Selemia 19 - Tosi Tapu

Le ipu mafaa mo le maumaui o Selusalemi

¹ E folafola le Eteleno, o pati : Ano, o totogi i se tagata faiipu se ipu kele, ti ke too o ano mo koe ni kau matua i le kakai mo ni kau tagata faisakilifisio ia latou ala kua matutua.

² Ano ki le vaivailiua o Pene-Inome, leia e tuu i le uluaga o le matapa o ipu kele ; ti e ke fakasa loa a folafola ala e kau tuku atu loa kiate koe i le ganea lena.

³ E ke pati loa : Kotou fakalogo ki le folafola a le Eteleno, sau o Suta, mo koutou, kakai o Selusalemi ! E folafola le Eteleno o kau tau, le Atua o Iselaele, o pati : Ko leinei, e kau aumai loa ki le ganea leinei se malaia, Leia e gugulu loa ki taliga o latou ala e logo loa ki ai.

⁴ O tupu kua lotou tiaki au, ti kua lotou fakakelekele le ganea leinei, Kua lotou momoli i ai le iseso ki ni atua kese Ala na leaise lotou iloa, e latou, mo olatou tamana, mo sau o Suta, Ti kua lotou fakaapele le ganea leinei ki le toto mea ;

⁵ Kua lotou fakatuu ni ganea taualuga kia Paale, Ke tutu ai alatou fanau i le afi ko ni failaulau kia Paale : Na leaise kau fakatotonu le nea lena, na e tosi a ia, Ti na leaise ake a ia i laku fakakaukau.

⁶ Koia ko leinei, e pati le Eteleno : E soko mai loa a aso, Ala e leaise toe fakaigoa ai loa le ganea leinei Ko Tofete pe ko le vaivailiua o Pene-Inome, Kae e fakaigoa loa a ia ko le vaivailiua o le matea.

⁷ E kau maumaui loa i le ganea leinei le fakakaukau a Suta mo Selusalemi ; E kau tamate loa laua ki le seleta i mua o olatou fili, Ti mo le lima o latou ala e loto ki lolatou mauli ; E kau soli loa olatou tino ke kai E manu lele o le lagi mo manu o le kele.

⁸ E kau fakaliliu loa le kolo leinei ko se nea maumau ti mo se nea fakagologolo ; E ofolele loa latou fuli ala e fakalaka loa i ona tafa, Ti e lotou mapu loa ki ona lavea fuli.

⁹ E kau fagai loa latou ki tino o olatou vosa mo tino o olatou taineliki, Ti e lotou fekaiaki loa olatou tino, I loto malie o le i mo le mamae, Ala e tuku loa latou ki ai e olatou fili Ti mo latou ala e loto ki lolatou mauli.

¹⁰ Ti oki a ia, e ke titi loa le ipu ke mafaa i mua o tagata ala e ano loa mo koe.

¹¹ Ti e ke pati loa kia latou : E folafola le Eteleno o kau tau : E kau titi feneeki loa le kakai leinei ti mo le kolo leinei, Ofaipe le titi o le ipu a le tagata faiipu, Ti e leaise mafai loa ke toe fau e ia a ia. Ti e tanu loa a mate i Tofete, talie e leaise maua loa se ganea ke tanu ai.

¹² E pati le Eteleno : E kau fai fenaaki loa ki le ganea leinei, ti mo lona kakai, Ti e kau fakaliliu loa le kolo leinei ke tatau mo Tofete.

¹³ E kelekele loa le fale o Selusalemi mo fale o sau o Suta Ofaipe le ganea o Tofete, Ti mo fale fuli ala e momoli ai le iseso i aluga o ato Ki le kau tau fuli o atu lagi, Ti na fai ai ni lipasio ki ni atua kese.

Ko le pilisoni o Selemia

¹⁴ Na toe liliu mai loa Selemia mei Tofete, le ganea leia na kakau a ia ki ai e le Eteleno, ke kikite. Ti na tuu loa a ia i le malae o le fale tapu o le Eteleno, o pati ki le kakai katoa :

¹⁵ E folafola le Eteleno o kau tau, le Atua o Iselaele, o pati : E kau aumai loa ki le kolo leinei mo kolo fuli ala e fakalogo ki ai, a malaia fuli ala na kau fakasa fakatomua, o tupu kua lotou fakafefeka olatou ua ke aua na lotou logo ki aku folafola.