Selemia 10 - Tosi Tapu

Ko le Eteleno mo taulaatua

¹ Kotou fakalogo mai ki le folafola leia e fai atu e le Eteleno kia koutou, Fale o Iselaele !

² E folafola le Eteleno, o pati : Aua na kotou faifaitaki ki ala o atu puleaga, Aua na kotou i ki fakamailoga o le lagi, O tupu e i a atu puleaga kia latou.

³ Talie ko agai fenua o kakai ko nea noa ata. E tuuti le laakau i le vaomatua ; E gaoi ki ai le lima o le tagata tufuga aki le toki ;

⁴ E fakafulumalie a ia ki le siliva mo le aulo, E fakamaumau a ia ki le amale mo ni fao Ke aua na taugaoi a ia.

⁵ E fai a atua ana pe se pou fualasi, ti e leaise lotou masau fua ; E amo latou, talie e leaise mafai ke lotou saele. Aua na kotou i kia latou, talie e leaise lotou poto fua i le fai o se nea veli e tasi, Ti e leaise lotou mafai ia fua le fai o se nea malie.

⁶ E leaise tasi e tatau mo koe, Eteleno ! E ke lasi, ti e lasi lou suafa o tupu ko lou mafimafi.

⁷ Ko ai e leaise i loa kiate koe, sau o atu puleaga ? Ko koe leia e tonu ke fai ki ai le i ; Talie e leaise tatau se tasi mo koe I le kau poto fuli o atu puleaga ti mo olatou puleaga fuli.

⁸ Ko latou fuli fakatasi, e lotou sala atamai mo valelea ; E leaise uiga lolatou poto, ko se laakau a ia !

⁹ E aumai mei Talesisi ni laui siliva, ti mei Ufasi se aulo. E fau latou e le tagata gaoi ti mo le lima o le tagata gaoi ukamea. Ko kofu o atua ana ko ni kie na pena usi ti na pena kula, Ko le gaoiaga fuli latou a ni tagata popoto.

¹⁰ Kae ko le Eteleno ko le Atua maoki, Ko ia ko se Atua mauli ti ko se sau lee gato ; E galulu le malama nei i mua o lona sausau, Ti e leaise ma tatali e atu puleaga lona sausau.

¹¹ E kotou masau loa kia latou, o pati : Ko atua ala na leaise fakatupu ia le lagi mo le kele E pupuli loa i le kele mo le lalo lagi.

¹² Na fakatupu e ia le kele i lona mafimafi, Na fakatuu e ia a fakatafito o le malama nei i lona poto, Ti na folasi e ia a atu lagi i lona atamai.

¹³ I lona leo, e gugulu a vai i atu lagi, E fakapale ake e ia a ao i potupotu o le malama nei, E fakatupu e ia a uila mo le ua, E too e ia le matagi mei ona koloa fufu.

¹⁴ E liliu a tagata fuli o valelea i mua o lona poto, Ti e luma a tagata gaoi ukamea fuli i le fakatata leia na lotou fau ; Talie ko loi ata a taulaatua ana, E leaise maua fua se tukumanava ia latou.

¹⁵ Ko ni nea mamate latou, ko se gaoiaga kaka ; E lotou maumau loa, mo ka au loa le tautea.

¹⁶ E leaise tatau mo latou Leia ko le vaega o Sakopo ; Talie ko ia leia na fau ia nea fuli, Ti ko Iselaele ko le faasiga o lona tofiga. Ko lona suafa ko le Eteleno o kau tau.

Ko le fakafeofi mai o le tautea

¹⁷ A koe leia e tonatona i le mamae, Tae ou nea ti ke sola mei le fenua !

¹⁸ Talie e folafola le Eteleno, o pati : Ko leinei, i le faiaga leinei e kau ti loa ki mamao latou e nonofo i le fenua ; E kau fakamamae loa latou, o tupu ke lotou maemaeia.

¹⁹ Malaia kiate au ! kua kau fatifati ! E mamae loku lavea ! Kae e kau pati : ko malaia leia e soko mai kiate au, E kau ma kataki loa a ia !

²⁰ Kua maumau loku falela, Kua motumotu oku maea fuli ; Kua mavae oku vosa iate au, kua lotou pupuli ; E leaise kau maua ia se tasi ke toe fakatuu ia loku falela, Leia ke toe tautau ia oku puipui.

²¹ Na ulu valea le kau tausi manu, Na leaise lotou afa le Eteleno. Koia leia na leaise lotou manuia ai, Ti na mavetevete ai alatou kau manu.

²² Ko leinei, e tau mai se logo ; Ko se logoa lasi leia e au mei le potu noleto, Ke fakaliliu ia a kolo o Suta ko se toafa, Ko se nofoaga o kuli vao.

²³ E kau iloa, ei Eteleno ! E leaise pule le tagata ki lona ala ; E leaise ko le tagata leia e taki ia ona lakaaga Mo ka saele.

²⁴ Tautea au, Eteleno ! kae i le faitotonu, Kae leai i lou sausau, ke aua na ke fakaliliu au ko se nea noa.

²⁵ Liligi lou sausau ki atu puleaga ala e leaise iloa ia a koe, Ti mo kakai ala e leaise fetapa ki lou suafa ! Talie e lotou kai Sakopo, e lotou kai a ia, e lotou tutu a ia ke okioki, E lotou maumaui lona nofoaga.