Selemia 25 - Tosi Tapu

Ko fetuu e kau fitu o le popula

¹ Na tuku loa le folafola kia Selemia ki le kakai katoa o Suta, i le fetuu fa o Sosakimi, sau o Suta, vosa o Sosiasi, - ko le uluaki fetuu a ia o Nepukatenesale, sau o Papilone, -

² Ti na fakasa loa e Selemia le folafola i mua o le kakai katoa o Suta mo le kakai katoa o Selusalemi, o pati :

³ Talu mei le fetuu kau agafulu tupu tolu o Sosiasi, sau o Suta, vosa o Amone, o kaku mai ki le aso nei, kua fetuu kau lua tupu tolu talu mei le tuku mai e le Eteleno lana folafola kiate au. Na kau masau kia koutou, ti na kau masau kia koutou koi usu, kae na leaise kotou fakalogo.

⁴ Na kakau mai e le Eteleno kia koutou ana tagata fakasausau fuli, le kau polofeta, ti na kakau mai e ia latou kia koutou koi usu, kae na leaise kotou fakalogo, ti na leaise tokaga okoutou taliga.

⁵ Na lotou pati : Kotou tasi tafoki mai mei lona ala veli, mei le agaveli o akoutou gaoi, ti e kotou nonofo loa i le fenua leia na kau soli kia koutou mo okoutou tamana, mei tautupu ki tautupu.

⁶ Aua na kotou ano i muli o ni iki ake atua kese, o tausi kia latou mo tulolo i olatou mua. Aua na kotou fakatupu loku sausau ki le gaoiaga o okoutou lima, ti e leaise kau fai loa kia koutou se nea veli.

⁷ Kae na leaise kotou fakalogo mai kiate au, e pati le Eteleno, ke fakatupu ai loku sausau ki le gaoiaga o okoutou lima, ki lokoutou malaia.

⁸ Koia e folafola le Eteleno o kau tau, o pati : Talie na leaise kotou fakalogo ki aku folafola,

⁹ E kau kakau loa ke ano o afa mai a atu puleaga fuli o le potu noleto, e pati le Eteleno, ti e kau kakau loa ke au laku tagata fakasausau ko Nepukatenesale, sau o Papilone : E kau kakau mai loa a ia ke au o taui le fenua leinei mo lona kakai, mo puleaga fuli i ona tafatafa, o tupu ke maumaui fuli latou, ti ke fakaliliu le fenua leinei ko se kele maumau, leia ka kata loa ki ai mo mapu loa ki ai i lona fakaii.

¹⁰ E kau fakagato loa ia latou a kalaga fakafiafia mo kalaga nekenekea, a sua a le tama feauaki mo sua a le taine feauaki, le logoa o le fatu fakamalu fulumeto mo le ula o le malama.

¹¹ E liliu loa le fenua katoa leinei ko se kele maumau, mo se toafa, ti e popula loa a puleaga ana ki le sau o Papilone i fetuu e kau fitu.

¹² Kae ka katoa loa a fetuu ana e kau fitu, e kau tautea loa le sau o Papilone mo le puleaga lena, e pati le Eteleno, o tupu ko lalatou agaveli ; e kau fakatua loa le fenua o le kau Kaletea, ti e kau fakaliliu loa a ia ko se maumau lee gato.

¹³ E kau kakau mai loa ki le fenua lena a nea fuli ala kua kau fakasa fakatomua o uiga mo ia, a nea fuli ala kua tosi i le tosi leinei, a nea ala kua fakasa e le polofeta ko Selemia o uiga mo atu puleaga fuli.

¹⁴ Talie e toe fakapopulai loa latou e ni puleaga makeke mo ni sau lalasi, ti e kau totogi loa kia latou o mulimuli ki alatou faiaga mo le gaoi o olatou lima.

Ko le tautea o atu puleaga fuli

¹⁵ Talie na masau mai kiate au le Eteleno, le Atua o Iselaele, o pati : Too i loku lima le ipu leinei kua apele i le vino o loku sausau, Ti ke fakainu a ia ki atu puleaga fuli Ala e kau kakau loa a koe ki ai.

¹⁶ E lotou inu loa, ti e lotou sisiga loa ti e lotou fai loa pe ni vale, Mo ka lotou tio loa ki le seleta leia e kau kakau loa kia latou.

¹⁷ Ti na kau too loa le ipu i le lima o le Eteleno, Ti na kau fakainu loa a ia ki atu puleaga fuli ala na kakau au e le Eteleno ki ai :

¹⁸ Ki Selusalemi mo kolo o Suta, Ki ona sau mo ona pule, Ke fakaliliu ai latou ko se maumau, Ko se nea fakaaloalofa, ko se nea fakagologolo, ti ko se nea fakamalaia, Ofaipe le nea leia e tio ki ai i le aso nei ;

¹⁹ Kia Falaone, sau o Esipito, Ki ana tagata fakasausau, mo ona pule, mo lona kakai katoa ;

²⁰ Ki Alapia katoa, ki sau fuli o le fenua o Ute, Ki sau fuli o le fenua o le kau Filisitini, Ki Asekaloni, ki Kasa, ki Ekeloni, ki le nea leia e toe i Asetoti ;

²¹ Ki Etome, ki Moape, ti mo fanau o Amone ;

²² Ki sau fuli o Tile, mo sau fuli o Sitone, Ti mo sau fuli o atu motu o leia fetuu o le tai ;

²³ Ki Tetane, mo Tema, mo Pusi, Ti mo latou fuli ala e tele olatou kaukava ;

²⁴ Ki sau fuli o Alapia, Ti mo sau fuli o le kau Alape ala e nonofo i le toafa ;

²⁵ Ki sau fuli o Simeli, Ki sau fuli o Elame, Ti mo sau fuli o Meti ;

²⁶ Ki sau fuli o le potu noleto, Feofi pe mamao, Ki la mo la, Ki atu puleaga fuli o le malama nei, Ala e nonofo i fuga o le kele. Ti e inu loa e le sau o Papilone o fakamulimuli.

²⁷ E ke pati loa kia latou : E folafola le Eteleno o kau tau, le Atua o Iselaele, o pati : Kotou inu, kotou konana, kotou lulua, Ti kotou sisiga o leaise toe tuu ki aluga, Mo ka kotou tio loa ki le seleta leia e kau kakau atu loa kia koutou !

²⁸ Ti kapau e lotou fakafiti ke too le ipu i lou lima o inu, E ke pati loa kia latou : E folafola le Eteleno o kau tau, o pati : E kotou inu loa !

²⁹ Talie ko leinei, kua kau kamata fai le veli I le kolo leia e kalagai ai loku suafa ; Ti ko koutou, pe kotou sala tautea loa ? E leaise kotou sala loa i le tautea ; Talie e kau kalagai loa le seleta ki kakai fuli o le malama nei, E pati le Eteleno o kau tau.

³⁰ Ti ko koe, e ke kikite loa kia latou a nea fuli ana, Ti e ke pati loa kia latou : E gugulu loa le Eteleno mei aluga ; E fakagugulu loa e ia lona leo mei lona nofoaga maokioki ; E gugulu loa a ia ki le ganea leia e tuu ai lona nofoaga ; E kalaga loa a ia ofaipe latou ala e takatakafi ia le fua o le vite i le ganea tatau vite, Ki kakai fuli o le malama nei.

³¹ E kaku loa le logoa ki potupotu o le malama nei ; Talie kua fefele le Eteleno mo atu puleaga, Ti kua fakamaui e ia tagata fuli, Ti kua tuku e ia le kau agaveli ki le seleta, e pati le Eteleno.

³² Koia e folafola ai le Eteleno o kau tau, o pati : Ko leinei, kua sosolo le malaia i atu puleaga, Ti kua malaga se afa lasi i potupotu o le malama nei.

³³ Ko latou ala e tamate loa e le Eteleno i le aso lena e tanaki loa Mei leia potu ki leia potu o le malama nei ; E leaise tagi loa kia latou, ti e leaise too loa latou, ti e leaise tanu loa latou. E lotou fai loa pe se nea fakagako kele i aluga o le kele.

³⁴ Kotou tagi laulau, tagata tausi manu, ti kotou kalaga ! Kotou fuliteka i le mugalafu, kau takitaki o kau manu, Talie kua soko mai a aso ala e tamate ai loa koutou. E kau fatifatii loa koutou, ti e kotou vivilo loa ki lalo ofaipe se ipu mauiga.

³⁵ E leaise toe maua loa se mumuniaga ki le kau tausi manu, Ti e leaise toe maua loa se saofakiaga ki le kau takitaki o kau manu !

³⁶ E logo ki tagi a le kau tausi manu, Ki tagi laulau a le kau takitaki o kau manu, Talie kua maumaui e le Eteleno olatou faisaga mutie.

³⁷ Kua maumaui a nofoaga malolo E le sausau kaka o le Eteleno.

³⁸ Kua tiaki e ia lona nofoaga ofaipe le tiaki e le uviki laione o lona nofoaga ; Talie kua liliu lolatou fenua ko se toafa I nea fakalialia o le tau, Ti mo lona sausau lasi.