Sakopo 2 - Tosi Tapu

Ko le alofa tautaina maoki

¹ Ei oku fetaina, ke mea lakoutou tui ki lotatou Aliki fakakololia ko Sesu-Kilisito mei fakapalatasi fuli.

² Talie kapau e ulu mai ki lokoutou fale lotu se tagata mo se mama aulo mo se teu fulumalie, ti toe ulu mai foki se tagata mativa mo se teu veli ;

³ ti kapau e kotou mafuli o tio ki leia e teu ki le teu fulumalie, o pati kiate ia : ko koe, nofo a koe i leinei i le nofoaga malie ! Ti kapau e kotou pati ki le mativa : ko koe, tuu a koe i aluga i leia ! pe : nofo a koe i lalo o loku tekiaga vae !

⁴ Pe leaise kotou fai ia koutou totonu se fakakesekese ? Pe leaise ko ni tui fakamaau koutou ala e maua ia ni manatu veveli ?

⁵ Kotou fakalogo mai, ei oku fetaina alofaina : Pe na leaise filifili e le Atua le kau mativa o le malama nei, ke lotou mou koloa i le tui, ti ke lotou maua tofiga le Puleaga leia na fakapapau e ia kia latou ala e alofa kiate ia ?

⁶ Kae ko koutou, e kotou fakamamae le mativa ! Pe leaise ko le kau mou koloa leia e fakavelivelii ia koutou ti mo ave ia koutou ki telepinale ?

⁷ Pe leaise ko latou ala e lauvelii ia le igoa fulumalie leia kua kotou maua ?

⁸ Kapau e kotou fai le lao o le puleaga, o mulimuli ki le Tosi : E ke alofa loa ki lou oloi o tatau mo koe totonu, e kotou fai malie.

⁹ Kae kapau e kotou fai se fakapalatasi, e kotou fai se agasala, ti e fakatuaa koutou e le lao ofaipe ni tagata maumau lao.

¹⁰ Talie ko leia e fai ia le lao katoa, kae sala ki se fakatotonu fua e tasi, e sala a ia ki le lao katoa.

¹¹ Talie ko leia na pati : Aua na ke tono, na toe pati foki : Aua na ke tukipo. Koia kapau e leaise ke tono, kae ke tukipo, kua ke liliu ko se tagata maumau lao.

¹² Kotou masau ti kotou gaoi ofaipe ni tagata ala e tonu ke fakamaaui e se lao o le lauatea,

¹³ talie e sala manavaalofa le fakamaau ki leia na leaise manavaalofa ; kae e malo le manavaalofa i le fakamaau.

Ko gaoi o le tui maoki

¹⁴ Ei oku fetaina, kolea lona aoga ki se tasi ke pati a ia e maua e ia le tui, mo kapau e leaise maua e ia a gaoi ? Pe feala ke fakamauli a ia e le tui lena ?

¹⁵ Kapau e telefua mo pakupaku i aso fuli se taina pe ko se tuagaane,

¹⁶ ti e pati se tasi ia koutou kia laua : Ke kolua ano i le fimalie, ke kolua fakamafana ti ke kolua makokona ! kae e leaise kotou soli kia laua le nea leia e aoga ki le tino, kolea le aoga o le nea lena ?

¹⁷ E toe fenaaki foki mo le tui : kapau e leaise maua e ia a gaoi, kae tuu toka tasi a ia, e mate a ia.

¹⁸ Kae e pati loa se tasi : Ko koe, e ke maua le tui ; ti ko au, e kau maua a gaoi. Fakasa mai kiate au lau tui sala gaoi, ti ko au, e kau fakasa atu loa kiate koe laku tui i aku gaoi.

¹⁹ E ke tui e i ai se Atua fuai e tasi, e ke fai malie ; e tui foki le kau temonio ki ai, ti e lotou lulu.

²⁰ Ei tagata valea, pe ke fia iloa ko le tui sala gaoi e leai sona aoga ?

Ko le faifaitakiaga o Apalaamo

²¹ Ko Apalaamo lotatou tamana, pe na leaise fakamatatonu a ia e ana gaoi, i lana momoli lona vosa ko Isaake i le aletale ?

²² E ke tio na gaoi le tui mo ana gaoi, ti na liliu loa le tui o malie tukupau i ana gaoi.

²³ Na fakamaoki i ai le nea leia e fakasa e le Tosi : Na tui Apalaamo ki le Atua, ti na lau le nea lena kiate ia ko se faitotonu ; ti na fakaigoa a ia ko le kaukau nea o le Atua.

²⁴ E kotou tio i ai e fakamatatonu le tagata i gaoi, kae leai fai i le tui.

²⁵ Ko Laape, le fafine faiaga, pe na leaise fakamatatonu foki a ia i gaoi, i lana tali a tagata esipio ti mo lana fakasosola laua i se ala kese ?

²⁶ Ofaipe le tino sala laumalie e mate, ko le tui sala gaoi e mate foki.