Selemia 21 - Tosi Tapu

Le tali ki le sau ko Setesiasi

¹ Ko leinei le folafola leia na tuku e le Eteleno kia Selemia, i le aso leia na kakau ai e le sau ko Setesiasi a Pasule, vosa o Malekisa, mo Sofoni, le tagata faisakilifisio, vosa o Maasesa, ke ano kiate ia, o pati :

² Afa le finegalo o le Eteleno kia tatou ; talie ko leinei kua au Nepukatenesale, sau o Papilone, o taui tatou ; E lagi fai loa e le Eteleno kia tatou se milakulo ke fakamamao ai Nepukatenesale meia tatou.

³ Na tali loa Selemia kia latou : E kotou pati loa kia Setesiasi :

⁴ E folafola le Eteleno, le Atua o Iselaele, o pati : Ko leinei e kau fakamaliu loa a masafu ala e too i okoutou lima, ala e kotou taui ai i le tua kolo le sau o Papilone mo le kau Kaletea ala e takatakai ia koutou, ti e kau fakatasii mai loa latou ki loto malie o le kolo leinei.

⁵ Ti e kau tau loa kia koutou ki loku lima falo mo loku lima makeke, i loku sausau kaka mo fakaii.

⁶ E kau taai loa le kakai o le kolo leinei, a tagata mo manu. E lotou mamate loa i se taumasaki veli.

⁷ E pati le Eteleno : I le oki o le nea lena, e kau tuku loa Setesiasi, sau o Suta, mo ana tagata fakasausau, mo le kakai, mo latou o le kolo leinei ala na sao loa mei le taumasaki, mo le seleta, mo le oge, ti e kau tuku loa latou ki lima o Nepukatenesale, sau o Papilone, mo lima o olatou fili, mo lima o latou ala e loto ki lolatou mauli ; ti e taai loa latou e Nepukatenesale ki le mata o le seleta, ti e leaise fakamauli loa e ia latou, ti e leaise maua loa e ia se ga alofa pe ko se ga manava alofa e tasi.

⁸ E ke pati loa ki le kakai lena : E folafola le Eteleno, o pati : Ko leinei, kua kau tuku i okoutou mua le ala o le mauli mo le ala o le mate.

⁹ Ko leia e nofo loa i le kolo leinei e mate loa i le seleta, mo le oge, mo le taumasaki ; kae ko leia e mavae loa o ano ki le kau Kaletea ala e takatakai ia koutou e mauli loa a ia, ti e liliu loa lona mauli ko lona koloa.

¹⁰ Talie kua kau tuku oku mata ki le kolo leinei, ke fai kiate ia le veli kae leai le malie, e pati le Eteleno ; e tuku loa a ia ki lima o le sau o Papilone, leia e tutu ia loa a ia ki le afi.

¹¹ Ti e ke pati loa ki le fale o le sau o Suta : Kotou fakalogo ki le folafola a le Eteleno !

¹² Fale o Tavite ! E folafola le Eteleno, o pati : Kotou kamata okoutou aso i le fai o ni fakamaau i le faitotonu, Kotou fakalauatea le tagata popula i lima o lona pule, Ke aua na vilo loku sausau ofaipe se afi, Ti ke aua na ula a ia kae e leaise mafai loa lona tamate, O tupu ko le agaveli o akoutou gaoi.

¹³ Ko leinei, e kau mamae kiate koe, Kolo leia e tonatona i le vaivailiua, i aluga o le utu o le toafa, E pati le Eteleno, Kia koutou ala e pati : Ko ai e ifo mai loa kia matou ? Ko ai e ulu loa ki omatou nofoaga ?

¹⁴ E kau tautea loa koutou o mulimuli ki fua o akoutou gaoi, e pati le Eteleno ; E kau tuku loa le afi ki lokoutou vaomatua, Ti e kai loa e ia a nea fuli i ona tafatafa.