Selemia 16 - Tosi Tapu

Tautea mo le popula

¹ Na tuku mai loa kiate au le folafola a le Eteleno, o pati :

² E leaise ke too loa sau avaga, Ti e leaise ke maua loa ni vosa mo ni taineliki i le ganea leinei.

³ Talie ko leinei le folafola a le Eteleno ki vosa mo taineliki Ala e tupu loa i le ganea leinei, Ki olatou tinana ala e fanaui ia loa latou, Ti mo olatou tamana ala e fakatupu ia loa latou i le fenua leinei :

⁴ E lotou mamate loa i le masaki veli ; E leaise tagi loa kia latou, ti e leaise tanu loa latou ; E lotou fai loa pe le nea fakagako kele i aluga o le kele ; E lotou mamate loa i le seleta mo le oge ; Ti e liliu loa olatou tino ko le nea kai a manu lele o le lagi mo manu o le vao.

⁵ Talie e folafola le Eteleno, o pati : Aua na ke ulu ki se fale o le putu, Aua na ke ano o tagi i ai, mo tagi laulau i ai mo latou ; Talie kua kau too loku tokamalie i le kakai lena, e pati le Eteleno, Mo loku agamalie ti mo loku manava alofa.

⁶ E mamate loa a kakai lalasi mo toe liliki i le fenua leinei ; E leaise tanu loa latou ; E leaise tagi loa kia latou, E leaise toe vaku loa a mata pe tele loa a ulu kia latou.

⁷ E leaise tofi loa le pane i le putu, Ke fakapelepele ai se tasi o tupu ko se mate, Ti e leaise momoli loa le ipu o le fakapelepele Ki se tamana pe ki se tinana.

⁸ Aua na ke ulu foki ki se fale leia e fai ai se kaitasi, O eke fakatasi mo latou, O kai ti mo inu.

⁹ Talie e folafola le Eteleno o kau tau, le Atua o Iselaele, o pati : Ko leinei, e kau fakagato loa i le ganea leinei, i okoutou mua, i okoutou aso, A kalaga fakafiafia mo kalaga nekenekea, A sua a le tama feauaki mo sua a le taine feauaki.

¹⁰ Ka ke fakasa loa ki le kakai leinei a nea fuli ana, E lotou pati atu loa kiate koe : Kolea e valoki ai tatou e le Eteleno ki malaia lalasi ana ? Kolea lamatou agaveli ? Kolea le agasala na motou fai ki le Eteleno, lomatou Atua ?

¹¹ Ti ke tali loa kia latou : Na tiaki au e okoutou tamana, e pati le Eteleno, Na lotou mulimuli i ni atua kese, Na lotou tausi kia latou ti na lotou punou i olatou mua. Na lotou tiaki au, ti na leaise lotou tausi laku lao.

¹² Ti ko koutou, na kotou fai le veli o lasi ake i okoutou tamana ; Ti ko leinei, e tasi mulimuli le tagata ki oli o lona loto veli, Ke aua na fakalogo mai kiate au.

¹³ E kau ave loa koutou i le fenua leinei Ki se fenua leia na leaise kotou iloa, E koutou mo okoutou tamana ; I lena, e kotou tausi loa ki ni atua kese i le ao mo le po, Talie e leaise kau soli loa kia koutou se kalasia.

Fakapapau o le toe fakafoou

¹⁴ Koia, e pati ai le Eteleno : e soko mai loa a aso, Ala leaise toe pati ai loa : E mauli le Eteleno, A ia leia na fakamavae ia fanau a Iselaele i Esipito !

¹⁵ Kae pati loa : E mauli le Eteleno, A ia leia na fakamavae ia fanau a Iselaele i le fenua o le potu noleto, Ti mo fenua fuli ala na kapu e ia latou ki ai ! E kau aumai loa latou ki lolatou fenua, Leia na kau soli ki olatou tamana.

¹⁶ E pati le Eteleno : Ko leinei, e kau kakau loa ni kau faifeua toka api, ti e lotou fagotai loa latou ; Ti ka oki le nea lena, e kau kakau loa ni kau kapu manu toka api, ti e lotou kapu loa latou Mei mauga fuli, mo mauga liliki fuli, Ti mo ana o utu.

¹⁷ Talie e tokaga oku mata ki olatou ala fuli, E leaise munia olatou ala i oku mua, Ti e leaise puli alatou agaveli ki oku mata.

¹⁸ E kau uluaki soli loa kia latou le totogi o lalatou agaveli mo lalatou agasala o liuga lua, O tupu na lotou fakakelekele loku fenua, O tupu na lotou fakaapele loku tofiga Ki alatou taulaatua mamate ti mo olatou atua fakalialia.

¹⁹ Eteleno, ko koe ko loku makeke, ko loku fanakiaga, ko loku mumuniaga i le aso o le mamae ! E au loa kiate koe a atu puleaga mei potupotu o le kele, Ti e lotou pati loa : Ko loi ata a lotu o omatou tamana, E leaise uiga fua ti e leaise aoga fua a taulaatua.

²⁰ Pe mafai ke fai e le tagata ni atua, ala e leaise ko ni atua ?

²¹ Koia ko leinei, e kau fakasa kia latou i le faiaga leinei, E kau fakasa kia latou loku mafimafi mo loku makeke ; Ti e lotou iloa loa ko loku suafa ko le Eteleno.