Selemia 2 - Tosi Tapu

Valoki o le kakai o Suta

¹ Na tuku mai loa le folafola a le Eteleno kiate au, o pati :

² Ano o kalaga ki taliga o Selusalemi : E folafola le Eteleno, o pati : E kau manatui lou alofa i le temi na ke ikiiki ai, Lou mamana i le temi na ke feauaki ai mo au, Leia na ke mulimuli ai iate au i le toafa, I se kele leia na leaise mauli ai se nea.

³ Na fakatapu Iselaele ki le Eteleno Na liliu a ia ko uluaki fua o lona tupu. Ko latou fuli ala na kai kiate ia na agasala, Ti na vilo le malaia kia latou, e pati le Eteleno.

⁴ Kotou fakalogo mai ki le folafola a le Eteleno, fale o Sakopo, Ti mo koutou fuli, famili o le fale o Iselaele !

⁵ E masau le Eteleno, o pati : Kolea le veli leia na maua e okoutou tamana iate au, Ke lotou fakamamao ai iate au, Ti ke lotou mulimuli ai i ni nea noa, Ke lotou liliu ai ko ni nea noa ?

⁶ Na leaise lotou pati : Kofea le Eteleno, Leia na fakamavae ia matou i le fenua o Esipito, Leia na taki ia matou i le toafa, I se kele malo mo apele i popoko, I se kele leia e pule ai le taulaa mo le malu o le mate, I se kele leia e leaise ano ai fua se tasi, Ti e leaise nofo ai fua se tasi ?

⁷ Na kau aumai koutou ki se fenua e faipe se faisaga laakau fua, Ke kotou kai a fua o laakau ti mo fua malilie o le kele. Kae na kotou au, ti na kotou fakakelekele loku fenua, Ti na kotou fakaliliu loku tofiga ko se nea fakalialia.

⁸ Na leaise pati a tagata faisakilifisio : Kofea le Eteleno ? Ko latou ala na maua ia le lao na leaise iloa ia au, Na leaise agatonu le kau tausi ovi kiate au, Na faikikite le kau polofeta i le igoa o Paale, Ti na lotou mulimuli ia latou ala e leaise mafai ke tokoi kia latou.

⁹ Koia e pati le Eteleno : E kau loto ke kau toe masau kia koutou, E kau loto ke kau masau ki akoutou fanau ti mo fanau o akoutou fanau.

¹⁰ Kotou ano ki atu motu o Kitimi, ti kotou tio ! Kotou kakau se tasi ki Ketale, ti kotou fakakaukau, Ti kotou tio pe lotou tatau mo koutou !

¹¹ Pe i ai se puleaga leia e fetogi ia ona atua, Logo ai e leaise ko ni atua latou ? Kae na fetogi e loku kakai lona kololia ki se nea leia e leai sona ga aoga fua !

¹² Atu lagi, kotou ofolele i le nea lena, Kotou lulu i le i ti mo le fakalialia !

¹³ Talie na fai e loku kakai ni agasala e lua : Na lotou tiaki au, leia ko se matapuna o le vai mauli, Ti na lotou kenu kia latou ni sosoni, ni sosoni mafaafaa, Ala e leaise taofi ia le vai.

¹⁴ Pe ko Iselaele ko se tagata popula na totogi, pe ko se vosa na tupu i le fale ? Leai ! Ti kolea e liliu ai a ia ko le nea kai a atu puleaga ?

¹⁵ E gugulu kiate ia a uviki laione, mo itaita kiate ia, Ti e lotou maumaui lona fenua. Kua tutu ona kolo, ti e leaise koi nofo i ai ni kakai.

¹⁶ Ti kua au foki mo fanau o Nofi mo Tasepanase O tele lou tumuaki.

¹⁷ Pe leaise soko le nea lena kiate koe, O tupu ko lau tiaki ia le Eteleno, lou Atua, Leia na taki ia a koe i le ala totonu ?

¹⁸ Ti ko leinei, kolea le malie o lau ano ki Esipito, O inu le vai o le Nile ? Kolea le malie o lau ano ki Asilia, O inu le vai o le vaitafe ?

¹⁹ E tautea loa a koe e lou agaveli, ti e taai loa a koe e lou agatuu. E ke iloa loa ti e ke tio loa ko se nea veli mo kona Le tiaki o le Eteleno, lou Atua, Ti mo le leaise maua se i kiate au, E pati le Aliki, le Eteleno o kau tau.

²⁰ Kua fualoa ai lau fatii lau amoga, Lau motusi ou sai, Ti na ke pati : E leaise koi kau loto ke kau popula ! Kae i atu mauga liliki taualuga fuli, Ti mo lalo o laakau lalasi fuli, Kua ke punou ofaipe se fafine faiaga.

²¹ Na kau to a koe ofaipe se vite malie, Leia na to ki se pulapula malie tukupau. Kolea na ke fetogi ai, Na ke liliu ai o veli ofaipe se vite matapule ?

²² Pe ke maanu loa ki se sota, Pe ke fakaaoga loa se topa lasi, E mailoga tuumau loa lau agaveli i oku mua,. E pati le Aliki, le Eteleno.

²³ E feaki loa lau pati : Na leaise kau fakakelekele, Na leaise kau ano ki Paale ? Tio ki ou lakaaga i le vaivailiua, Fakamaoki ki le nea leia na ke fai, Kamelo vae gasolo mo vae mafi i le eva.

²⁴ Asino kaikivao, leia e masani ki le toafa, Leia e sela i le lasi o lona oli veli, Ko ai e ma taofi ia loa a ia ke fai lona oli ? Ko latou fuli ala e afa ia a ia e leaise pakia ; E lotou maua a ia i le lolotoga o lona masina.

²⁵ Aua na ke makape kilii vae, Iselaele ! Tokaga na malo noa lou fatakia ! Kae e ke pati : Leai, tuku noa au ! Talie e kau alofa ki atua matapule, E kau fia ano kia latou.

²⁶ Ofaipe se tagata kaia leia e luma moka mauatoka, E lotou luma loa, latou o le fale o Iselaele, Latou, mo olatou sau, mo olatou pule, Mo olatou kau faisakilifisio ti mo olatou kau polofeta.

²⁷ E lotou pati ki le laakau : Ko loku tamana a koe ! Ti ki le fatu : Na ke soli mai kiate au le mauli ! Talie e lotou titua mai kiate au, E leaise lotou agaaga mai kiate au. Ti ka lotou nofo i le malaia, E lotou pati : Tuu ki aluga, o fakamauli matou !

²⁸ Kofea ou atua ala na ke fau ia kiate koe ? Ke lotou tutuu ki aluga, mo kapau e mafai ke lotou fakamauli a koe i le aso o le malaia ! Talie kua tatau le lasi o ou atua mo ou kolo, ei Suta !

²⁹ Kolea e kotou visi ai loa mo au ? Na kotou agatuu fuli kiate au, e pati le Eteleno.

³⁰ Na ano noa laku taai akoutou fanau ; Na leaise lotou tokaga fua ki le akonaki. Na kai e lakoutou seleta akoutou kau polofeta, Ofaipe se laione maumau.

³¹ Tagata o le tautupu leinei, kotou tokaga mua ki le folafola a le Eteleno ! Pe na kau liliu ko se toafa ki Iselaele, Pe ko se fenua leia e matotolu ai le fakapouli ? Kolea e pati ai loku kakai : E motou lauatea, E leaise motou fia liliu kiate koe ?

³² Pe galoi e le taine taupoou ona teu ? Pe galoi e le taine feauaki lona kilipipi ? Kae na galoi au e loku kakai Talu mei fualoa.

³³ E ke poto lasi ai i ou ala, o afa le nea leia e ke alofa ki ai ! E ke fai foki a ia o kaku ki le tukipo.

³⁴ E maua foki i le tapatapa o lou kofu Le toto o le kau agatonu, Ala na leaise ke maua e fakamakeke ia lou matapa.

³⁵ Kae logo ai le nea lena, e ke pati : Io, e kau mea ! Kua maliu maoki lona sausau iate au ! Ko leinei, ka kau fakamaau loa mo koe, Talie e ke pati : Na leaise kau agasala fua.

³⁶ Kolea na ke fetogi fakatavili ai lou ala ? Ko Esipito leia e au loa mei ai lou luma, Ofaipe lana au mei Asilia i mua.

³⁷ Mei lena foki e ke mavae loa, mo lima i le ulu ; Talie e tiaki e le Eteleno latou ala e ke fanaki ki ai, Ti e leaise ke manuia loa i olatou tafa.