Selemia 22 - Tosi Tapu

Le tautea o sau fakamuli o Suta

¹ E folafola le Eteleno, o pati : Ifo ki le fale o le sau o Suta, ti ke fakasa loa i ai le folafola leinei.

² E ke pati loa : Fakalogo mai ki le folafola a le Eteleno, sau o Suta, leia e ekeeke i le ekeekeaga fakasau o Tavite, a koe, mo au tagata fakasausau, mo lou kakai, koutou ala e feanoaki i matapa anei !

³ E folafola le Eteleno, o pati : Kotou fai le faitotonu mo le agatonu ; kotou saofaki leia kua fakamakeke mei lima o leia e fakamakeke ake kiate ia. Aua na kotou fakavelivelii le matapule, mo le fanau sala matua, mo le fafine lokonui. Aua na kotou agaveli, ti aua na kotou liligi le toto o le tagata agatonu i le ganea leinei.

⁴ Talie kapau e kotou mulimuli ki le folafola leinei, e ulu loa a sau ala e tonatona i le ekeekeaga fakasau o Tavite i matapa o le fale leinei, i ni saliote mo ni osi, latou, mo alatou tagata fakasausau ti mo lolatou kakai.

⁵ Kae kapau e leaise kotou fakalogo ki folafola anei, e kau fakapapau iate au totonu, e pati le Eteleno, e maumaui loa le fale leinei.

⁶ Talie e folafola le Eteleno ki le fale o le sau o Suta, o pati : E ke fai kiate au pe Kalaate, pe le tumutumu o le mauga o Lipane ; Kae e maoki e kau fakaliliu loa a koe ko se toafa, Ko se kolo sala kakai.

⁷ E kau teuteui kiate koe ni kau tagata maumau, O tasi mo ia ana masafu ; E lotou tuuti loa ou sete fulumalilie, Ti e lotou laku loa latou ki le afi.

⁸ E fakalaka loa ni puleaga mauke i tafa o le kolo leinei, Ti e lotou femasauaki loa : Kolea kua fai feneeki ai e le Eteleno le kolo lasi leinei ?

⁹ Ti e tali loa kia latou : Talie na lotou tiaki Le sai a le Eteleno, lolatou Atua, Talie na lotou punou i mua o ni atua kese, ti na lotou tausi kia latou.

Kia Soakase

¹⁰ Aua na kotou tagi ki leia kua mate, Ti aua na kotou tagi laulau kiate ia ; Kotou tagi, kotou tagi ki leia e ano, Talie e leaise toe liliu mai loa a ia, E leaise toe tio loa a ia ki le fenua leia na tupu ai.

¹¹ Talie e folafola le Eteleno kia Salume, sau o Suta, vosa o Sosiasi, Leia na sau o fetogi Sosiasi, lona tamana, Ti na mavae i le ganea leinei : E leaise toe liliu mai loa a ia ki leinei ;

¹² Kae e mate loa a ia i le ganea leia e ave popula a ia ki ai, Ti e leaise toe tio loa a ia ki le fenua leinei.

Kia Sosakimi

¹³ Malaia kiate leia e laga ia lona fale i le lee faitotonu, Ti e fakalasi ia ona lau fata i le agaveli, Leia e fakagaoi ia lona oloi kae leaise totogi, Kae leaise se soli kiate ia lona totogi !

¹⁴ Leia e pati : E kau fakatuu loa se fale lasi kiate au, Ti mo ni kogafale lalasi, Ti e fai ia loa ni ona katupa, Ti e aofi ia loa a paa ki le sete, Ti e pena ia loa a ia ki le pena kula !

¹⁵ Pe ke loto ke fakasa kua ke sau, o filifili le sete ke ke mailoga ai ? Na kai ti na inu lou tamana ofaipe tagata fuli, Kae na fai e ia le faitotonu mo le maoki, Ti na manuia a ia.

¹⁶ Na fakamaau e ia i le faitotonu le mativa mo le fakaaloalofa, Ti na manuia a ia. Pe leaise ko lena loku iloa ? e pati le Eteleno.

¹⁷ Kae kua ke tuku ata ou mata mo lou loto Ki le manumanu koloa, Ke liligi le toto mea, Ke fai le fakaveliveli mo le fakamakeke.

¹⁸ Koia e folafola le Eteleno, o pati kia Sosakimi, vosa o Sosiasi, sau o Suta : E leaise tagi loa kiate ia, o pati : Oiau, loku taina ! Oiau loku tuagaane ! E leaise tagi loa kiate ia, o pati : Oiau, aliki ! Oiau, lona agai !

¹⁹ E tanu loa a ia ofaipe se asino, E toso loa a ia o ti ki fafo mei matapa o Selusalemi ki le tua kolo.

Kia Sosakimi

²⁰ Pale ki le Lipane, o kalaga ! Kalaga leo lasi ki Pasani ! Kalaga i aluga o Apalimi ! Talie kua fatifati latou fuli ala na alofa kiate koe.

²¹ Na kau masau kiate koe i le temi o lou manuia ; Kae na ke pati : E leaise kau fakalogo loa. Na ke fai fenaaki talu mei lou ikiiki ; Na leaise ke fakalogo ki loku leo.

²² E seu loa e le matagi lau kau tausi manu katoa, Ti e ave popula loa latou ala e alofa kiate koe ; Ti e ke luma maoki loa mo matagafua, O tupu ko au agaveli fuli.

²³ A koe leia e nofo i aluga o le Lipane, Leia kua fau lou ofaga i sete, E ke tagi mamae loa mo ka kaku atu loa kiate koe a mamae, Io, a mamae ofaipe la o se fafine fanau !

Kia Sekonia

²⁴ E pati le Eteleno : E kau mauli ! Ka soko loa Sekonia, sau o Suta, vosa o Sosakimi, Ko se mama i loku lima atamai, E kau taaki loa a koe mei ai.

²⁵ E kau tuku loa a koe ki lima o latou ala e loto ki lou mauli, Ki lima o latou ala e ke lulu i olatou mua, Ki lima o Nepukatenesale, sau o Papilone, Ki lima o le kau Kaletea.

²⁶ E kau ti loa a koe, a koe mo lou tinana leia na fanaui ia a koe, Ki se tasi ake fenua leia na leaise kolua tupu ai, Ti e kolua mamate loa i ai.

²⁷ Kae ko le fenua leia e lotou oli ke toe liliu ki ai, E leaise lotou toe liliu loa ki ai.

²⁸ Pe ko se ipu veli mo mafaa a Sekonia ? Pe leaise alofa ki ai se tasi ? Kolea kua tiaki ai latou, a ia mo lona sakoga, Ti kua kapu ai latou ki se fenua leia e leaise lotou iloa ?

²⁹ Kele, kele, kele, Fakalogo ki le folafola a le Eteleno !

³⁰ E folafola le Eteleno, o pati : Kotou tosi le tagata leinei e sala fanau, Ofaipe leia e leaise manuia loa i lona mauli, Talie e leaise mafai loa e se tasi o lona sakoga Ke eke i le ekeekeaga fakasau o Tavite, O pule i Suta.