Sakopo 4 - Tosi Tapu

Ko le tau ki oli o le tino

¹ E au meifea a tau, ti e au meifea a fefele ia koutou ? Pe leaise ko okoutou oli fakavale ala e tau i okoutou koga tino ?

² E kotou oli, kae e leaise kotou maua ; e kotou tukipo, mo faiga ke maua, kae e leaise kotou mafai ; e kotou fefele mo tau, kae leaise kotou maua, talie e leaise kotou kole.

³ E kotou kole, ti e leaise kotou maua, talie e kotou kole veli, talie ke fakafimalie ai okoutou oli fakavale.

⁴ Ei kau tono, pe leaise kotou iloa ko le alofa ki le malama nei ko le vesia a ia ki le Atua ? Ti ko leia e loto ke kaukau nea mo le malama nei e liliu a ia ko le fili o le Atua.

⁵ Pe kotou masalo e masau noa le Tosi ? E finenonofo le Atua ki le Laumalie leia kua fakanofo e ia ia tatou.

⁶ Kae e soli e ia kia tatou se kalasia leia e toe lasi ake, talie e toe pati le Tosi : E tau le Atua kia latou ala e fia nealasi, Kae soli e ia lona kalasia kia latou ala e fakataulalo.

⁷ Koia kotou fakataulalo ki le Atua ; kotou tekei le Tiapolo, ti e sola mamao loa a ia meia koutou.

⁸ Kotou fakafeofi ki le Atua, ti e fakafeofi atu loa a ia kia koutou. Kotou fakamea okoutou lima, kau agasala, ti kotou fakamea okoutou loto, kau lotolotolua.

⁹ Kotou logoi lokoutou fakaaloalofa ; kotou nonofo i le putu mo loimata ; ke liliu lakotou kata ko se putu, ti mo lokotou fiafia ko se mamae.

¹⁰ Kotou fakataulalo i mua o le Aliki, ti e siki loa e ia koutou ki aluga.

¹¹ Fetaina, ke aua na kotou masau veli, a la ki la. Ko leia e masau veli ki se taina, pe fakamaaui ia lona taina, e masau veli a ia ki le lao ti e fakamaaui e ia le lao. Ti kapau e ke fakamaaui ia le lao, e leaise ko se tagata loa a koe leia e fai ia le lao, kae ko lona tui fakamaau.

¹² Ko le toka tasi fai e fai lao mo tui fakamaau, ko leia e mafai ia ke fakamauli mo fakamate ; kae ko ai a koe, leia e fakamaaui ia le oloi ?

Valoki o le kau fai koloa mo le kau mou koloa

¹³ Kia koutou ala e pati : I le aso nei pe ko apogipogi e motou ano loa ki le kolo leia, e motou nofo loa i ai i se fetuu katoa, e motou fai koloa loa i ai, ti e motou maua loa se koloa lasi ake !

¹⁴ Kotou ala e leaise iloa ia fua le nea ka soko i apogipogi ! Talie kolea lokoutou mauli ? Ko se afu koutou leia e sa i se ga temi noa, ti puli.

¹⁵ Kae na tonu ake ke kotou pati : Kapau ko le finegalo o le Atua, e motou fai loa le nea leinei pe ko le nea leia.

¹⁶ Kae ko leinei, e kotou fiafia i akoutou manatu fia nealasi. Ko se nea veli le fiafia fenaaki.

¹⁷ Koia ko leia e iloa ia le fai o le nea leia e malie, kae e leaise fai e ia a ia, e fai e ia se agasala.