Selemia 12 - Tosi Tapu

Kole a Selemia ; tali a le Atua

¹ Eteleno, e ke faitotonu ai, ti e leaise mafai ke kau fakavisi kiate koe ; Kae e kau loto ke kau masau atu kiate koe o uiga mo au fakamaau : Kolea e manuia ai le ala o tagata agaveli ? Kolea e fimalie ai latou ala e fai kaka lasi ?

² Na ke to latou, ti kua lotou tauaka ; E lotou lalasi, e lotou fua ; E ke ofi ki lolatou gutu, Kae e ke mamao i lolatou loto.

³ Kae ko koe, Eteleno, e ke iloa au ; E ke tio kiate au, e ke ului loku loto leia e nofo mo koe. Too latou ofaipe ni ovi ala e tonu ke tamate, Ti ke teuteu latou ki le aso tamatea lasi !

⁴ E kaku loa ki afea le tagi o le kele, Ti mo le gini o le vao o faisaga fuli ? O tupu ko le agaveli o latou e nonofo i ai. Kua pupuli a manu vae fa mo manu lele, Talie lotou pati : E leaise tio loa a ia ki lotatou ikuaga.

⁵ E pati le Atua : Kapau e ke makape mo ni tagata saele lalo ti e lotou fakagaegae a koe, Pe feaki ake loa ke ke makape mo ni osi ? Ti kapau e ke pati e ke fimalie i se fenua tokamalie, Kolea e ke fai loa i laugutu tokaveli o le Solotane ?

⁶ Talie e kakai a koe e ou fetaina totonu ti mo le fale o lou tamana ; E lotou kalaga mo makape i ou muli. Aua na ke tui kia latou, mo ka lotou fai atu kiate koe ni masau malilie.

Ko le maumau o le fenua o Suta

⁷ Na kau tiaki loku fale, Na kau tiaki loku tofiga ; Na kau tuku le nea leia na alofa ki ai loku loto ki lima o ona fili.

⁸ Na fai loku tofiga kiate au pe se laione i le vaomatua, Na itaita a ia kiate au ; Koia leia na kau vesia ai kiate ia.

⁹ Na fai loku tofiga kiate au pe se manu lele kaikai, pe se lupo ; Koia e au ai loa a manu lele fekai fuli kiate ia mei potu fuli. Kotou ano, kotou tanaki mai a manu fuli o le vao, Kotou aumai latou, o tupu ke lotou kai a ia !

¹⁰ E maumaui e ni kau tausi manu toka api laku vite, E lotou takatakafi fakaveliveli laku faisaga ; E lotou fakaliliu le faisaga o oku fiafiaaga ko se toafa, ko se potu lavaki.

¹¹ E lotou fakaliliu a ia ko se toafa ; E mamae a ia, e tagi a ia i oku mua. Kua maumau le fenua katoa, Talie e leaise tokaga se tasi ki ai.

¹² E au le kau maumau mei potu taualuga fuli o le toafa, Talie e kai e le seleta a le Eteleno le fenua mei le potu ki le potu ; E leaise tokamalie ki se tagata e toka tasi.

¹³ Na lotou muluki le fulumeto, Kae na lotou utu ni vao talatala : Na lotou gaoi pakia kae e leai sona fua. Kotou luma i le nea leia na kotou tuuti, O tupu ko le sausau kaka o le Eteleno.

¹⁴ E folafola le Eteleno kia latou fuli ala e nonofo i oku tafatafa, ala ko ni kau agaveli, Ala e oso le tofiga leia na kau tuku ki loku kakai ko Iselaele : Ko leinei, e kau taaki loa latou i lolatou fenua, Ti e kau taaki loa le fale o Suta mei loto malie o latou.

¹⁵ Kae ka oki loa laku taaki latou, E kau toe alofa loa kia latou, Ti e kau toe aumai loa latou taki toka tasi ki lona tofiga, Taki toka tasi ki lona fenua.

¹⁶ Ti kapau e lotou ako a ala o loku kakai, Kapau e lotou fakapapau i loku suafa, o pati : E mauli le Eteleno ! Ofaipe lalatou ako ki loku kakai ke fakapapau i le igoa o Paale, Ti e lotou fiafia loa i le manuia i loto malie o loku kakai.

¹⁷ Kae kapau e leaise lotou fakalogo ki se nea, E kau maumaui loa le puleaga lena, E kau maumaui loa a ia, e kau tamate loa a ia, e pati le Eteleno.