Selemia 13 - Tosi Tapu

Folafola fakatata o le kilipipi kie tea

¹ Na folafola mai le Eteleno kiate au, o pati : Ano o totogi se kilipipi tea, ti toi a ia ki lou vakavaka ; ti aua na ke fakasusu a ia ki le vai.

² Na kau totogi loa le kilipipi, o mulimuli ki le folafola a le Eteleno, ti na kau toi loa a ia ki loku vakavaka.

³ Na toe tuku mai loa le folafola a le Eteleno kiate au, ko lona tua lua a ia, o pati :

⁴ Too le kilipipi leia kua ke totogi, ti ke toi a ia i lou vakavaka ; tuu ki aluga, o ano ki le Eufalate, ti ke fufu loa i ai le kilipipi i se mafaa o se utu.

⁵ Na kau ano loa, ti na kau fufu loa le kilipipi i tafa o le Eufalate, o mulimuli ki le nea leia na fakatotonu mai e le Eteleno kiate au.

⁶ Na sili ki ai ni aso mauke, ti na pati mai loa le Eteleno kiate au : Tuu ki aluga, ano ki le Eufalate, ti ke too loa i ai le kilipipi leia na kau fakatotonu atu ke ke fufu i ai.

⁷ Na kau ano loa ki le Eufalate, ti na kau sakili loa, ti na kau too loa le kilipipi mei le ganea leia na kau fufu ai ; kae ko leinei, kua pala le kilipipi, e leaise koi aoga a ia ki se nea.

⁸ Na tuku mai loa kiate au le folafola a le Eteleno, o pati :

⁹ E folafola le Eteleno, o pati : E kau maumaui feneeki loa le fia nealasi o Suta Ti mo le laukau lasi o Selusalemi.

¹⁰ Ko le kakai agaveli lena, leia e leaise fia fakalogo ki aku folafola, Leia e mulimuli ki oli o lona loto, Leia e ano ki ni iki atua kese O tausi kia latou ti mo tulolo i olatou mua, Ke liliu a ia ofaipe le kilipipi leinei, Leia e leaise koi aoga ki se nea !

¹¹ Talie e faipe le nonoa o le kilipipi i vakavaka o se tagata, Na kau sai foki kiate au le fale katoa o Iselaele Ti mo le fale katoa o Suta, e pati le Eteleno, O tupu ke la liliu ko loku kakai, Mo loku igoa, mo loku fakavikiviki, ti mo loku kololia. Kae na leaise la fakalogo fua kiate au.

Valoki

¹² E ke fakasa loa kia latou le folafola leinei : E pati le Eteleno, le Atua o Iselaele : E apele loa a ipu fuli i le vino. Ti e lotou pati atu loa kiate koe : Pe leaise motou iloa E apele loa a ipu fuli i le vino ?

¹³ Ti e ke pati loa kia latou : E folafola le Eteleno, o pati : Ko leinei, e kau fakaapele loa a kakai fuli o le fenua leinei, A sau ala e nonofo i le ekeekeaga fakasau o Tavite, Mo le kau faisakilifisio, mo le kau polofeta, mo le kakai katoa o Selusalemi, E kau fakaapele loa latou fuli ki le vino ke konana.

¹⁴ E kau fakafetege loa latou fuli ke mafaafaa, A tamana mo vosa fakatasi, e pati le Eteleno ; E leaise kau fakasao loa, e leaise kau alofa loa, e leaise kau manava alofa loa, E leaise taofi loa a au e se nea ke maumaui latou.

¹⁵ Kotou fakalogo ti kotou tokaga mai okoutou taliga ! Aua na kotou fia nealasi ! Talie e folafola le Eteleno.

¹⁶ Kotou tuku le kololia ki le Eteleno, lokoutou Atua, I mua o lana kakau mai kia koutou le fakapouli, I mua o le tukia o okoutou vae ki atu mauga o le pouli ; E kotou talitali loa ki le malama, Kae e fetogi loa e ia a ia ki le malu o le mate, E fakaliliu loa e ia a ia ko se fakapouli matotolu.

¹⁷ Kapau e leaise kotou fakalogo, E kau tagi fakafufu loa, o tupu ko lokoutou fia nealasi ; E tafe loa a loimata i oku mata, Talie e ave popula loa le kau manu a le Eteleno.

¹⁸ Pati ki le sau mo le fafine sau : Kolua tonatona ki le kele ! Talie kua vilo mei okoulua ulu Le pala fakasau leia na teu fakaaliki ia koulua.

¹⁹ Kua maponopono a kolo o le potu saute, E leaise tasi ke fakamavaa ia latou ; Kua ave popula a Suta katoa, Kua ave katoa a ia o fakapopula.

²⁰ Siki ou mata, o tio Kia latou ala e au mei le potu noleto. Kofea le kau manu leia na soli atu kiate koe, Le kau manu leia na fai ia lou kololia ?

²¹ Kolea loa lau pati ki lou tautea e ia ? Ko koe totonu leia na ako ia latou ke liliu ko ou pule. Pe leaise maua fakafokifa loa a koe e mamae Ofaipe mamae o se fafine fanau ?

²² Kapau e ke pati i lou loto : Kolea e soko ai le nea leinei kiate au ? Se tupu ko le lasi o au agasala, Kua kutukutu a tapatapa o lou kofu, Ti kua telefua ou muli vae.

²³ Pe feala ke fetogi e se tagata Etiopia lona kili, Ti mo se leopale ona pulepule ? E tatau foki mo koutou, pe feala ke kotou fai le malie, Koutou ala kua masani i le fai o le veli ?

²⁴ E kau fakamavetevete loa latou, ofaipe le fakamavetevete o le mutie malo E le matagi o le toafa.

²⁵ Ko lena lou anoaga, le vaega leia kua kau fakafuafua kiate koe, E pati le Eteleno, O tupu kua ke galoi au, Ti kua ke tuku lau fanaki ki le loi.

²⁶ E kau kutukutu loa lou kofu o kaku ki ou mata, O tupu ke tio ki lou luma.

²⁷ Kua kau tio ki au fai tono, mo ou oli veli, Mo au faiaga i mauga liliki mo faisaga, Ti kua kau tio ki au nea fakalialia. Malaia kiate koe, Selusalemi ! E ke talitali loa kiafea, ke fakamea a koe ?