Selemia 23 - Tosi Tapu

Ko tausi manu agaveli mo polofeta loi

¹ Malaia ki tausi manu ala e maumaui ia mo fakamavete ia Le kau manu o loku lotoa ! e pati le Eteleno.

² Koia e folafola ai le Eteleno, le Atua o Iselaele, o pati Ki tagata tausi manu ala e fagai ia loku kakai : Na kotou fakamavete laku kau ovi, na kotou kapu latou, Na leaise kotou tokaga kia latou. Ko leinei, e kau tautea loa koutou o tupu ko le agaveli o akoutou gaoi, E pati le Eteleno.

³ Kae e kau fakatasi loa le toega o laku kau ovi Mei fenua fuli ala na kau kapu latou ki ai. E kau aumai loa latou ki lolatou lotoa ; E lotou fanaunau loa ti mo liuliuga loa.

⁴ E kau fakanofo loa kia latou ni kau tausi manu Ala e fagai ia loa latou. E leaise lotou toe i loa, pe toe gagae loa, Ti e leaise puli loa se ovi e tasi, e pati le Eteleno.

⁵ Ko leinei, e pati le Eteleno, e soko mai loa a aso, Ala e kau fakatupu ai loa kia Tavite se uli agatonu. E nofo loa a ia ko se sau poto mo manuia, E fai loa e ia le faitotonu mo le maoki i le fenua.

⁶ I lona temi, e fakamauli loa a Suta, E maua loa e Iselaele le fimalie i lona nofoaga ; Ti ko leinei le igoa leia e fakaigoa loa a ia ki ai : Le Eteleno lomatou faitotonu.

⁷ Koia e pati ai le Eteleno : E soko mai loa a aso, Ala e leaise toe pati ai loa : E mauli le Eteleno, A ia leia na fakamavae ia i le fenua o Esipito a fanau o Iselaele !

⁸ Kae e pati loa : E mauli le Eteleno, Leia na fakamavae ia ti na aumai ia Le sakoga o le fale o Iselaele mei le fenua o le potu noleto, Ti mo fenua fuli ala na kau kapu latou ki ai ! Ti e lotou nonofo loa i lolatou fenua.

⁹ Ki le kau polofeta. Kua fatifati loku loto iate au, Ti kua lulu oku ivi fuli. Kua kau faipe se tagata kona, Pe se tagata kua kona i se vino, O tupu ko le Eteleno, o tupu ko ana folafola maokioki.

¹⁰ Talie kua apele le fenua i tono ; Kua mamae le fenua o tupu ko le malaia ; Kua malo a potu faisaga o le toafa. Kua lotou makape ki le veli, Kua lotou makeke ata ki le fai o le agasala.

¹¹ Kua fakalialia le kau polofeta mo le kau faisakilifisio ; Ti kua kau maua foki i loku loto fale totonu alatou agaveli, E pati le Eteleno.

¹² Koia e liliu ai loa lolatou ala o sekeseke mo fakapouli, E tule loa latou, ti e lotou sisiga loa. Talie e kau aumai loa kia latou le malaia, I le fetuu leia e kau tautea ai loa latou, e pati le Eteleno.

¹³ Kua kau tio ki le fakavalevale i le kau polofeta o Samalia ; Kua lotou kikite i le igoa o Paale, Kua lotou fakasese loku kakai ko Iselaele.

¹⁴ Kae i le kau polofeta o Selusalemi, na kau tio ki ni nea e toe fakalialia ake ; E lotou fai tono, e lotou saele i le loi. E lotou fakamakeke a lima o le kau agaveli, O tupu ke aua na tafoki mai kiate au se tasi ia latou i lana agaveli. Kua lotou fai fuli ki oku mata pe Sotoma, Ti kua fai le kakai o Selusalemi pe Komola.

¹⁵ Koia e folafola ai le Eteleno o kau tau, o pati ki le kau polofeta : Ko leinei, e kau fagai loa latou ki le laakau kona, Ti e kau fakainu loa latou ki se vai kona ; Talie kua mafola le tausi veli ki le Atua i le fenua katoa O tupu ko kau polofeta o Selusalemi.

¹⁶ E folafola le Eteleno o kau tau, o pati : Aua na kotou fakalogo ki masau a le kau polofeta, ala e faikikite atu kia koutou ! E lotou toso koutou ki ni nea noa ; E lotou fakasa a manatu o olatou loto, Kae leai le nea leia e au mei le gutu o le Eteleno.

¹⁷ E lotou pati kia latou ala e vesia kiate au : Na pati le Eteleno : E kotou maua loa le tokamalie ; Ti e lotou pati kia latou fuli ala e saele o mulimuli ki oli o olatou loto : E leaise soko loa se veli kia koutou.

¹⁸ Ko ai na kau i le fono a le Eteleno, O tio, mo logo ki lana folafola ? Ko ai na tokaga lona taliga ki lana folafola, ko ai na logo ki ai ?

¹⁹ Ko leinei, kua to le afa a le Eteleno, Kua mu lona sausau, Kua oso le veli, Kua vilo a ia ki ulu o le kau agaveli.

²⁰ E leaise toe fimalie loa le sausau o le Eteleno, O kaku ki le oki o lana fakasoko, mo lana fai a fakatuutuu o lona loto. E kotou matala loa ki ai i temi ki muli.

²¹ Na leaise kau kakau a polofeta ana, kae na lotou makape ; Na leaise kau masau fua kia latou, kae na lotou faikikite.

²² Ka na lotou kau ki laku fono, Na lotou fakasa loa aku folafola ki loku kakai, Ke fakatafoki mai latou mei olatou ala veveli, mei lalatou agaveli.

²³ E pati le Eteleno : Pe ko se Atua au leia e tio toetoe ? Pe leaise ko se Atua foki au leia e tio mamao ?

²⁴ Pe tuu loa se tasi i se ganea munia, Kae leaise kau tio kiate ia ? e pati le Eteleno. Pe leaise kau fakaapele ia a atu lagi mo le kele ? e pati le Eteleno.

²⁵ Na kau logo ki le nea leia na fakasa e le kau polofeta, ala na kikite ia le loi i loku suafa, o pati : Na kau fai se moe ! Na kau fai se moe !

²⁶ E kaku loa kiafea le fia kikite e kau polofeta ana le loi, Lalatou kikite le kaka o olatou loto ?

²⁷ E lotou loto ke fakagaloi loku suafa i loku kakai Ki moemiti ala e lotou tasi fakamatala ki lona oloi, Ofaipe le galoi o loku suafa e olatou tamana o tupu ko Paale.

²⁸ Ke fakamatala e le polofeta leia na fai ia se moemiti lana moe, Ti ke fakasa laku folafola i le maoki e leia na logo ki laku folafola. Kolea e filo ai le penu mo le fulumeto ? e pati le Eteleno.

²⁹ Pe leaise fai laku folafola pe se afi, e pati le Eteleno, Pe se amale leia e fatifati ia le fatu ?

³⁰ Koia e folafola ai le Eteleno, o pati : Ko leinei, e kau vesia ki le kau polofeta Leia e fekaiaaki ia latou aku folafola.

³¹ Ko leinei, e pati le Eteleno, e kau vesia ki le kau polofeta, Ala e too ia lalatou masau totonu ti e lotou tuku a ia ko laku folafola.

³² Ko leinei, e pati le Eteleno, kau vesia kia latou ala e kikite ia ni moemiti loi, Ala e fakasese ia loku kakai Ki alatou loi mo alatou kaka ; Kae na leaise kau kakau fua latou, na leaise kau tuku fua kia latou se fakatotonu, Ti e leai solatou ga aoga fua ki le kakai leinei, e pati le Eteleno.

³³ Kapau e vesili atu kiate koe le kakai leinei, pe ko se polofeta, pe ko se tagata faisakilifisio : Kolea le kavega mamafa a le Eteleno ? E ke pati loa kia latou : Ko koutou ala ko se kavega mamafa, e pati le Eteleno, Koia e kau tiaki ai loa koutou.

³⁴ Ti kapau e masau loa se polofeta, pe ko se tagata faisakilifisio, pe ko se tasi o le kakai Ki se kavega mamafa leia na tuku e le Eteleno, E kau tautea loa le tagata lena, a ia mo lona fale.

³⁵ E kotou pati loa, leia ki lona oloi, leia ki lona taina : Kolea le tali a le Eteleno ? Kolea le pati a le Eteleno ?

³⁶ Kae e leaise kotou toe pati loa : Ko le kavega mamafa a le Eteleno ! Talie e liliu loa le masau a le tagata ko se kavega mamafa kiate ia totonu ; Talie kua kotou pikoi a folafola a le Atua mauli, A le Eteleno o kau tau, lotatou Atua.

³⁷ E ke pati loa ki le polofeta : Kolea le tali a le Eteleno kiate koe ? Kolea le pati a le Eteleno ?

³⁸ Ti kapau e kotou toe pati : Kavega mamafa a le Eteleno ! Ti e folafola le Eteleno, o pati : O tupu e kotou puaki le kupu lena : Kavega mamafa a le Eteleno ! Kae na kau kakau atu kia koutou se tasi ke fakasa kia koutou : Aua na kotou pati : Kavega mamafa a le Eteleno !

³⁹ O tupu ko le nea lena ko leinei, e kau fakagaloi loa koutou, Ti e kau tiaki loa koutou, koutou mo le kolo leia na kau soli kia koutou mo okoutou tamana, E kau tiaki loa koutou ke mamao i oku mata.

⁴⁰ E kau tuku loa kia koutou se luma lee gato, Ti mo se mele lee gato, Ala e leaise toe galo loa.