Selemia 15 - Tosi Tapu

Fakamaoki o le tautea

¹ Na pati mai loa le Eteleno kiate au : Kapau e tutuu loa Moisese mo Samuele i oku mua, E leaise kau tokaga loa ki le kakai leinei. Kapu a ia ke mamao i oku mata, ke ano a ia !

² Ti kapau e lotou pati atu kiate koe : Pe motou ano loa kifea ? E ke tali loa kia latou : ko leinei le folafola a le Eteleno : Ki le mate latou ala e tonu ke mate, Ki le seleta latou ala e tonu ke tamate e le seleta, Ki le oge latou ala e tonu ke mate i le oge, Ki le popula latou ala e tonu ke ano o popula !

³ E kau kakau mai loa kia latou a tautea e fa, e pati le Eteleno, Le seleta ke tamate ia latou, A kuli ke toso ia latou, A manu lele o le lagi mo manu o le kele Ke kai ia latou mo maumau ia latou.

⁴ E kau fakaliliu loa latou ko se nea fakaii ki puleaga fuli o le kele, O tupu ko Manase, vosa o Esekiasi, sau o Suta, Ti mo nea fuli ala na fai e ia i Selusalemi.

⁵ Ko ai e alofa loa kiate koe, Selusalemi ? Ko ai e mamae loa kiate koe ? Ko ai e ano loa o afa pe ke feaki ?

⁶ Na ke tiaki au, e pati le Eteleno, Na ke toe liliu ki muli ; Kae e kau falo loku lima kiate koe, ti e kau maumaui a koe, Kua kau kaekae i le kataki.

⁷ E kau fute latou ki le matagi i matapa o le fenua ; E kau too alatou fanau, ti e kau maumaui loku kakai, Leia na leaise tafoki mei ona ala.

⁸ Kua lasi ake ona lokonui i fiti o le one o le tai ; E kau aumai kia latou, ki le tinana o le tagata tupulaga, Le tagata maumau i le lalatea totonu ; E kau fakavilo fakafokifa kiate ia le i mo le lulu.

⁹ Ko le fafine leia na fanaui ia ni vosa e fitu e gaegae, E tuku e ia lona laumalie ; E to lona laa kae koi ao ; E matagafua a ia, e apele a ia i le luma. Ko latou ala e toe, e kau tuku latou ki le seleta i mua o olatou fili, E pati le Eteleno.

Ko mamae mo tagi a Selemia

¹⁰ Malaia kiate au, ei loku tinana, i lau fakatupu ia au, Ko se tagata fakatupu visi ti mo fakatupu fefele ki le fenua katoa ! E leaise kau too maua, ti e leaise kau soli maua, Kae e lotou fakamalaia fuli mai kiate au.

¹¹ Na pati loa le Eteleno : E maoki, e ke maua loa se apogipogi manuia ; E maoki, e kau fakamakeke loa ki le fili ke fai kiate koe ana kole fakamolemole, I le aso o le malaia ti mo le aso o le mamae.

¹² Pe fatii loa e le ukamea le ukamea mo le sila o le noleto ?

¹³ E kau soli noa au nea malilie mo ou koloa fufu ke kaia, O tupu ko au agasala fuli, i lou fenua katoa.

¹⁴ E kau tuku a koe ke ano mo lou fili ki se fenua leia e leaise ke iloa, Talie kua mu le afi o loku sausau, Kua ula a ia kia koutou.

¹⁵ Ei Eteleno, e ke iloa nea fuli, manatui au, aua na ke galoi au, Tautea latou ala e fakaveliveli mai kiate au ! Aua na ke too au, o tupu ko lou kataki fualoa ! E ke iloa e kau tali le nukinuki o tupu ko koe.

¹⁶ Na kau tali au folafola, ti na kau kai latou ; Ko au folafola ko le fiafiaaga mo le nekenekeaaga o loku loto ; Talie kua kalagai lou suafa kiate au, Eteleno, Atua o kau tau !

¹⁷ Na leaise kau tonatona fua i le fakatasi a le kau gologolo, o tupu ke kau fakafiafia mo latou ; Kae na kau tonatona toka tasi, o tupu ko lou mafimafi, Talie na fakaapele au ki lou sausau.

¹⁸ Kolea e fai sosoko ai loku mamae ? Kolea e mamae ai loku lavea, ti e leaise loto ai ke mafo ? Pe kua ke fai kiate au pe se matapuna kaka, Pe se liua leia e leaise iloa papau pe i ai se vai pe leai ?

¹⁹ Koia e folafola ai le Eteleno, o pati : Kapau e ke toe pipiki mai kiate au, e kau tali atu loa kiate koe, ti e ke tuu loa i oku mua ; Kapau e ke vaei kese le nea leia e mauiga mei le nea leia e noa, e ke tatau loa mo loku gutu. Ko latou ala e tonu ke toe au kiate koe, Kae e leaise ko koe leia e tonu ke ano kia latou.

²⁰ E kau fakaliliu loa a koe ofaipe se kaua sila makeke ki le kakai leinei ; E lotou fai loa kiate koe le tau, kae e leaise lotou malo loa iate koe ; Talie e kau nofo loa mo koe, o fakamauli a koe ti mo saofaki a koe, E pati le Eteleno.

²¹ E kau saofaki loa a koe i le lima o le kau agaveli, E kau fakamauli loa a koe i lima o le kau agamakeke.