga makeke mo ni sau lalasi.

⁸ Ti kapau e leaise fia fakalogo loa se kakai, pe ko se puleaga, kiate ia, Nepukatenesale, sau o Papilone, ti e leaise fia tuku loa e ia lona ua ke tau ki ai le amoga a le sau o Papilone, e kau tautea loa le puleaga lena ki le seleta, mo le oge, mo le taumasaki, e pati le Eteleno, o kaku ki laku maumaui a ia ki le lima o le sau o Papilone.

⁹ Ti ko koutou, aua na kotou fakalogo ki okoutou polofeta, mo okoutou kau kikite, mo okoutou kau moe miti, mo latou e sivi ia le lagi, ti mo latou ala fai nea fakatalatupua, ala e pati atu kia koutou : E leaise kotou tausi loa ki le sau o Papilone !

¹⁰ Talie ko le loi lena e lotou kikite atu kia koutou, o tupu ke ave mamao koutou mei lokoutou fenua, o tupu ke kau kapu koutou ti ke kotou mamate.

¹¹ Kae ko le puleaga leia e tali ia ke peluki lona ua o tali le amoga a le sau o Papilone, o fakalogo kiate ia, e kau tuku loa a ia ke nofo i lona fenua, e pati le Eteleno, o gaoi i lona kele ti mo nofo i ai.

¹² Na kau fakasa foki a nea fuli anei kia Setesiasi, sau o Suta : Kotou peluki lokoutou ua o tali le amoga a le sau o Papilone, kotou fakalogo kiate ia mo lona kakai, ti e kotou mauli loa.

¹³ Kolea e kotou mamate ai loa, a koe mo lou kakai i le seleta, mo le oge, mo le taumasaki, o mulimuli ki le nea leia kua fakasa e le Eteleno ki le puleaga leia e leaise fakalogo loa ki le sau o Papilone ?

¹⁴ Aua na kotou fakalogo ki folafola a kau polofeta ala e pati atu kia koutou : E leaise kotou tausi loa ki le sau o Papilone ! Talie ko le loi leia e lotou fakasa atu kia koutou.

¹⁵ E pati le Eteleno : Na leaise kau kakau atu latou, kae e lotou kikite le loi i loku suafa, o tupu ke kau kapu koutou ti ke kotou mamate, a koutou mo kau polofeta ala e kikite kia koutou.

¹⁶ Na kau pati ki le kau faisakilifisio mo le kakai katoa leinei : E folafola le Eteleno, o pati : Aua na kotou fakalogo ki folafola a akoutou kau polofeta, ala e kikite atu kia koutou, o pati : Ko leinei, kua vave loa le toe aumai o ipu o le fale o le Eteleno mei Papilone ! Talie ko le loi lena e lotou kikite atu kia koutou.

¹⁷ Aua na kotou fakalogo kia latou ; kotou fakalogo ki le sau o Papilone, ti e kotou mauli loa. Kolea e liliu ai loa le kolo leinei ko se kolo maumau ?

¹⁸ Kapau ko ni kau polofeta maoki latou, ti kapau e ia latou maoki le folafola a le Eteleno, ke lotou faikole ki le Eteleno o kau tau ke aua na fetuku ki Papilone a ipu ala na toe i le fale o le Eteleno, mo le fale o le sau o Suta, mo Selusalemi.

¹⁹ Talie e folafola le Eteleno o kau tau ki fa pou, mo le tanoa, mo fakavae, mo ipu ala na toe i le kolo leinei,

²⁰ Ala na leaise too e Nepukatenesale, sau o Papilone, i le aso leia na ave popula ai e ia mei Selusalemi ki Papilone a Sekonia, vosa o Sosakimi, sau o Suta, mo le kau lalasi fuli o Suta mo Selusalemi.

²¹ E folafola le Eteleno o kau tau, le Atua o Iselaele, ki ipu ala e toe i le fale o le Eteleno, mo le fale o le sau o Suta, mo Selusalemi :

²² E ave loa latou ki Papilone, ti e tuku loa latou i ai o kaku ki le aso leia e kau afa ai loa latou, ti e kau too loa latou mei ai, o toe aumai latou ki le ganea leinei, e pati le Eteleno.