Selemia 17 - Tosi Tapu

Kua tosi le agasala i le loto

¹ Kua tosi le agasala a Suta ki se peni ukamea, Ki se matai taimane ; Kua tosi a ia i le laupapa o lolatou loto, Ti mo tala o okoutou aletale.

² E tatau lalatou manatu ki alatou fanau mo lalatou manatu ki olatou aletale Ti mo olatou taulaatua o Asetalate i tafa o laakau lalasi, I mauga liliki taualuga.

³ E kau tuku ke kaia loku mauga mo ona faisaga, mo au nea malilie, mo ou koloa fufu fuli, Ti mo ou ganea taualuga, o tupu ko au agasala, i lou fenua katoa.

⁴ E ke sala loa i le tofiga leia na kau soli atu kiate koe o tupu ko lau agasala ; E kau tuku loa a koe ke popula ki lou fili, i se fenua leia e leaise ke iloa ; Talie na kotou tutu le afi o loku sausau, Ti e ula loa a ia o lee gato.

⁵ Koia e folafola ai le Eteleno, o pati : Malaia le tagata leia e fanaki ki le tagata, Leia e too ia le kanofi ko lona tokotoko, Ti e fakamaliu ia lona loto i le Eteleno !

⁶ E fai a ia pe se ga laakau gini i le toafa, Ti e leaise tio a ia ki le au o le manuia kiate ia i se aso ; E nofo a ia i ganea masunu o le toafa, I se kele kona mo lavaki.

⁷ Manuia le tagata leia e fanaki ki le Eteleno, Ti ko lona amanaki malie ko le Eteleno !

⁸ E fai a ia pe se laakau na to i tafa o se tafeaga vai, Leia e falo ia ona aka ki le tafe ; E leaise iloa e ia le vevela mo ka au a ia, Ti e sesega tuumau lona lau. I le fetuu o le taulaa, e leaise tuania e ia se nea, Ti e leaise toe gato lona fua.

⁹ E pikopiko le loto o fakalaka i nea fuli, ti e agaveli a ia : Ko ai e mafai ke iloa ia a ia ?

¹⁰ Ko au, le Eteleno, e kau tio o kaku ki le mafu, ti e kau iloa a manatu fakapulipuli o le laumalie, Ke tuku ki le tagata taki tasi o mulimuli ki ona ala, O mulimuli ki le fua o ana gaoi.

¹¹ Ofaipe se miti leia e ofaki ia ni fua ala na leaise fakato e ia, E fenaaki leia e tanaki ia ni koloa lee faitotonu ; I le loto malie o ona aso e tonu ke tuku e ia latou, Ti i le fakaoki e fai a ia pe se vale.

¹² E i ai se ekeekeaga lasi o le kololia, na fakatuu talu mei le kamataaga, Ko le potu o lotatou sagatualio.

¹³ Ei Eteleno, ko koe ko le amanaki malie o Iselaele ! E luma loa latou fuli ala e tiaki ia a koe. E tosi loa i le kele latou ala e mavae iate au, Talie e lotou tiaki le matapuna o le vai mauli, le Eteleno.

¹⁴ Eteleno, fakamauli au i loku masaki, ti e kau mauli loa ; Fakamauli au, ti e kau mauli loa ; Talie ko koe ko loku kololia.

¹⁵ Ko leinei, e lotou pati mai kiate au : Kofea le folafola a le Eteleno ? Ke soko la a ia !

¹⁶ Ti ko au, i laku fakalogo kiate koe, na leaise kau fakafiti ke kau liliu ko le tagata tausi ovi ; Na leaise kau oli foki ki le aso o le malaia, e ke iloa a ia ; Ko le nea leia na mavae mei oku laugutu e tuu i ou mua.

¹⁷ Aua na ke liliu kiate au ko se nea fakaii, A koe ko loku mumuniaga i le aso o le malaia !

¹⁸ Ke luma latou ala e fakaveliveli mai kiate au, kae ke aua na kau luma ; Ke lotou lulu, kae ke aua na kau lulu, a au ! Tuku ke au kia latou le aso o le malaia, Taai latou ki se tautea o tua lua !

Ko le tausi o le sapato

¹⁹ Na folafola mai le Eteleno kiate au, o pati : Ano, o tuu i le matapa o fanau o le kakai, leia e ulu ai ki loto ti ulu ai ki fafo a sau o Suta, ti mo matapa fuli o Selusalemi.

²⁰ E ke pati loa kia latou : Kotou fakalogo mai ki le folafola a le Eteleno, sau o Suta, ti mo Suta katoa, ti mo koutou fuli, kakai o Selusalemi, ala e ulu i matapa anei !

²¹ E folafola le Eteleno, o pati : Kotou tokaga ki okoutou laumalie, Aua na kotou amo ni amoga i le aso o le sapato, Ti aua na kotou fakaulu ni amoga i matapa o Selusalemi.

²² Aua na kotou ave ki fafo i okoutou fale se amoga e tasi i le aso o le sapato, Ti aua na kotou fai se gaoi. Kae kotou fakatapu le aso o le sapato, Ofaipe laku fakatotonu ia ki okoutou tamana.

²³ Na leaise lotou fakalogo, na leaise tokaga olatou taliga ; Na lotou fakafefeka olatou ua, Ke aua na fakalogo mo tali le akonaki.

²⁴ Kapau e kotou fakalogo mai kiate au, e pati le Eteleno, Kapau e leaise kotou fakaulu ni amoga I matapa o le kolo leinei i le aso o le sapato, Kapau e kotou fakatapu le aso o le sapato, Ti e leaise kotou fai se gaoi i le aso lena,

²⁵ Ti e ulu loa i le matapa o le kolo leinei A sau mo aliki ala e nonofo i le ekeekeaga fakasau o Tavite, O eke i ni saliote mo ni osi, Latou ti mo olatou aliki, mo tagata o Suta ti mo le kakai o Selusalemi, Ti e nofoi loa le kolo leinei o lee gato.

²⁶ E au loa mei kolo o Suta ti mo tafatafa o Selusalemi, Mei le fenua o Pesamino, mei le vaivailiua, Mei le mauga ti mo le potu saute, O aumai ni failaulau mo ni vikitima, O aumai ni moliga mo se iseso, Ti ke momoli ni sakilifisio fakafetai i le fale o le Eteleno.

²⁷ Kae kapau e leaise kotou fakalogo mo ka kau fakatotonu atu kia koutou Ke fakatapu le aso o le sapato, Ke aua na amo se amoga, Ke aua na fakaulu se amoga i matapa o Selusalemi i le aso o le sapato, Ti e kau tutu loa se afi i matapa o le kolo, Ti e kai loa e ia a fale fakaalialiki o Selusalemi, ti e leaise toe mate loa a ia.