Selemia 18 - Tosi Tapu

Ko le ipu a le tagata faiipu

¹ Na tuku loa le folafola a le Eteleno kia Selemia, o pati :

² Tuu ki aluga, o ifo ki le fale o le tagata faiipu ; I lena, e kau fakasa loa kiate koe aku folafola.

³ Na kau ifo loa ki le fale o le tagata faiipu, Ti ko leinei, na gaoi a ia i lona nea faiipu.

⁴ Ko le ipu leia na fai e ia na maumau i ona lima, Ofaipe lona tautau soko ki le kele kula i le lima o le tagata faiipu ; Na toe fai loa e ia se tasi ake a ipu, O tatau loa mo le nea leia na loto ki ai.

⁵ Ti na tuku mai loa kiate au le folafola a le Eteleno, o pati :

⁶ Pe leaise mafai ke kau fai kia koutou, ofaipe le tagata faiipu leinei, fale o Iselaele ? E pati le Eteleno. Ko leinei, ofaipe le kele kula i le lima o le tagata faiipu, E kotou felaaki i loku lima, fale o Iselaele !

⁷ E fokifa e kau masau, ki se kakai, ki se puleaga, Ke taaki, ke tuuti ti ke maumaui.

⁸ Kae kapau e tafoki mai mei lana agaveli le puleaga lena na kau masau ki ai, E kau fakasemala loa ki le veli leia na kau manatu ke fai kiate ia.

⁹ Ti fokifa e kau masau, ki se kakai, ki se puleaga, Ke laga ti ke to.

¹⁰ Kae kapau e fai e le puleaga lena le nea leia e veli ki oku mata, Ti e leaise fakalogo a ia ki loku leo, E kau fakasemala ki le malie leia na kau manatu ke fai kiate ia.

Ko le fakafefeka o Suta

¹¹ Masau i le aso nei ki tagata o Suta ti mo le kakai o Selusalemi, o pati : E folafola le Eteleno, o pati : Ko leinei, e kau teuteu kia koutou se malaia, E kau Fakakaukau se fakatuutuu kia koutou. Ke tasi tafoki mai le tagata mei lona ala veli ! Kotou fai ke malilie okoutou ala mo akoutou gaoi !

¹² Kae e lotou pati : E leai sona aoga ! Talie e motou mulimuli loa ki amatou manatu, E motou tasi fai loa o mulimuli ki oli o lomatou loto veli.

¹³ Koia e folafola ai le Eteleno, o pati : Kotou vesili ki atu puleaga ! Ko ai kua logo ki ni nea fenaaki i se aso ? Na fai e le taine taupoou o Iselaele ni nea fakalialia o veli ai.

¹⁴ Pe tiaki e le nive o Lipane le utu o faisaga ? Pe kua tio i se aso kua mamasa a liua, ala e au mei mamao, ti e sali mokomoko tuumau ?

¹⁵ Kae kua galoi au e loku kakai, e momoli e ia le iseso ki ni taulaatua. Kua taki a ia ke siga i ona ala, ke tiaki a ala afea, Kae ke mulimuli i ni ala gaoa, ala na leaise fakalauatea.

¹⁶ Kua lotou fakaliliu lolatou fenua ko se nea fakaaloalofa, ko se nea fakagologolo ; Ko latou fuli ala e fakalaka i ai e punamauli ti e lu olatou ulu.

¹⁷ E kau fakamavetevete loa latou i mua o le fili, ofaipe le matagi o le potu esite. E kau titua loa kia latou, e leaise kau tio loa kia latou i le aso o lolatou mamae.

Ko le fono veli kia Selemia

¹⁸ Ti na lotou pati : Kotou au, tou fonofono kia Selemia ! Talie e leaise puli loa le lao mo kapau e leaise maua ni tagata faisakilifisio, Pe ko le tokoi, mo kapau e leaise maua ni kau poto, Pe ko le folafola, mo kapau e leaise maua ni kau polofeta. Kotou au, tou tamate a ia ki le alelo ! Aua na tou tokaga ki ana masau !

¹⁹ Eteleno, tokaga mai kiate au ! Ti ke logo ki le leo o latou ala e vesia kiate au !

²⁰ Pe totogi loa le malie ki le veli ? Talie kua lotou kenu se popoko ke too loku mauli. Ke ke manatui e koe, na kau tuu i ou mua, O tupu ke ulufaki latou, Ti ke afei lou sausau ia latou.

²¹ Koia, tuku alatou fanau ki le oge, Tamate latou ki le seleta ; Ke sala fanau alatou avaga, ti ke lotou liliu o lokonui, Ti ke mamate olatou tagata i le taumasaki veli ; Ke taai olatou tagata tupulaga e le seleta i le tau !

²² Ke logo ki ni tagi i olatou fale, Mo ka ke tuku loa latou ke osoi fakafokifa e ni kau solia ! Talie na lotou kenu se popoko ke kau vilo ai, Na lotou fakatuu ni masele i oku vae.

²³ Kae ko koe, Eteleno, e ke iloa alatou fonofono veveli fuli ke tamate au. Aua na ke fakamolemole lalatou agaveli, Aua na ke soloi lalatou agasala i ou mua ! Tautea latou i le aso o lou sausau !