Selemia 20 - Tosi Tapu

¹ Na logo loa Pasule, vosa o Imele, tagata faisakilifisio pule i le fale o le Eteleno, ki le fakasa e Selemia o nea ana.

² Ti na paai loa e Pasule le polofeta ko Selemia, ti na velo loa e ia a ia ki le pilisoni leia na tuu i le matapa aluga o Pesamino, i le fale o le Eteleno.

³ I le ala usu ake, na fakamavae loa e Pasule a Selemia mei le pilisoni. Ti na pati loa Selemia kiate ia : E leaise ko le igoa leia ko Pasule e tuku atu e le Eteleno kiate koe, kae ko leia o Makole-Misapipe.

⁴ Talie E folafola le Eteleno, o pati : E kau tuku loa a koe ki le mamae, a koe mo ou kaukau nea fuli ; e lotou mamate loa i le seleta o olatou fili, ti e tio tonu loa ou mata ki ai. E kau tuku foki mo Suta katoa ki lima o le sau o Papilone, ala e ave popula ia loa latou ki Papilone, ti e tamate loa e ia latou ki le seleta.

⁵ E kau tuku loa a koloa fuli o le kolo leinei, mo fua fuli o lana gaoi, mo ana nea mauiga fuli, ti e kau tuku loa a koloa fuli o sau o Suta ki lima o olatou fili, ala e maumaui ia loa latou, mo too ia loa latou, ti mo ave ia loa latou ki Papilone.

⁶ Ti ko koe, Pasule, mo latou fuli ala e nonofo i lou fale, e kotou ano loa o popula ; e ke ano loa ki Papilone, ti e ke mate loa i ai, ti e ke tanu loa i ai, a koe mo ou kaukau nea fuli ala kua ke kikite loi ki ai.

Tagi a Selemia

⁷ Eteleno, na ke akonaki mai kiate au, ti na kau tui ki au folafola ; Na ke too au ki lou lima, ti na ke malo iate au. Ti kua kau liliu ko se nea fakagologolo i le aso katoa, Kua gologolo le fenua katoa kiate au.

⁸ Talie i temi fuli e kau masau ai, e tonu ke kau kalaga, Ke kau valoki le aga fakamakeke mo le fakaveliveli ! Ti kua liliu le folafola a le Eteleno kiate au ko se nea fakatupu luma ti mo se nea fakagologolo i aso fuli.

⁹ Kapau e kau pati : E leaise kau toe masau loa kiate ia, E leaise kau toe masau loa i lona suafa, E i ai i loku loto ofaipe se afi kaka, Leia e nofo i oku ivi. E kau faiga ke taofi a ia, kae e leaise kau mafai a ia.

¹⁰ Talie e kau logo ki masau veli a le toka api kiate au : Kua taka le fakaii i potu fuli. Kotou tukugavelii a ia, ti e motou tukugavelii loa a ia ! Kua lamalama au e latou fuli ala na tokamalie mo au pe kau siga, o pati : E siga loa a ia i se temi ti tou tapo loa a ia, Ti e tou pule loa kiate ia, E tou totogi loa kiate ia !

¹¹ Kae e nofo le Eteleno mo au ofaipe se tagata toa makeke. Koia leia e tukia ai latou ala e fakaveliveli mai kiate au, ti e leaise lotou malo loa iate au ; E lotou apele loa i le luma talie na leaise soko alatou fakakaukau : Ko se matagafua lee gato lena kia latou, leia e leaise toe galo loa.

¹² E asiasii e le Eteleno o kau tau le tagata agatonu, E ului e ia a ifiifi mo mafu. E kau tio loa ki le vilo o lou sausau kia latou, Talie ko koe leia e kau tuku ki ai loku mauli.

¹³ Kotou sua ki le Eteleno, kotou fakafetai ki le Eteleno ! Talie e saofaki e ia le laumalie o le tagata fakaaloalofa i lima o le kau agaveli.

¹⁴ Ke malaia le aso leia na kau tupu ai ! Ke aua na tapuaki Ki le aso leia na fanaui ai au e loku tinana !

¹⁵ Ke malaia le tagata leia na ave ia le logo lena ki loku tamana : Kua tupu se vosa kiate koe, Ke fakaapele ia a koe i le fiafia !

¹⁶ Ke liliu le tagata lena ofaipe kolo Ala na maumaui fakaveliveli e le Eteleno ! Ke logo a ia ki ni tagi mamae i le usu, Ti mo ni kalaga tau i le lalatea !

¹⁷ Kolea na leaise kau mate ai i le manava o loku tinana ! Kolea na leaise liliu ai a ia ko loku tanuma ! Kolea na leaise tinae ai a ia o lee gato !

¹⁸ Kolea na kau vilo ai i le manava o loku tinana, O kau tio ai ki le fitaa mo le mamae, Ti mo kau fakaoki ai oku aso i le luma ?