Selemia 11 - Tosi Tapu

Valoki o le maumaui o le sai e Suta

¹ Na tuku loa le folafola a le Eteleno kia Selemia, o pati :

² Kotou fakalogo mai ki kupu o le sai leinei, Ti kotou masau ki tagata o Suta mo le kakai o Selusalemi !

³ Pati kia latou : E folafola le Eteleno, le Atua o Iselaele, Malaia le tagata leia e leaise fakalogo ki folafola o le sai leinei,

⁴ Leia na kau tuku ki okoutou tamana, I le aso leia na kau fakamavae ai latou mei le fenua o Esipito, Mei le gutuumu ukamea kaka, o pati : Kotou fakalogo ki loku leo, ti kotou fai a nea fuli ala e kau fakatotonu atu loa kia koutou ; Ti e kotou liliu loa ko loku kakai, Ti e kau liliu loa ko lokoutou Atua.

⁵ Ti e kau fakasoko loa le fakapapau leia na kau fai ki okoutou tamana, Ke soli kia latou se fenua leia e tafe ai le sua u mo le meli, Ofaipe le nea leia e kotou tio ki ai i le aso nei. Ti na kau tali loa : Amene, Eteleno !

⁶ Na pati mai loa le Eteleno kiate au : Fakasa a folafola fuli ana i kolo o Suta Ti mo ala fuli o Selusalemi, o pati : Kotou fakalogo ki folafola o le sai leinei, Ti kotou fai latou !

⁷ Talie na kau valoki okoutou tamana, Talu mei le aso leia na kau fakamavae ai latou i Esipito O kaku mai ki le aso nei, Na kau valoki latou i usu fuli, o pati : Kotou fakalogo ki loku leo !

⁸ Kae na leaise lotou fakalogo, Na leaise tokaga olatou taliga, Na lotou tasi mulimuli ki oli o lolatou loto veli ; Koia na kau fakasoko ai kia latou a kupu fuli o le sai leinei, Leia na kau fakatotonu ke lotou tausi, ti na leaise lotou tausi.

⁹ Na pati mai loa le Eteleno kiate au : E i ai se fono kaka a le kakai o Suta Mo le kakai o Selusalemi.

¹⁰ Kua lotou toe liliu ki agasala o olatou uluaki tamana, Ala na leaise fia fakalogo ki aku folafola, Ti na lotou ano ki ni iki ake atua kese, o tausi latou. Na maumaui e le fale o Iselaele mo le fale o Suta laku sai, Leia na kau fai mo olatou tamana.

¹¹ Koia e folafola ai le Eteleno, o pati : Ko leinei, e kau aumai loa kia latou ni malaia Ala e leaise feala ke lotou sao loa i ai. E lotou kalaga loa kiate au, Ti e leaise kau fakalogo loa kia latou.

¹² E ano loa a kolo o Suta mo le kakai o Selusalemi, O tagi ki atua ala na lotou momoli ki ai le iseso, Kae e leaise lotou fakamauli loa latou i le aso o lolatou malaia.

¹³ Talie e mauke tatau ou atua mo ou kolo, ei Suta ! Ti e lasi tatau a ala o Selusalemi Mo aletale ala na kotou fakatuu ki taulaatua, Ke momoli ai le iseso kia Paale…

¹⁴ Ti ko koe, aua na ke ulufaki le kakai leinei, Aua na ke fai kia latou se tagi mo se kole ; Talie e leaise kau fakalogo loa kia latou, Mo ka e lotou kalaga mai loa kiate au o tupu ko lolatou malaia.

¹⁵ Kolea e fai loa e loku alofaaga i loku fale ? E fai i ai ni nea veveli mauke ai. E puli loa le kanofi tapu i ou mua. Ka ke fai ia le veli, ko lena le nea leia e ke fiafia ai !

¹⁶ Oliveto mata, leia na mailoga kese i le fulumalie o lou fua, Ko lena lou igoa leia na soli atu kiate koe e le Eteleno : Kua tutu e ia a ia ki le afi i se logoa lasi, Ti kua fatifati ona laa.

¹⁷ Kua aumai kiate koe le malaia e le Eteleno o kau tau, leia na to ia a koe, O tupu ko le agaveli o le fale o Iselaele mo le fale o Suta, Ala na fai ia le nea ke tupu ai loku sausau, o la momoli le iseso kia Paale.

Ko le fono ke tamate Selemia

¹⁸ Na fakasa mai a ia e le Eteleno kiate au, Ti na kau iloa a ia ; Ti na ke fakatio au ki alatou gaoi.

¹⁹ Na kau faipe se akeno lalata leia e ave ki le fale tamate manu, Ti na leaise kau iloa alotou fakatuutuu veveli na lotou fai kiate au : Tou maumaui le laakau mo lona fua ! Tou tuuti a ia i le kele o le kau mauli, Ti ke aua na toe manatu ki lona igoa !

²⁰ Kae ko le Eteleno o kau tau ko se tui fakamaau faitotonu, Leia e iloa ia o kaku ki ifiifi mo mafu. E kau tio loa ki le vilo o lou sausau kia latou, Talie ko koe leia e kau tuku ki ai loku mauli.

²¹ Koia e folafola ai le Eteleno ki le kakai o Anatote, Ala e loto ki lou mauli, ti e pati : Aua na ke kikite i le suafa o le Eteleno, Pe ke mate loa i lomatou lima !

²² Koia e folafola ai le Eteleno o kau tau, o pati : Ko leinei, e kau tautea loa latou ; E mamate loa a tagata tupulaga i le seleta, E mamate loa olatou vosa mo olatou taineliki i le oge.

²³ E leaise sao loa se tasi o latou ; Talie e kau kakau mai loa le malaia ki le kakai o Anatote, I le fetuu leia e kau tautea ai loa latou.