Selemia 26 - Tosi Tapu

Fakasa o le maumaui o Selusalemi

¹ I le kamataaga o le sau o Sosakimi, vosa o Sosiasi, i Suta, na tuku mai loa kiate au le folafola a le Eteleno, o pati :

² E folafola le Eteleno, o pati : Tuu i le malae o le fale tapu o le Eteleno, o fakasa kia latou fuli o kolo o Suta, ala e au o tulolo i le fale o le Eteleno, a folafola fuli ala e kau fakatotonu atu ke fakasa kia latou. Aua na ke sau fua se kupu e tasi.

³ E lagi lotou fakalogo loa, ti e lotou tafoki loa taki tasi mei olatou ala veveli ; ti e kau fakasemala loa ki le veli leia na kau manatu ke fai kia latou o tupu ko le agaveli o alatou gaoi.

⁴ E ke pati loa kia latou : E folafola le Eteleno, o pati : Kapau e leaise kotou fakalogo i le temi leia e kau fakatotonu atu ai kia koutou ke mulimuli i laku lao leia na kau tuku ki okoutou mua,

⁵ Ke fakalogo ki folafola a aku tagata fakasausau, le kau polofeta, ala na kau kakau atu kia koutou, ala na kau kakau atu kia koutou koi usu ti na leaise kotou fakalogo kia latou,

⁶ Ti e kau tautea loa le fale leinei ofaipe Silo, ti e kau fakaliliu loa le kolo leinei ko se nea fakatupu malaia ki puleaga fuli o le kele.

⁷ Na logo loa le kau faisakilifisio, mo le kau polofeta, mo le kakai katoa ki le fakasa e Selemia o folafola ana i le fale o le Eteleno.

⁸ Ti koi fakaoki e Selemia le fakasa o nea fuli ala na fakatotonu e le Eteleno kiate ia ke tuku ki le kakai katoa, na too loa e le kau faisakilifisio, mo le kau polofeta, mo le kakai katoa a Selemia, o pati : E ke mate loa !

⁹ Kolea e ke kikite ai i le suafa o le Eteleno, o pati : E fai loa le fale leinei pe Silo, ti e maumaui loa le kolo leinei, ti e leaise toe nofoi loa a ia ? Ti na mumui loa le kakai katoa kia Selemia i le fale o le Eteleno.

¹⁰ I le logo a le kau pule o Suta ki nea ana, na lotou pale loa mei le fale o le sau ki le fale o le Eteleno, o nonofo i le uluaga o le matapa foou o le fale o le Eteleno.

¹¹ Ti na masau loa le kau faisakilifisio mo le kau polofeta ki le kau pule mo le kakai katoa, o pati : E tonu ke mate le tagata leinei, talie kua kikite a ia ki le kolo leinei ofaipe le nea leia kua logo ki ai okoutou taliga.

¹² Na pati loa Selemia ki le kau pule fuli mo le kakai katoa : Na kakau mai au e le Eteleno ke kikite ki le fale leinei mo le kolo leinei a nea fuli ala kua kotou logo ki ai.

¹³ I le lakaga nei, kotou fetogi okoutou ala mo akoutou gaoi, kotou fakalogo ki le leo o le Eteleno, lokoutou Atua, ti e fakasemala loa le Eteleno ki le veli leia kua fakatotonu e ia ke fai kia koutou.

¹⁴ Kae kiate au, ko leinei au i okoutou lima ; kotou fai kiate au le nea leia e kotou manatu e malie mo totonu.

¹⁵ Kae ke kotou iloa fua, kapau e kotou tamate au, e kotou amo loa le toto mea, e koutou, mo le kolo leinei, mo lona kakai ; talie na kakau maoki mai au e le Eteleno kia koutou, ke fakasa ki okoutou taliga a folafola fuli anei.

¹⁶ Na pati loa le kau pule mo le kakai katoa ki le kau faisakilifisio mo le kau polofeta : E leaise tonu ke mate le tagata leinei ; talie kua masau a ia kia tatou i le suafa o le Eteleno, lotatou Atua.

¹⁷ Kae na tutuu ake loa ki aluga ni iki i le kau matua o le fenua, o pati ki le kakai katoa :

¹⁸ Na kikite a Mikea, mei Moleseti, i le temi o Esekiasi i Suta, ti na pati a ia ki le kakai katoa o Suta : E folafola le Eteleno o kau tau : E fakamalu loa Sione ofaipe se faisaga, E liliu loa Selusalemi ko se tuuga fatu, Ti mo le mauga o le fale ko se ulu vao lalasi.

¹⁹ Pe na tamate loa a ia e Esekiasi, sau o Suta, mo Suta katoa ? Pe na leaise i loa Esekiasi ki le Eteleno ? Pe na leaise tagi loa a ia ki le Eteleno ? Koia na fakasemala loa le Eteleno ki le veli leia na puaki e ia kia latou. Ti ko tatou, pe tou amo loa se tukipo lasi feneeki ?

²⁰ Na i ai foki se tagata leia na kikite i le suafa o le Eteleno, ko Uli, vosa o Semaesa, mei Kiliate-Sealimi. Na kikite loa a ia ki le kolo leinei mo le fenua leinei o tatau oki mo le nea leia na fakasa e Selemia.

²¹ Na logo loa le sau ko Sosakimi, mo ana tagata toa fuli, mo lana kau pule ki masau a Uli, ti na afa loa e le sau ke tamate a ia. I le logo a Uli ki le nea lena, na i loa a ia ti na sola loa a ia ki Esipito.

²² Ti na kakau loa e le sau ko Sosakimi ni tagata avelogo ke ano ki Esipito, ko Elenatane, vosa o Akepole mo ni iki ake kakai, ke too a ia mei Esipito.

²³ Na lotou too loa a Uli mei Esipito, o ave ki le sau ko Sosakimi, leia na fakatotonu ia loa ke tamate a ia ki le seleta, ti na ti loa lona tino ki le tano o le kakai noa.

²⁴ Kae na kau loa le lima o Asikame, vosa o Safani, mo Selemia, ti na taofi loa e ia ke aua na tuku a ia ki le kakai ke tamate.