Selemia 1 - Tosi Tapu

Vokasio o Selemia

¹ Masau a Selemia, vosa o Ilekisa, ko se tasi i le kau faisakilifisio o Anatote, i le fenua o Pesamino.

² Na tuku mai loa kiate ia le folafola a le Eteleno, i le temi o Sosiasi, vosa o Amone, ko le sau o Suta, i le fetuu kau agafulu tupu tolu o lona sau,

³ kae sau Sosakimi, vosa o Sosiasi i Suta, o kaku ki le fakaoki o le fetuu kau agafulu tupu tasi o Setesiasi, vosa o Sosiasi, sau o Suta, o kaku ki le ave fakapopula o Selusalemi i le masina lima.

⁴ Na tuku mai loa le folafola a le Eteleno kiate au, o pati :

⁵ Na kau iloa a koe i mua o laku fakatupu a koe i le manava o lou tinana, ti na kau fakatapui a koe, ti na kau fakanofo a koe ko le polofeta o atu puleaga i mua o lau mavae i lona manava.

⁶ Na kau tali loa : Ei Aliki Eteleno ! Ko leinei, e leaise kau poto fua i le masau, talie ko se ga toe au.

⁷ Ti na pati mai loa le Eteleno kiate au : Aua na ke pati : Ko se ga toe au. Talie e ke ano loa kia latou fuli ala e kau kakau loa a koe ki ai, ti e ke fakasa loa a nea fuli ala e kau fakatotonu atu loa kiate koe.

⁸ Aua na ke i kia latou, talie e kau nofo mo koe o saofaki a koe, e pati le Eteleno.

⁹ Ti na falo loa e le Eteleno lona lima o fafa ki loku gutu ; ti na pati mai loa le Eteleno kiate au : Ko leinei, e kau tuku aku folafola ki lou gutu.

¹⁰ Tio, kua kau tuku kiate koe i le aso nei se makeke ki atu kakai mo atu puleaga, o tupu ke ke taaki mo veteki, ke ke maumaui mo soloi, ke ke lagai ake mo to.

¹¹ Na tuku mai loa kiate au le folafola a le Eteleno, o pati : Selemia, kolea e ke tio ki ai ? Na kau tali loa : E kau tio ki se laai amatie.

¹² Ti na pati mai loa le Eteleno kiate au : E tonu lau tio ; talie e kau tokaga ki laku folafola ke fai a ia.

¹³ Ti na toe tuku mai loa kiate au le folafola a le Eteleno, o pati : Kolea e ke tio ki ai ? Na kau tali loa : E kau tio ki se kulo kua pula, leia e agaaga mai lona gutu mei le potu noleto.

¹⁴ Ti na pati mai loa le Eteleno kiate au : E tupu loa mei le potu noleto le veli ki le kakai katoa o le fenua.

¹⁵ Talie e pati le Eteleno : Tio, e kau kalagai loa a kakai fuli o atu puleaga i le noleto ; ti e lotou au loa, ti e lotou tasi fakatuu loa lona nofolaga tau i le mua o matapa o Selusalemi, ki ona paa takatakai, mo kolo fuli o Suta.

¹⁶ E kau fakasa loa aku tautea kia latou, o tupu ko alatou agasala fuli, talie kua lotou tiaki au kae lotou momoli le iseso ki ni atua kese, ti kua lotou tausi ki gaoi o olatou lima.

¹⁷ Ti ko koe, toi lou kilipipi, ti ke tuu ki aluga, ti ke fakasa kia latou a nea fuli ala e kau fakatotonu atu loa kiate koe. Aua na ke lulu i olatou mua, ke aua na kau fakalulu loa a koe i olatou mua.

¹⁸ Ko leinei, kua kau fakanofo a koe i le aso nei ki le fenua katoa ofaipe se kolo tau, mo se fa pou ukamea, ti mo se paa sila, ki sau o Suta, mo ona pule, mo ona tagata faisakilifisio, ti mo le kakai katoa o le fenua.

¹⁹ E lotou tau loa kiate koe, kae e leaise lotou malo loa iate koe ; talie e pati le Eteleno : E kau nofo mo koe o saofaki a koe.