Selemia 24 - Tosi Tapu

Kete fiki e lua ; fakasa o le tafoki o Suta

¹ Na fakatio loa au e le Eteleno ki ni kete fiki e lua ala na teki i mua o le fale tapu o le Eteleno, i le oki o le ave o Sekonia, sau o Suta, vosa o Sosakimi, e Nepukatenesale, sau o Papilone, mei Selusalemi ki Papilone, mo le kau pule o Suta, mo le kau tufuga laakau ti mo le kau tufuga ukamea.

² Na tuku ni fiki malilie saosaoa i se kete e tasi, ofaipe ni fiki o le uluaki taukai fiki, kae na tuku i leia ake a kete ni fiki veveli, ala na leaise feala ke kai, o tupu ko lolatou fua veveli.

³ Na pati mai loa le Eteleno kiate au : Selemia, kolea e ke tio ki ai ? Na kau tali loa : Ki ni fiki. Ko fiki malilie e malilie ai, ti ko fiki veveli e fua veveli ai, ti e leaise mafai ke kai latou o tupu ko lolatou fua veveli.

⁴ Na tuku mai loa kiate au le folafola a le Eteleno, o pati :

⁵ E folafola le Eteleno, le Atua o Iselaele : Ofaipe lau fakamailoga a fiki malilie ana, e kau fakamailoga loa, ke tuku kia latou loku alofa, le kau popula o Suta, ala na kau ave mei le ganea leinei ki le fenua o le kau Kaletea.

⁶ E kau tio loa kia latou i loku alofa, ti e kau toe aumai loa latou ki le fenua leinei ; e kau fakanofo loa latou i le fenua, ti e leaise kau toe maumaui loa latou, e kau to loa latou ti e leaise kau toe taaki loa latou.

⁷ E kau soli loa kia latou se mafu ke lotou iloa ko au ko le Eteleno ; e lotou liliu loa ko loku kakai, ti e kau liliu loa ko lolatou Atua, mo kapau e lotou toe liliu mai kiate au i lolatou loto katoa.

⁸ Ti e pati le Eteleno : Ofaipe fiki veveli ala e leaise feala ke kai o tupu ko lolatou fua veveli, e kau fai fenaaki loa kia Setesiasi, sau o Suta, mo lana kau pule, mo le toetoega o Selusalemi, latou ala na nonofo i le fenua leinei ti mo latou ala e nonofo i le fenua o Esipito.

⁹ E kau fakaliliu loa latou ko se nea fakaii mo se nea fakatupu lauveli ki puleaga fuli o le malama nei, ko se nea fakalumaluma, mo se nea fakagologolo, mo se nea fakakata, ti mo se nea fakatupu malaia i ganea fuli ala e kau kapu loa latou ki ai.

¹⁰ E kau kakau loa kia latou le seleta, mo le oge, mo le taumasaki, o kaku ki lolatou puli i le fenua leia na kau soli kia latou mo olatou tamana.